Bunu son nəticələr də sübut edir 

Müasir dövrün ən populyar idman növlərindən biri olan ağırlıqqaldırma yarışları qədim Misir, Yunanıstan və Çin dövründən məlumdur. Eramızdan əvvəl daşlardan müasir ştanqların bəzi prototiplərinin düzəldilməsi haqqında çoxlu sübutlar var. Bu qədim idman növünə Azərbaycanda da böyük maraq olub. “Odlar yurdu”nun pəhləvanları ağırlıq qaldırma üzrə ad-san çıxarıb, səs-soraqları elləri, obaları gəzib dolaşıb.

Digər idman növləri kimi, ağırlıqqal­dırmanın da kütləviliyi və inkişafı da Azərbaycanın müstəqillik dövrünə tə­sadüf edib. Nizami Paşayev 2000-ci illərin əvvəllərində dünya çempionatı­nın dördqat qalibi kimi şöhrət qazanıb. Digər ağırlıqqaldıranlarımızın dünya, Avropa çempionatlarında yüksək nəti­cələri bu idman növünün inkişafından xəbər verirdi. 2016-cı ildə Azərbayca­nın ağırlıqqaldırma üzrə yığmasının dopinqdən istifadəyə görə ağır cəza alaraq yarışlardan kənarlaşdırılması bu idman növünün inkişafını xeyli ləngitsə də, son illər yeniyetmələrdən ibarət ko­mandamızın qazandığı yüksək nailiy­yətlər güclü idmançı nəslinin yetişmə­sindən xəbər verir. 

Yeniyetmələrdən ibarət yığma ko­mandanın böyük məşqçisi Oktay Mux­tarov “XQ”yə müsahibəsində son illər əldə uşaq və yeniyetmələr arasında ağırlıqqaldırmanın kütləviliyinin artırıl­ması istiqamətində görülən işlərdən danışdı. O qeyd etdi ki, ağırlıqqaldırma çətin idman növü olduğundan onunla kiçik yaşlardan məşğul olmaq, sirlərinə yiyələnərək təcrübə toplamaq lazımdır. Bununla yanaşı, azyaşlıların effektiv çalışmaları üçün müvafiq infrastruktur qurulmalı, mütəxəssislər yetişdirilərək iş imkanı yaradılmalı, digər faktorlar nəzərə alınaraq müvafiq addımlar atıl­malıdır. Məhz bundan sonra Olimpiya zirvələrini fəth edəcək gənclərin yetiş­məsi mümkün olacaq, qələbələrə şa­hidlik edəcəyik.

Kəndlər də çempion yetişdirəcək

Məşqçi bildirdi ki, Azərbaycan Ağır­lıqqaldırma Federasiyası (AAF) son illər ölkəmizin müxtəlif regionlarındakı yeniyetmə və gənc idmançıların seçil­məsi, yığma komandaların heyətinə cəlb edilərək beynəlxalq arenalarda çıxışını təmin edib: “Azərbaycanda adətən Mərkəzi Aran, cənub və şərq zonasında ağırlıqqaldırma inkişaf etsə də, son illərdə görülən işlər bu coğra­fiyanın genişlənməsinə, ölkənin demək olar ki, bütün regionlarını əhatə etmə­sinə gətirib çıxarıb. 2009–2020-ci illər ərzində mütəmadi keçirilən zona-mər­hələ yarışlarının keçirilməsiylə Gəncə, Qazax, Goranboy, Yevlax, Zaqatala, Şamaxı, Qusar, Qobustan və digər yerlər də bu idman növündə öncüllük yarışına girə biliblər. Son bir ildə isə birbaşa federasiya rəhbərliyi tərəfindən “Kəndlər çempion yetişdirəcək” şüarı altında həyata keçirilən layihə öz müs­bət effektini verməkdədir. 2022-ci il ər­zində bölgələrdə yaradılan 20-yə yaxın yeni ağırlıqqaldırma klubları isə bu işin peşəkar statusunu daha da möhkəm­ləndirə bilib. Hazırda Azərbaycan ağır­lıqqaldırmasında yeni nəslin inkişafı üçün bütün imkanlar yaradılıb və yaxın zamanlarda bunun nəticəsini görmək mümkün olacaq”.

7 medal və Avropa rekordu

Əslində, bu nəticələr artıq var. Ötən ilin avqustunda Polşanın Raşin şəhə­rində yeniyetmələr arasında Avropa birinciliyində komandamız əla çıxışla yadda qaldı. Turan Əliyev, Qasım İs­mayılov və Ravin Alməmmədov toplam 7 medal – 1 qızıl, 3 gümüş, 3 bürünc və bir Avropa rekordu ilə tarixi nəticəyə imza atdılar. Mütəxəssisin bildirdiyinə görə, yeniyetmə idmançıların builki nə­ticələri daha böyük uğurlar vəd edir. 

Bu il yeniyetmələrdən ibarət ko­manda beynəlxalq arenalarda keçirilən yarışlarda möhtəşəm nailiyyətləri ilə diqqəti cəlb edir. Albaniyanın Dürres şəhərində yeniyetmələr arasında keçi­rilən dünya birinciliyində Ravin Alməm­mədov rekord nəticə qazanıb. Qazaxın “Göyəzən” Ağır Atletika Klubunun təm­silçisi 73 kiloqram çəki dərəcəsində 136 kiloqramla birdən, 167 kiloqramla təkanla qaldırma hərəkətlərində, top­lam 303 kiloqram (136+167) nəticə ilə isə yekun sıralamada gümüş medala sahib olub. O, həmçinin təkanla qaldır­ma 167 kiloqramı ram etməklə türkiyəli Karaca Yaşara aid 163 kiloqramlıq Av­ropa rekordunu, bu hərəkətin toplamın­da rumıniyalı Yonut Donoseyə aid 300 kiloqramlıq rekordu da geridə qoyub. 

Onlar Olimpi fəth edəcəklər

Bu ilin iyun ayında 15 və 17 yaşa­dək idmançıların Avropa birinciliyində ağırlıqqaldıranlarımızın əldə etdiklə­ri mükafatlar onların potensialını bir daha sübut edir. Moldovanın paytaxtı Kişineuda 17 yaşlı yeniyetmə oğlanlar arasında Ravin Alməmmədovun (73 kq) çıxış etdiyi bütün hərəkətlərdə qızıl medal qazanması qürurvericidir. Birdən qaldırma hərəkətində və təkanla qal­dırma hərəkətlərində qızıl medal qaza­nan idmançımız toplam 299 kiloqram (137+162) nəticə göstərərək yekun sı­ralamada da birinci yeri tutub. Koman­damızın daha bir üzvü – 15 yaşadək idmançılar arasında mübarizə aparan Hüseyn Heydərov (81 kq) da 3 qızıl medalla idman ictimaiyyətini sevindirib. 

Atletimiz də komanda yoldaşı kimi, həm birdən qaldırma, həm də təkanla qaldırma hərəkətləri üzrə fəxri kürsü­nün ən yüksək pilləsində qərarlaşıb. Toplam 257 kiloqram (118+139) nəticə göstərən H.Heydərov yekun sıralama­da da qızıl medal qazanıb. Ümumilik­də, komandamız qitə birinciliyində 8-i qızıl, 4-ü gümüş, 2-si bürünc olmaqla 14 medala sahib olub.

Oktay Muxtarovun sözlərinə görə, yeniyetmə idmançılar arasında gələcə­yin olimpiyaçıları yetişir. Məhz onların qazandıqları nailiyyətlər bunu deməyə əsas verir. 

Leyla QURBANOVA
XQ