Səpin mövsümündə gübrələr ucuzlaşıb

Payızın gəlişi ilə əlaqədar təsərrüfatlarda mövsümi canlanma yaranıb. İlin bu bərəkətli çağı bir çox kənd təsərrüfatı məhsullarının yığımı ilə xarakterizə olunsa da, gələcək bolluğun təməli də məhz son baharda qoyulur. İndi ölkənin təsərrüfatlarında payızlıq əkinlərinin də qızğın çağıdır. 

Torpaq mülkiyyətçiləri növbəti ilin məhsulu üçün əkin işlərini getdikcə sürət­ləndirirlər. Hava şəraitinin yaratdığı im­kanlardan maksimum yararlanmağa çalı­şan fermerlər və fərdi təsərrüfat sahibləri səpini optimal müddətdə başa çatdırma­ğa çalışırlar. Kənd təsərrüfatı bitkilərin­dən yüksək məhsul alınması intensiv əkinçiliyin əsas hədəfidir. Bu məsələnin uğurlu həlli, heç şübhəsiz, kənd təsər­rüfatı bitkilərinin gübrələnməsindən çox asılıdır. Aqrar sahənin mütəxəssisləri deyirlər ki, bitkilərin böyüməsi, inkişafı və yüksək məhsul verməsi onların normal qidalanmasından asılıdır. 

Bitkilərin lazımi qida maddələri ilə tə­min olunmasında isə gübrələrin rolu bö­yükdür. Belə ki, gübrələr torpağın mün­bitliyinin artırılmasında, kənd təsərrüfatı bitkilərinin məhsuldarlığının yüksəldilmə­sində və məhsulun keyfiyyətinin yaxşı­laşmasında xüsusi əhəmiyyətə malikdir. Xüsusən də payızda əsas şum altına peyinlə birlikdə fosfor və kalium gübrələ­rinin verilməsi nəticəsində bitkinin qida maddələrindən istifadə əmsalı artır. Bu səbədən də mütəxəssislər hesab edirlər ki, əksər kənd təsərrüfatı bitkiləri üçün kalium və fosfor gübrələrinin illik norma­sının 40-50 faizi məhz payızda əsas şum altına verilməlidir.

Hazırda kənd təsərrüfatı məhsulları istehsalçıları sahələrdə payızlıq dənli bit­kilərin səpini ilə yanaşı, onların yemləmə gübrələri ilə təminatına da xüsusi diqqət yetirirlər. Ölkəmizdə isə aqrar sahənin in­kişaf etdirilməsi məqsədilə uzun illərdir ki, fermer və fərdi təsərrüfat sahiblərinə bü­tün növ gübrələr güzəştli şərtlərlə satılır. 

Xatırladaq ki, ötən ayın əvvəllərindən etibarən “Aqroservis” Açıq Səhmdar Cə­miyyəti tərəfindən səpin mövsümündə istifadəsi zəruri olan gübrələrin satışına başlanılıb. Adıçəkilən qurum, həm də bir neçə adda gübrənin qiymətində endi­rim edib. Müşahidələr göstərir ki, ölkəyə yeni gətirilmiş nitroammofoksa gübrə­sinin dəyəri hazırki bazar qiymətindən əhəmiyyətli dərəcədə aşağıdır. Belə ki, səpin mövsümündə bitkilərin kök sistemi­nin inkişafını sürətləndirən enitroamma­foska gübrəsinin 1 tonunu 800 manata, 50 kiloqramlıq kisəsini isə 40 manata əldə etmək mümkündür. Bundan əlavə, “Aqroservis” ammofos, ammonium sulfat və kalium sulfat gübrələrinin də qiymət­lərinə endirim tətbiq edib. 

Səhmdar Cəmiyyətinin məlumatına görə, endirimlərin məqsədi fermerlərin gübrəyə olan tələbatını və əlçatanlığını təmin etmək, məhsuldarlığın artırılma­sına dəstək olmaq və mineral gübrədən istifadə arealını daha da genişləndirmək­dir.

Səpinqabağı müddətdə istifadəsi va­cib olan gübrələrin güzəştli şərtlərlə sa­tışı davam edir. “Aqroservis” ASC-dən aldığımız məlumata görə, kampaniya başlanıldığı gündən indiyədək fermer və fərdi təsərrüfat sahibləri tərəfindən quruma çoxsaylı müraciətlər daxil olub. Həmin müraciətlər müsbət dəyərləndi­rilərək gübrələrin yeni şərtlər daxilində fermerlərə çatdırılması təmin olunub. Bütövlükdə isə, ötən müddətdə “Aqroser­vis”in müvafiq anbarları 1000 tondan çox gübrə satışı həyata keçirib. Dövlətin bu faydalı dəstək tədbirindən yararlanmaq istəyənlərin sayı isə gündən-günə artır. Xatırladaq ki, təsərrüfat sahibləri mineral gübrəni çox asanlıqla yalnız fermer kartı­nı təqdim etməklə əldə edə bilirlər.

Kənd təsərrüfatı mütəxəssislərinin bildirdiyinə görə, taxıl bitkilərinin səpini mövsümündə tətbiq olunan nitroammo­foska və ammofos gübrələri tərkibindəki fosforun təsiri ilə məhsuldarlığı artırır. Bununla yanaşı, nitroammofoska gübrə­sində olan kalium bitkinin şaxtaya və xəstəliklərə qarşı müqavimətini güclən­dirir. Məlum olduğu kimi, kalium sulfat kalium elementi ilə zəngin olan, əsasən, kökümeyvəli bitkilər üçün əvəzolunmaz gübrədir. Sitrus bağları və çay bitkilərinin azota olan tələbatının ödənilməsi üçün isə ən yaxşı seçim kimi ammonium sul­fatı misal göstərmək olar. 

Qeyd edək ki, “Aqroservis” ASC-nin müvafiq anbarları adları çəkilən mineral gübrələrlə tam təchiz olunaraq fermerlə­rin təminatı üçün hazır vəziyyətə gətirilib. 

M. YAQUBZADƏ
XQ