Gimnastlarımız 2024-cü ildə dünya çempionatlarında 9 medal qazanıblar. İdmançılarımız bu uğuru qeyri-olimpiya növlərində əldə ediblər.

Olimpiya oyunları ilində bədii və idman gimnastikası, eləcə də batut gimnastikası üzrə dünya çempionatları keçirilmədiyindən, bu il yalnız akrobatika və aerobika mundialları təşkil edilib. Gimaraeşdə (Portuqaliya) keçirilən akrobatika üzrə dünya çempionatında əvvəllər fəxri kürsüyə qalxmayan Azərbaycan komandası bu dəfə 8 medal qazanaraq rekorda imza atıb. Akrobatlarımız ümumi hesabda 3-cü yeri tutublar.

Millimizin üzvləri Murad Rəfiyev – Daniel Abbasov kişilər dueti qarışıq və balans hərəkətlərində 1-ci olub, tempdə bürünc medal əldə edib. Ağasif Rəhimov – Raziyə Seyidli qarışıq cütlüyü də 2 qələbə (qarışıq və balans hərəkətlərində) qazanıb, tempdə 3-cü olub.

Seymur Cəfərov, Abdulla Əl-Meşaihi, Rəsul Seyidli və Riad Səfərovdan ibarət kişilərdən ibarət qrup templə hərəkətdə 3-cü yeri tutub. Millimiz komanda yarışında isə gümüş medal qazanıb.

Riminidə keçirilən aerobika üzrə Dünya çempionatında Vladimir Dolmatov – Mədinə Mustafayeva qarışıq cütlüyü gümüş mükafat qazanıb.

L.QURBANOVA
XQ