Üç məqam bu tarixə xüsusi rövnəq verir. Əvvəla, Azərbaycan Kuboku turnirinin “Qarabağ” (Ağdam) – MOİK səkkizdəbir final görüşü erməni tapdağından azad edilib, müasir standartlara uyğun təmir işlərindən sonra yenilənmiş, milli rəmzlərimizlə göz oxşayan, şübhəsiz, bundan sonra da hələ çox dəyişib, ən yüksək tələblər səviyyəsinə çatdırılacaq Xankəndi şəhər stadionunda keçiriləcəkdir.
İkincisi, çox dərin rəmzi məna daşıyır ki, şahidi olmağa tələsdiyimiz oyunda təqvimin hökmü və ya səxavəti ilə rəqiblərdən biri “Qarabağ” adını şərəflə, fəxarətlə daşıyan klub, digəri isə ərazilərimizi işğaldan azad etmiş qəhrəman hərbçilərimizin komandası – Mərkəzi Ordu İdman Klubudur.
Üçüncü məqam. Hər bir azərbaycanlının qürur duyduğu “Qarabağ” Xankəndiyə tarixi zəfərlə gedib. Bir həftə əvvəl bütün Azərbaycanı böyük nailiyyət – UEFA Avropa Liqası turnirinin 1/16 finalına və ya bahar sınaqlarına vəsiqə ilə ürəkdən sevindirmiş bu qoçaq komanda çox mötəbər yarışda qrupdan çıxıb, pley-off mərhələsinə yüksələn ilk klubumuz olması ilə haqlı olaraq fəxr edə bilər.
Bir daha Ağdam komandasına təşəkkürümüzü bildirək. Onun oyunçuları soyuq 14 dekabr axşamında İsveçin Geteborq şəhərinin “Hekken” komandasına son iki ayda ikinci dəfə qalib gəlməklə “Tofiq Bəhramov” stadionunun tribunalarına toplaşan on minlərlə azarkeşi, eləcə də oyunu teleekran qarşısında izləyən milyonlarla həmvətənimizi bir andaca hamılıqla ayağa qaldırdılar. Ölkənin sevinci hədsiz idi!
Avroliqa mövzusunda qeydlərimizi davam etdirib, onu da xatırladaq ki, dekabrın 18-də İsveçrənin Nyon şəhərində keçirilmiş püşkatma mərasimində Azərbaycan çempionunun bəxtinə Portuqaliyanın “Braqa” klubu düşmüşdür. Kriştianu Ronaldunun həmvətənləri ilə qarşılaşacağıq. Olsun! Oyundan-oyuna böyüyən “Qarabağ”ın da hər hansı komandaya layiqli rəqib olduğunu artıq Avropada bilməyən futbol adamı yoxdur. Gələn il fevralın 15-də Portuqaliyada, 22-də isə Azərbaycanda keçiriləcək oyunlardan sonra bu iki klubdan biri səkkizdəbir final sevinci yaşayacaq. Erkən baharın astanasında tale hansı xoşbəxt komandanın üzünə güləcək? “Qarabağ” bir daha sağ olsun ki, onun qitəmizin sayılıb-seçilən komandalarından biri olduğuna heç kimdə şəkk-şübhə qalmayıb. Deməli, imkanlar bərabərdir.
Ölkə çempionumuz təxminən 35 ildir ki, Azərbaycan futbolçularının ayağı dəyməyən stadionun meydançasına çıxdıqda tribunaları necə gurultulu alqış sədalarının bürüyəcəyini təsəvvür etmək çətin deyil. Futbolumuzu beynəlxalq meydanda ləyaqətlə təmsil edən komandaya azarkeş rəğbəti gündən-günə artır. Böyük xoşbəxtlikdir. Gözləntilərimiz də getdikcə böyüyür. Qarşıda hələ çox uğurlara şahidlik edəcəyik. Bizdə bu inamı “Qarabağ”yaratmışdır.
Futbol ictimaiyyətimiz üç gün əvvəl püşkatma mərasimini böyük maraq və həyəcanla izlədi. İndi isə hamı “Braqa” ilə iki raunddan ibarət döyüşü səbirsizliklə gözləyəcək. Həm də, təkrar edək, böyük ümidlə.
Hələlik isə “Qarabağ” Xankəndidədir. Komanda bu tarixi səfərə Azərbaycan Premyer Liqasının turnir cədvəlində vahid lider kimi yola düşmüş və növbəti dəfə çempionluğa doğru inamla irəliləyir.
Bu gün futbol həvəskarlarına dost-rəqiblərin görüşündən zövq almağı arzulayaq. Saat 14-də hakimin “Qarabağ” və MOİK komandaları arasında Azərbaycan Kuboku yarışının səkkizdəbir final görüşünün başlandığını bildirən işarəsindən sonra Xankəndi şəhər stadionu, onun yaşıl meydanı yeni həyatla nəfəs alacaq.
Günün mübarək, Azərbaycan futbolu!
Oqtay BAYRAMOV,
Əməkdar jurnalist