Baş nazirin müavini, Azərbaycan–Çin Hökumətlərarası Ticarət-İqtisadi Əməkdaşlıq Komissiyasının həmsədri Şahin Mustafayev 6-cı Çin Beynəlxalq İdxal Sərgisi çərçivəsində təşkil olunan Honçiao Beynəlxalq İqtisadi Forumun­da çıxış edərək son illər Azərbaycanın bu ölkə ilə iqtisadi əməkdaşlığının geniş­lənərək bütün sahələrdə nəzərəçarpa­caq inkişafa səbəb olduğunu bildirib. Ş.Mustafayev daha sonra respublikamızın Çinlə əlaqələrini gücləndirən və müxtə­lif sahələrdə yeni əməkdaşlıq imkanları yaradan “Bir kəmər, bir yol” təşəbbü­sünün əsas istiqamətlərindən biri olan “yaşıl inkişaf”ın təşviqini dəstəklədiyini vurğulayıb. 

Xatırladaq ki, Prezident İlham Əli­yevin və ÇXR Sədri Si Cinpinin birgə səyləri sayəsində iki ölkə arasında si­yasi dialoq və ənənəvi dostluq getdikcə möhkəmlənir, dövlətlərarası münasibət­lər inkişaf edir, qarşılıqlı faydalı iqtisadi əməkdaşlıq yüksək dinamik göstəricilərlə nəzərə çarpır. 

“Yaşıl transformasiya” prosesinə öz töhfəsini verən Azərbaycan zəngin təbii resurslara, coğrafi mövqeyinə görə nadir məkanda yerləşir. Respublikamızın Avro­pa ilə Asiya arasında körpü rolu oynaması isə ölkəmizə “yaşıl ticarət”i inkişaf etdir­məyə imkan verir.

Azərbaycanda 2030-cu ilədək alter­nativ və bərpaolunan mənbələrdən əldə edilən enerjinin həcminin 30 faizə çatdı­rılması prioritet istiqamət olaraq diqqət mərkəzində saxlanılır. Hazırda Prezident İlham Əliyevin tapşırığı ilə işğaldan azad olunan Qarabağ və Şərqi Zəngəzur iqti­sadi rayonları “Yaşıl enerji zonası” kon­sepsiyası formatında bərpa olunur, həmin ərazilərdə ən müasir texnologiya əsasında “ağıllı kənd”, “ağıllı şəhər”, “ağıllı kənd təsərrüfatı” və “yaşıl enerji” layihələri uğurla yerinə yetirilir.

Ölkəmizin alternativ və bərpaolunan enerji potensialı artıq xarici investisiya­ların əsas mənbəyinə çevrilib. Bu poten­sialın reallaşdırılmasında, “yaşıl enerji” layihələrinin icrasında Çin şirkətləri ilə də uğurlu əməkdaşlıq qurulub. 

XQ