Start ayını yaşadığımız və idman dünyasında XXXlll Yay Olimpiya Oyunları ilə əlamətdar olacaq 2024-cü ilin birinci yarısı artıq arxada qalıb. Beynəlxalq Olimpiya Komitəsinin (BOK) bayrağı altında birləşən 200-dən çox ölkə iyulun 26-dan avqustun 11-dək keçiriləcək Paris Olimpiadasına mümkün qədər çox lisenziya qazanmaq, ümumdünya idman bayramında geniş nümayəndə heyəti ilə təmsil olunmaq əzmindədir. Qarşıdakı yarım il olimpiya təsnifat yarışları və reytinq xarakterli turnirlərlə zəngindir. Kəsgin rəqabətdə milyonlarla idman pərəstişkarı çox maraqlı hadisələrin şahidi olacaq.
Fransa paytaxtında keçiriləcək Olimpiya oyunları Azərbaycan idmançıları üçün ikiqat məsul startlara çevriləcək.
Komandamızın dünya idmanının ən ali yarışlarında uğurlu çıxışları Azərbaycanda olimpiya hərəkatı rəhbərliyinin gərgin və məqsədyönlü fəaliyyətinin nəticəsidir. İdmançılarımız ən çox medalı 2016-cı il Olimpiadasında qazanmışlar. Həmin il əfsanəvi Pelenin vətəni Braziliyanın Bakı ilə qardaşlaşmış Rio-de-Janeyro (portuqal dilindən tərcüməsi “Yanvar çayı” deməkdir – O.B.) şəhərində təşkil edilən XXXI Olimpiya Oyunlarında Azərbaycan təmsilçilərinə birdən-birə 18 medal – 1qızıl, 7 gümüş və 10 bürünc mükafat təqdim olunmuşdu. Bizim üçün rekord göstərici idi!
Ölkəmizin idmançıları 2024-cü ili Olimpiadaya 9 vəsiqə ilə qarşılamışlar. Bu, böyük rəqəm deyil. Amma qarşıdakı yarım ildə lisenziya xarakterli yarışlar çox olacaq. Deməli, təsnifat turnirlərindən sonra sınaq və şöhrət meydanı olan olimpiya startlarında ustalığı nümayiş etdirmək imkanı verən vəsiqələrin sayının qat-qat artacağına inamımız böyükdür. Burada qeyd edək ki, güləşçilərin Avropa olimpiya təsnifat turniri aprelin birinci ongünlüyündə Bakıda keçiriləcəkdir. Mayda isə bu növün nümayəndələri İstanbulda dünya olimpiya təsnifat turnirində qarşılaşacaqlar.
Azərbaycan idmanı nümayəndələrindən Olimpiadaya ilk 9 vəsiqəni güllə atıcısı Ruslan Lunyov, boksçular Murad Allahverdiyev (80 kq), Məhəmməd Abdullayev (+92 kq), yüngül atletikanın çəkictullama növündə Anna Skidan, bədii gimnastikada Zöhrə Ağamirova, sərbəst üsulla güləşən Maqomedxan Maqomedov (97 kq), yunan-Roma güləşi ustaları Sənan Süleymanov (77 kq), Həsrət Cəfərov (67 kq) və taekvondoçu Qaşım Maqomedov (58 kq) qazanmışlar.
Görək növbəti lisenziyalara nə vaxt, hansı növlərdə sevinəcəyik. Azərbaycanın idman həvəskarlarının ən çox olimpiya vəsiqəsi gözlədikləri növlər ilk növbədə güləş, cüdo və boksdur. Bu növlər olimpiyaçılar komandamızın əsas silahı, mükəmməl zərbə qüvvəsidir. Ən yaxşı güləşçilərimiz, tatami və rinq ustalarımız olimpiadalarda fəxri kürsüyə yüksəlməyin yolunu daha yaxşı bilirlər. Səkkiz il əvvəl Rio Olimpiadasından vətənimizə 1 qızıl və 1 bürünc medal gətirmiş taekvondoçular, eləcə də digər növlərin nümayəndələri də Fransa paytaxtının idman meydanlarında yarışıb, yüksək nəticələr göstərmək əzmindədirlər. Medallara yol isə ağır lisenziya sınaqlarından keçir, əvvəlcə mümkün qədər çox olimpiya vəsiqəsi qazanmaq lazımdır…
Şahmat Olimpiya oyunları proqramına daxil deyil. Ancaq zəka sahiblərinin də öz olimpiadaları var. Bu il onlar üçün də çox ciddi imtahan ilidir. Payızın birinci ayında qrossmeysterlər 45-ci Ümumdünya Şahmat Olimpiadasının medalları uğrunda mübarizə aparacaqlar. Sentyabrın 10-dan 23-dək Macarıstanın paytaxtı Budapeştdə keçiriləcək bu yarışda, əlbəttə ki, Azərbaycanın həm kişilərdən, həm də qadınlardan ibarət komandaları da iştirak edəcəklər. Qədim oyun pərəstişkarlarımız, həmişəki kimi, Olimpiada görüşlərini böyük maraqla gözləyir və ümidlə yaşayırlar desək, yəqin ki, səhv etmərik.
Oqtay BAYRAMOV,
Əməkdar jurnalist