İqtisadiyyat Nazirliyi yanında İqtisadi Zonaların İnkişafı Agentliyinin məlumatına görə, yaxın illərdə Azərbaycanda “İkarus” avtobuslarının istehsalına başlanılacaq. Bununla bağlı Sumqayıt Kimya Sənaye Parkının rezidenti – “Sumqayıt Texnologiyalar Parkı” MMC ilə Macarıstanın “İkarus” şirkəti arasında Anlaşma Memorandumu imzalanıb.
Sənədə əsasən, ilkin olaraq ölkəmizdə ildə 100 ədəd avtobus istehsal olunması, bu rəqəmin, tədricən, 500 ədədə çatdırılması nəzərdə tutulur. Memorandum, həmçinin yaxın gələcəkdə Qarabağ iqtisadi rayonunda istehsalın lokallaşdırılması, servis mərkəzinin yaradılması və digər məsələləri əhatə edir. “İkarus”ların istehsalının genişləndirilməsi isə, öz növbəsində, Azərbaycanın avtobus parkının yenilənməsinə mühüm töhfələr verə bilər.
Son illər vətəndaşların rahatlığı, onlara keyfiyyətli və təhlükəsiz sərnişindaşıma xidmətlərinin göstərilməsi məqsədilə Azərbaycana müasir tələblərə cavab verən müxtəlif tutumlu yeni avtobuslar gətirilir. Ölkənin avtobus parkının yenilənməsi ilə bağlı tədbirlər ötən il də davam etdirilib. Nazirlər Kabinetinin 2022-ci il fəaliyyətinə dair hesabatına əsəsən, il ərzində Azərbaycana 170-i dövlət və 85-i daşıyıcılar tərəfindən olmaqla, ümumilikdə, 255 ədəd avtobus gətirilib. Hesabatda o da qeyd olunur ki, ötən il daşıyıcıya məxsus standartlara uyğun 1 yeni qaraj istifadəyə verilib. Bütövlükdə isə hazırda ölkədə 9 belə qaraj fəaliyyət göstərir ki, bunun da 2-si dövlətə, 7-si isə daşıyıcılara məxsusdur.
Yeri gəlmişkən, son illər ölkə Prezidentinin birbaşa tapşırığı ilə 1044 ədəd orta və iritutumlu sərnişin avtobusu alınaraq Bakı şəhərinin marşrut şəbəkəsində istismara buraxılıb. Yeni alınan avtobusların 76 faizi “Avro-6” standartına uyğun ekoloji baxımdan təmiz sıxılmıştəbii qaz mühərriklidir. Beləliklə, bu sahədə həyata keçirilən məqsədyönlü tədbirlər nəticəsində son 7 ildə paytaxtın avtobus parkının 61 faizi yenilənib. Onu da qeyd edək ki, hazırda paytaxtda gündəlik təxminən 650 min nəfərdən artıq sərnişin avtobuslardan istifadə edir. Hər bir sərnişin isə haqlı olaraq həmişə rahat, komfort avtobuslardan istifadə etmək istəyir.
Sevindirici haldır ki, indi paytaxt Bakının küçə və prospektlərində şütüyən müntəzəm xətt avtobuslarının əksəriyyəti komfort şəraitinə görə seçilir. Belə avtobuslar dizayn baxımından zövq oxşamaqla yanaşı, sərnişindaşıma üçün də olduqca əlverişlidir. Bununla belə, Bakıda hələ də bir sıra marşrutlar üzrə köhnə və yararsız avtobusları müşahidə etmək mümkündür. Həmin nəqliyyat vasitələrinin tez-tez xarab olub sıradan çıxması isə əvvəlcədən tərtib olunmuş qrafiklərin pozulmasına, avtobusların hərəkətində intervalların artmasına gətirib çıxarır. Bu da sərnişinlərin haqlı narazılığına səbəb olur.
Təkcə onu qeyd etmək kifayətdir ki, hazırda Bakıda 2 min 100 avtobus sərnişindaşıma sahəsində fəaliyyət göstərir ki, onların da müəyyən hissəsini istismar müddəti bitmiş köhnə nəqliyyat vasitələri təşkil edir. Ekspertlərin fikrincə, bu, paytaxtın sərnişin axınını qarşılamaq üçün kifayət etmir. Müasir nəqliyyat infrastrukturunu qurmaq üçün isə Bakının 5 min avtobusa ehtiyacı var. Regionlarda isə bu sahədə vəziyyət daha acınacaqlıdır. Bir sıra iri şəhərlərin avtobus parkları bərbad vəziyyətdə olduğundan sərnişinlərə keyfiyyətli xidmətin göstərilməsi imkan xaricindədir.
Yeri gəlmişkən, Nazirlər Kabinetinin 2019-cu il 4 mart tarixli qərarına əsasən, paytaxtda müntəzəm marşrut xətləri üzrə istismarda olan avtobuslar sıxılmıştəbii qaz və elektirik mühərrikli nəqliyyat vasitələri ilə əvəz edilməlidir. Bundan da məqsəd ətraf mühitin qorunması və havanın çirklənməsinin qarşısının alınmasından ibarətdir.
Xatırladaq ki, Avropada təmiz, alternativ yanacaqlı avtobusların geniş miqyaslı tətbiqini təşviq etmək üçün Təmiz Avtobus Bəyannaməsi imzalanıb. Belə ki, dünya yollarında hərəkət edən avtobusların, təqribən, yarısı növbəti beş il ərzində tamamilə elektriklə işləyən nəqliyyat vasitələrinə keçidi planlaşdırılır. Artıq ölkəmizdə də bu sahədə müəyyən tədbirlərin həyata keçirilməsinə başlanılıb. Azərbaycan Respublikası Prezidentinin məlum sərəncamı ilə təsdiq edilmiş “Azərbaycan 2030: sosial-iqtisadi inkişafa dair Milli Prioritetlər”də təmiz ətraf mühitə nail olmaq və “yaşıl artım” ölkəsinə çevrilmək kimi hədəflər müəyyənləşdirilib. Adıçəkilən sənəddə ekoloji cəhətdən təmiz nəqliyyat vasitələrinin təşviqini gücləndirmək üçün bir sıra tədbirlər nəzərdə tutulur.
Həmin tədbirlərin davamı olaraq bu yaxınlarda Bakı şəhərinə ilk elektrik mühərrikli avtobus gətirilib. Dünyanın aparıcı elektrik mühərrikli avtobusların istehsalçısı olan Çinin BYD şirkətindən test məqsədilə alınan həmin avtobus 12 metrlikdir. 33 oturacağı olan avtobusun ümumi sərnişin tutumu 82 nəfərdir. Batareya gücü 383 kilovat-saat olan avtobus tam enerji dolumunda 350 kilometr məsafə qət edə bilir.
Azərbaycan Yerüstü Nəqliyyat Agentliyinin məlumatına görə, test müddətində elektirik avtobusunun Bakı şəhərinin mövcud relyefinə uyğunluğu yoxlanılaraq qiymətləndirilməsi aparılacaq. Testin nəticələrinə əsasən, elektrik mühərrikli avtobusların Bakı şəhərinin ictimai nəqliyyatında tətbiqi ilə bağlı təklif hazırlanaraq hökumətə təqdim ediləcək.
Mirbağır YAQUBZADƏ, “Xalq qəzeti”