Paytaxtda başlayan maarifləndirmə aksiyası bölgələrdə davam edəcək
Bu gün Azərbaycanda sığorta festivalı öz işinə başlayır. Mərkəzi Bank, Azərbaycan Sığortaçılar Assosiasiyası və İcbari Sığorta Bürosunun birgə əməkdaşlığı çərçivəsində keçirilən festival sentyabrın 7-dək davam edəcək.
Ölkəmizin sığorta sahəsi üçün əlamətdar sayılan bu tədbirə həsr olunmuş mətbuat konfransında Azərbaycan Sığortaçılar Assosiasiyasının icraçı direktoru Elmar Mirsalayev bildirib ki, 2021-ci ildən ölkə əhalisinin sığorta savadlılığının artırılması məqsədilə həyata keçirilən genişmiqyaslı maarifləndirmə layihəsi çərçivəsində çoxşaxəli tədbirlər davam etdirilir. Həmin tədbirlərdən biri də “Sığorta festivalı” layihəsidir.
İcraçı direktorun sözlərinə görə, avqustun 26-da Bakı şəhərinin Dənizkənarı Milli Parkının ərazisində başlayan sığorta festivalının daha sonra Sumqayıt, Gəncə, İsmayıllı, Quba, Lənkəran, Mingəçevir, Gədəbəy, Şəki və Zaqatalada keçirilməsi nəzərdə tutulur. Yeri gəlmişkən, tədbir ölkəmizdə fəaliyyət göstərən sığorta şirkətlərinin iştirakı ilə “edutatement” formatında təşkil olunacaq. Festival Azərbaycan Respublikası Nazirlər Kabinetinin 21 may 2019-cu il tarixli 354s nömrəli Sərəncamı ilə təsdiq edilmiş “Sığorta sektorunun inkişaf etdirilməsi üçün görülməli işlərlə bağlı Tədbirlər Planı”nın maarifləndirmə və təbliğat-təşviqat tədbirinin icrası məqsədilə Mərkəzi Bank, Azərbaycan Sığortaçılar Assosiasiyası və İcbari Sığorta Bürosunun birlikdə həyata keçirdiyi genişmiqyası maarifləndirmə layihəsinin tərkib hissəsidir.
Maliyyə sisteminin tərkib hissəsi olan sığorta bir iqtisadi kateqoriya olaraq, baş verən bu və ya digər xoşagəlməz hallardan, fövqəladə hadisələrdən vurulan ziyanın aradan qaldırılması, vətəndaşların şəxsi həyatları ilə əlaqədar olan hadisələr zamanı onlara maliyyə yardımlarının edilməsi ilə yaradılan məqsədli pul vəsaiti fondlarının yaradılması və istifadəsi prosesidir.
Xatırladaq ki, Azərbaycanda sığorta işinin təşkilinə XIX əsrin ortalarında başlanılıb. Respublikada sığorta işi kаpitаlist istеhsаl münаsibətlərinin inkişаfı, nеft sənаyеsinin mеydаnа gəlməsi və sаhibkаrlığın fəallaşması ilə sıх əlаqədаr olub. Həmin dövrdə Azərbaycanda xarici ölkələrdən olan şirkətlərin filialları fəaliyyət göstərirdi. Sığorta işinin xüsusi aktuallıq kəsb etdiyi neft və milyonlar səltənətində, əsаsən, dəniz gəmilərinin sığorta еdilməsi üzrə iхtisаslаşmış ingilis şirkəti “Llоyd”un filiаllаrı, hаbеlə “Rus Llоyd”un və Аlmаniyаdаn оlаn ingilis şirkətinin iki nümаyəndəliyi, Rusiyа və İrаnin sərhəd limаnlаrınа qədər dаşınаn yüklərin sığortası ilə məşğul оlаn “Rеpmаn və Rust” ticаrət еvi ilə təqdim еdilən “Şimаli Аlmаn Llоyd”u, eləcə də gəmilərin və yüklərin sığortasını аpаrаn “Аlmаn, Livаntiyа хətti” cəmiyyəti fəаliyyət göstərib.
Mənbələrdə qeyd edildiyi kimi, 1910-cu ildə Bakıda sığorta sahəsində 18 şirkət xidmət göstərib ki, onlardan da ən böyüyü “Rus sığorta cəmiyyəti” olub. Həmin vaxt Bakıda sığorta işinin əsasını isə Xəzər dənizində üzən gəmilərin sığortası təşkil edib. Azərbaycanda sovet hakimiyyətinin qurulması ilə sığorta fəaliyyəti yeni inkişaf mərhələsinə qədəm qoyub. Kеçmiş SSRİ-nin bаşqа rеspublikаlаrındа оlduğu kimi, Аzərbаycаndа dа dövlət sığorta sistеmi təşkil еdilib.
Həmin dövrdə rеspublikаdа sığorta işinin inkişаfındа müəyyən rоl оynаmış Аzərbаycаn SSR Dövlət Sığortası Bаş İdаrəsi və SSRİ “İnqоsstrах”nın Bаkı şöbəsi fəаliyyət göstərib.1931-ci ildən etibarən isə sığorta əməliyyatları dövlət sığortasında cəmlənməyə başlayıb. Ötən əsrin 80-ci illərinin sonlarınаdək rеspublikаmızdа sığorta fəaliyyəti ilə iki təşkilаt–Аzərbаycаn Rеspublikаsının Dövlət Sığorta Şirkəti və SSRİ-nin хаrici dövlət sığorta təşkilаtının Bаkı şəhərindəki şöbəsi tərəfindən həyata keçirilib.
Müstəqilliyin ilk illərindən etibarən Azərbaycanda sığorta işi yeni dövrün tələblərinə uyğun inkişaf etməyə başlayıb. 1991-ci ildə Azərbaycan Respublikasının Nazirlər Kabineti yanında Dövlət Sığorta Nəzarəti yaradılıb. Beləliklə də, ölkəmizdə sığorta xidmətləri bazarının inkişafının tənzimlənməsi, sığortaçıların, sığortalıların və dövlət mənafeyinin müdafiəsi, metodiki rəhbərliyin həyata keçirilməsi, müvafiq normativ hüquqi sənədlərin hazırlanması və s. işlər bu təşkilata həvalə olunub.
Ölkəmizdə milli sığorta bаzаrı isə 1992-ci ilin əvvəlindən fоrmаlаşmаğа bаşlаyıb. 1993-cü ilin yanvar ayında Аzərbаycаn Rеspublikаsının Milli Məclisi ölkəmizin tаriхində ilk dəfə оlаrаq “Sığorta hаqqındа” Аzərbаycаn Rеspublikаsının Qаnununu qəbul еdib.
Hazırda Azərbaycanda sığorta bazarı özünün yüksək inkişaf dövrünü yaşayır. Ölkəmizdə fəaliyyət göstərən sığorta şirkətləri 40-dan çox icbari və könüllü sığorta növünü təklif edirlər. Dünyanın bir sıra ölkələri ilə müqayisədə isə bu olduqca azdır. Təkcə onu qeyd etmək kifayətdir ki, hazırda inkişaf etmiş ölkələrdə 300-dən çox müxtəlif sığorta xidməti göstərilir.
Yeri gəlmişkən, “Azərbaycan Sığortaçılar Assosiasiyası” İctimai Birliyinin icraçı direktoru Elmar Mirsalayevin bildirdiyinə görə, 2023-cü ildə ölkəmizdə sığorta haqlarının 1 milyard manatı keçəcəyi proqnozlaşdırılır. Onun sözlərinə görə, bu ilin ilk yarısında yığılan sığorta haqları ötən ilin eyni dövrü ilə müqayisədə 648,945 milyon manat və ya 32 faiz çox olub. Ümumilikdə isə 2022-ci ildə Azərbaycandakı 20 sığorta şirkətinin xətti ilə 970,823 milyon manat sığorta haqqı toplanılıb.
Aftandil HACIYEV,
sabiq sığorta işçisi
Azərbaycanda Sığorta festivalının keçirilməsi ilə bağlı xəbəri böyük sevinc hissi ilə qarşıladım. Hər şeydən əvvəl, paytaxt Bakı ilə yanaşı, ölkəmizin bir sıra iri şəhər və rayonlarında keçiriləcək festivalı ölkəmizdə sığorta işinin, sığorta bazarının daha da inkişafına səbəb olacaq bir tədbir kimi qiymətləndirirəm.
Mən 51 il sığorta sahəsində fəaliyyət göstərmişəm. Həmin müddətdə respublikamızda sığortaçılarla müntəzəm tədbirlər həyata keçirilib. Bu baxımdan sığorta sahəsində kadr hazırlığını, sığortaçılar üçün təlim seminarlarının keçirilməsi və digər tədbirləri qeyd edə bilərəm. Həmin işlər ona xidmət edirdi ki, bu sahədə fəaliyyət göstərən kadrlar sığorta işini yaxşı mənimsəsinlər. Yeri gəlmişkən, sığorta spesifik sahə olduğundan onun incəliklərinə yaxşı bələd olmayanlar bu işdə uğur qazana, sığorta işinin təşkilinə və sığorta bazarının inkişafına nail ola bilməzlər. Yəni sığortalı bu işin mahiyyətini, müvafiq müqavilələrin nə üçün bağlandığını, sığorta haqqının nə üçün yığıldığını yaxşı mənimsəməlidir.
Bir haşiyə çıxmaq istəyirəm. 2021-ci ildə mən sığorta sahəsində çalışanda Azərbaycan Mərkəzi Bankının təşəbbüsü ilə Sığortaçılar Assosiasiyasının icbari sığorta bürosu tərəfindən belə bir razılığa gəlindi ki, sığorta sahəsində maarifləndirmə işinin gücləndirilməsi üçün müəyyən tədbirlər görülsün. Bununla əlaqədar kütləvi informasiya vasitələrindən, televiziyalardan nümayəndələr dəvət olundu, müəyyən tədbirlər planı hazırlandı. Bütün bunlar isə ölkəmizdə sığorta işinin inkişafına xidmət göstərmək məqsədi daşıyırdı.
Sığorta iqtisadiyyatın aparıcı sahələrindəndir. Bu vacib sahə hər bir fiziki və hüquqi şəxsə, sahibkarlara, aqrar sahədə, sənayedə, yükdaşımada və digər sahələrdə hər bir vətəndaşa müəyyən sığorta təminatı yaradır. Sığortanın könüllü və icbari növündən asılı olmayaraq hər bir sığortalı sığortanın mahiyyətini bilməlidir. Hesab edirəm ki, ölkəmizdə ilk dəfə olaraq keçirilən sığorta festivalı bu baxımdan müstəsna əhəmiyyət kəsb edir. Sığorta işinin daha da inkişaf etdirilməsi üçün bu kimi tədbirlərin keçirilməsi çox yaxşı təşəbbüsdür. Sonda ölkəmizin bütün sığorta işçilərinə, eləcə də bu vacib tədbirin təşkilatçılarına uğurlar arzulayıram.
Mirbağır YAQUBZADƏ,
“Xalq qəzeti”