London Kral Kollecinin iqtisadiyyat professoru Gülçin Özkan Azərbaycan mediasına müsahibəsində iqlim dəyişikliyinin dövlətlərin iqtisadi rifahına birbaşa təsir göstərdiyini bildirib və kənd təsərrüfatı istehsalının azalmasının dünyanı qlobal ərzaq böhranına apardığını və inflyasiyanın yüksəlməsi ehtimalını artırdığını qeyd edib.
Ekspert daha sonra vurğulayıb ki, son illərdə ekstremal təbiət hadisələri adi hala çevrilib. Məsələn, daşqın, qasırğa və quraqlıqların sayı çoxalıb, hətta yoluxucu xəstəliklərin yayılma arealı genişlənib. Belə sarsıntılar iqtisadi itkilərə, istehsal proseslərinin zəifləməsinə və nəticədə gəlirlərin azalmasına səbəb olub.
Onun sözlərinə görə, anomal isti və soyuq havalar nəticəsində enerji resurslarına tələbat arta bilər ki, bu da qiymətlərin bahalaşmasına və ümumilikdə, inflyasiyanın artmasına səbəb olacaq. İqlim dəyişikliyinə ən çox məruz qaldıqları üçün ən az inkişaf etmiş ölkələr daha çox zərbə alacaq. Mövcud araşdırmalara görə, Afrika və Cənub-Şərqi Asiyanın müəyyən hissələri ən həssas bölgələr kimi bu cür ziyanla üzləşəcək.
XQ