Azərbaycanın heyvandarlıq, pambıqçılıq və taxılçılıqda böyük ənənələrini yaşadan Bərdədə artıq taxıl biçini başa çatıb. Sahələrdən 60 min 385 ton buğda, 17 min 885 ton arpa toplanıb. Bundan başqa, indiyədək 1518 ton qarğıdalı yığılıb. Hər hektardan orta məhsuldarlıq buğda üzrə 45,8 sentner, arpa üzrə 41,7 sentner, qarğıdalı üzrə 81,2 sentner təşkil edib. 

Hazırda rayonda kütləvi pambıq yığımı­na hazırlıq gedir. Bərdə 1970–1980-ci illərdə Azərbaycanın ən çox pambıq tədarük edən ra­yonlarından biri idi. 1981-ci ildə burada 28 min hektar pambıq tarlasından 126 min tona yaxın məhsul tədarük edilmişdi. Lakin 1990-cı illər­dən başlayaraq bu sahəyə maraq azalmışdı. Dövlətimizin başçısının tapşırıq və göstərişləri nəticəsində rayonda pambıqçılıq yenidən inki­şaf dövrünə qədəm qoydu.

Prezident İlham Əliyev əmək tutumu bö­yük, gəlir imkanları geniş olan bu sahənin inki­şafını ölkədə aqrar sektorun əsas istiqamətlə­rindən biri kimi müəyyənləşdirdi. Pambıqçılığa çox ciddi dövlət dəstəyi göstərildi. Görülən işlər Bərdə rayonunda pamıqçılığın inkişafına yeni­dən təkan verdi. Rayon sakinlərinin pambıqçı­lıq sahəsində təcrübəsi, bölgədə olan mövcud pambıq emalı zavodlarının potensialı pambıq istehsalını artırmaq üçün stimul yaratdı. 

Bunun nəticəsidir ki, 2015-cı ildən başlaya­raq Bərdədə pambıq sahələri artırıldı. İnnova­tiv becərmə və müasir suvarma texnologiyaları və qabaqcıl təcrübələrin tətbiqi, yüksək key­fiyyət göstəricilərinə malik pambıq sortlarının səpini məhsuldarlığı artırdı. Bundan başqa, pambıqçılıq sahəsində fəaliyyət göstərən mütəxəssislərin bilik və bacarıqlarının artırıl­ması məqsədilə qısa müddətli təlim kursları təşkil edildi, eyni zamanda, pambıq sahələrin­də pestisidlərdən istifadə zamanı təhlükəsizlik qaydalarına əməl olunması üçün ciddi tədbirlər həyata keçirildi. Bunlar isə məhsuldarlığa təsir edən amillərdir. Ötən il ərzində 11 min hektar sahədən 35 min 954 ton pambıq toplanıb. Hər hektardan orta məhsuldarlıq pambıq üzrə 32,6 sentner olub. Bu il daha yüksək məhsul göz­lənilir.

Bərdədə digər kənd təsərrüfatı məhsulla­rında da artım var. 2023-cü ilin yanvar–iyun aylarında rayonda 232 milyon 733 min manat­lıq kənd təsərrüfatı məhsulları istehsal edilib ki, onun 130 milyon 831 min manatı və ya 56,2 faizi bitkiçiliyin, 101 milyon 902 min manatı və ya 48,3 faizi heyvandarlığın payına düşüb. 2022-ci ilin yanvar–iyun ayları ilə müqayisədə kənd təsərrüfatı məhsullarının istehsalı 21,2 faiz artıb. Bu il 1600 ton kartof, 86 min 541 ton tərəvəz, 34 min 820 ton bostan məhsulları, 51 min ton meyvə və giləmeyvə yığılıb.

Pünhan ƏFƏNDİYEV, “Xalq qəzeti”