Monteneqroda keçirilən Avropa çempionatında ilk dəfə gümüş medal qazanan qadın şahmatçılardan ibarət Azərbaycan yığması Vətənə qayıdıb. XQ Azərbaycan Şahmat Federasiyasına istinadən bildirir ki, Heydər Əliyev Beynəlxalq Aeroportunda idmançıları Gənclər və İdman Nazirliyi eləcə də Azərbaycan Şahmat Federasiyasının nümayəndələri, jurnalistlər və idmançıların yaxınları qarşılayıblar.
Şahmatçılar, məşqçilər və AŞF rəsmiləri hava limanında jurnalistlərin suallarını cavablandırıblar.
Faiq Həsənov (AŞF-nin birinci vitse-prezidenti): “Avropa çempionatında qazanılan nəticə böyük uğurdur. Qızlar ümumilikdə 15 xal toplamaqla yüksək göstərici əldə etdilər. Hətta kişi şahmatçılardan ibarət komandamız Avropa çempionu olduğu illərdə 15 xaldan az toplayıb. Son turda çempionluğun taleyini Gürcüstan və Bolqarıstan komandaları həll edirdi. Qızlar son turda qələbə qazanmaqla gümüş medala layiq görüldülər. Qitə çempionatında ikinci yer gələcəkdə komandanın daha böyük uğurlar əldə edəcəyinə ümid etməyə imkan verir”.
Mixail Şereşevski (məşqçi): “Düzünü desəm, qızıl medala inanırdım. Təəssüf, alınmadı. Komandanın hər bir üzvü çıxışından razı qalmalıdır. Gürcüstanla Bolqarıstan arasında oyun bizi çempion edə bilərdi. Qızıl medal qazanmadığımıza görə üzülürəm”.
Yevgeni Tomaşevski (məşqçi): “Hər yarışda maksimum nəticəni düşünürəm. Bu dəfə də qızıl medalı əsas hədəf sayırdım. Azərbaycan komandası qızıl medal və çempionluğa çox yaxın idi. Gümüş medal yaxşı nəticədir. Şahmatçılar xarakterləri ilə fəxr edə bilər. Bu komanda ilə işlədiyimə görə mən də fəxr edirəm. Azərbaycan komandası irəlidə böyük uğurlar qazana bilər”.
Aydın Süleymanlı (məşqçi): “İlk dəfə özümü məşqçi kimi sınadım. Maraqlı heyətdə işlədik. Avropa çempionatında qızların qazandığı gümüş medala görə hər birini təbrik edirəm. Yaxşı mübarizə sərgiləməklə heç bir rəqibdən geri qalmadıqlarını göstərdilər”.
Gövhər Beydullayeva (Avropa çempionatının gümüş mükafatçısı): “Xalqımızın göstərdiyi dəstəyi hiss edirdik. Bizə dəstək olan hər kəsə təşəkkür edirik. Ardıcıl üçüncü dəfə Vətənə Avropa çempionatından medalla qayıtmaq sevindiricidir. Növbəti hədəf qızıl medaldır”.
Gülnar Məmmədova (Avropa çempionatının gümüş mükafatçısı): “Komandamızın çıxışından razı qaldım. Bizə dəstək olan hamıya təşəkkür edirik. Həyəcanlı mübarizənin iştirakçısı olduq. Uğurların davamlı olması üçün məşqləri davam etdirəcəyik. Növbəti hədəf qızıl medaldır”.
Xanım Balacayeva (Avropa çempionatının gümüş medalçısı): “Gümüş medal hamımızı sevindirir. Sözsüz, ən yüksək nəticəyə çatmaq uğrunda yarışırdıq. Çempionluğa çox yaxın olduq. Komanda kimi mübarizə apardıq. Yarışdan əvvəl əsas hədəf çempion olmaq idi”.
Ülviyyə Fətəliyeva (Avropa çempionatının gümüş mükafatçısı): “Avropa çempionatında lider komanda kimi mübarizə apardıq. Son tura qədər liderlərdən biri olaraq yarışdıq. Hər tur komanda kimi qələbə uğrunda bütün gücümüzü nümayiş etdirməyə çalışdıq. Nəticəmizlə lider olduğumuzu sübut etdik”.
Günay Məmmədzadə (Avropa çempionatının gümüş mükafatçısı): “Bizə dəstək olduqları üçün ailə üzvlərimizə, yaradılan şəraitə görə Azərbaycan Şahmat Federasiyasına təşəkkür edirəm. Hər zama məqsədimiz ən yüksək nəticələr olub. İki il ardıcıl Avropa çempionatından bürünc medalla qayıtdıq. Bu dəfə Vətənə gümüş medalçı kimi döndük. Növbəti hədəf ən yüksək mükafat olacaq. Bizi izləməkdə davam edin”.
Qeyd edək ki, qadınlardan ibarət milli 7 turda qələbə qazanıb, bir dəfə heç-heçə edib, yeganə məğlubiyyətini isə Avropa çempionu olan Bolqarıstan yığmasından alıb.
Elçin ABBASOV
XQ