Prezident İlham Əliyev “Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29), Kioto Protokolunun Tərəflər Görüşünün 19-cu sessiyasının və Paris Sazişinin Tərəflər Görüşünün 6-cı sessiyasının keçirilməsi ilə əlaqədar Təşkilat Komitəsinin yaradılması haqqında” 2024-cü il 13 yanvar tarixli Sərəncamında dəyişiklik edilməsi barədə Sərəncam imzalayıb. 

Dövlət başçısının imzaladığı bu önəmli sənəd COP29-un müstəqil Azər­baycanın təşkil edəcəyi ən böyük tədbir olduğundan, burada qlobal əhəmiyyətli məsələlərin müzakirə ediləcəyindən xə­bər verir. 

Ümumiyyətlə, COP29-la bağlı res­publikamızdan böyük gözləntilər var. Ona görə də həm hazırlıq prosesinin, həm də tədbirin özünün yüksək səviyyədə təşkili üçün cəmiyyətin müxtəlif seqmentlərinin səfərbər olunması zəruridir. Bax, elə bu baxımdan da Təşkilat Komitəsinin (TK) tərkibi bir qədər də genişləndirilib. Belə ki, faktiki olaraq TK-də gender balansı tam tə­min olunub. Bu isə Azərbaycan Preziden­tinin qadınların cəmiyyətdəki roluna olan diqqət, etimad və hörmətin göstəricisidir.

Bu sahədə dünyada vətəndaş cəmiy­yəti çox fəaldır. Ona görə TK-yə vətəndaş cəmiyyətinin nümayəndələri də daxil edi­lib. COP29-da müzakirə olunacaq müasir çağırışlar, innovasiya məsələlərinin geniş müzakirə olunacağı nəzərə alınaraq, TK-da iqtisadiyyat, innovasiya sahəsində ça­lışan şəxslər də təmsil olunurlar. Bir söz­lə, yuxarıda adı çəkilən sərəncamın əsas ideyası TK-nin maksimum inklüzivliyinin təmin edilməsidir.

Qeyd edək ki, neft-qaz ölkəsi olan Azərbaycan “yaşıl enerji” növlərinin ya­radılmasını və “yaşıl enerji”nin dünya ba­zarlarına nəqlini hazırda enerji siyasəti­nin yeni prioritet istiqaməti kimi müəyyən edib. COP29-un Bakıda keçirilməsi qəra­rı isə həm də Azərbaycanın “yaşıl ener­ji” siyasətinə olan qlobal dəstəyi nəzərə çarpdırır. 

Onu da xatırladaq ki, bərpaedilən və “yaşıl enerji” əsasında istehsal olunan elektrik ixracı Azərbaycanın enerji stra­tegiyasında yeni eranın başlanmasına səbəb olub. 2030-cu ilədək elektrik ener­jisinin qoyuluş gücündə bərpa olunan enerjinin payının Azərbaycanda 30 faizə çatdırılması gözlənilir. Azərbaycanın bər­paolunan enerji potensialı çox yüksəkdir, statistik göstəricilərə görə, ölkənin quru­da külək və günəş enerjisinin həcmi 27 giqavat, Xəzər dənizinin Azərbaycan sektorunda isə külək enerjisi 157 giqavat təşkil edir.

2020-ci ildə 44 günlük müharibədən dərhal sonra Prezident İlham Əliyev Qa­rabağ və Şərqi Zəngəzuru, Naxçıvanı “yaşıl enerji bölgəsi” adlandırıb və bu is­tiqamətdə genişmiqyaslı işlərə başlanılıb.

Beləliklə, Azərbaycan apardığı məqsədyönlü iş, böyük zəhmət və bu sahədə qazandığı uğurlar sayəsində İq­lim Dəyişikliyi üzrə Çərçivə Konvensiyası­nın Tərəflər Konfransının 29-cu sessiya­sına – COP29-a evsahibliyi etməyə tam layiqdir. 

XQ