Azərbaycan Cüdo Federasiyasının (ACF) təşkilatçılığı ilə ilk dəfə cüdonun kata növü üzrə 18 yaşa qədər yeniyetmələr arasında ölkə birinciliyi keçirilib.
Yarışda 12 cütlük (Tori və Uke) katanın “Nage no Kata” növündə fəndləri nümayiş etdirib. Turnirdə Türkiyə Cüdo Federasiyasının (TCF) Təhsil Direktoru, Avropa Cüdo Birliyinin (ACB) Kata Komissiyasının üzvü Mehmet Yılmaz və TCF-nın təhsil mütəxəssisi Gökhan Çelik də iştirak ediblər.
ACF-in icraçı vitse-prezidenti Rəşad Rəsullu kata üzrə ölkə birincilinin təltifetmə mərasimində çıxış edərək yarışda iştirak edən idmançılara uğurlar arzulayıb və qalib olan idmançıları təbrik edib:
–Kata üzrə bu cür yarışların təşkil edilməsi, cüdo idman növünün daha əsaslı bir şəkildə inkişaf etməsinə zəmin yaradır. Son dövrlərdə Azərbaycan cüdoçularının beynəlxalq arenalarda göstərdikləri nəticələrlə yanaşı, Azərbaycan Cüdo Federasiyasının təhsillə əlaqədar fəaliyyəti, gələcəkdə Azərbaycan cüdosunda daha da yaxşı nəticələrin əldə edilməsinə töhfə verəcək.
Yarışda iştirak edən idmançıların məşqçilərinin Beynəlxalq Cüdo Federasiyası (BCF) Akedemiyasının məzunları olması xüsusi qeyd edilib:
–Bu gün yarışa qatılan yeniyetmələrin məşqçilərinin hər biri BCF Akademiyasında məşqçilik sertifikatı proqramını uğurla başa vurub. Bu onu göstəricisidir ki, BCF Akademiyası ilə qurulmuş əməkdaşlıq əlaqələri öz nəticələrini verir.
TCF-nın Təhsil Direktoru, ACB-nin Kata Komissiyasının üzvü Mehmet Yılmaz Azərbaycan cüdosunda təhsillə bağlı həyata keçirilən fəaliyyətlərin mühüm rolunu vurğulayıb:
–Azərbaycanda təhsillə bağlı həyata keçirilən fəaliyyətləri yaxından izləyirik. İnanırıq ki, bu sahədə görülən işlər Azərbaycan cüdosunun inkişafında mühüm rol oynayacaq və cüdoçuların gələcəkdə beynəlxalq arenalarda daha böyük uğurlar qazanmasını gətirib çıxaracaq.
Qeyd edək ki, yekun nəticələrə görə, Sadiq Abdullayev (Tori), Rəcəb Əkbərov (Uke) qızıl medal qazanıblar. Cavanşir Comərdov (Tori) Fazil Hüseynov (Uke) cütlüyü gümüş, Ayxan İslamlı (Tori), İsmayıl Rəhimli (Uke), həmçinin Rəsul Əmirzadə (Tori), Elvin Məmmədov (Uke) bürünc mükafatlara sahib olublar.
L.SABİRQIZI XQ