Tamaşa məkanları – “Tofiq Bəhramov”, “Neftçi Arena” və “Bank Respublika Arena”
10 avqust 2023-cü il. Bu tarixi yaxşı yadda saxlayaq. Azərbaycan futbolunda qeyri-adi tarixdir. İndiyə qədər paytaxtımızda heç vaxt eyni gündə, üstəlik də, eyni saatlarda Avropa miqyaslı turnirlərdə üç oyun olmamışdı və yəqin ki, bu hal bir daha təkrarlanmayacaq. Görünür, futbolumuzun 112 illik tarixinə belə bir gün də yazılmalıymış…
Fakt artıq bu axşam gerçəkləşəcək. Bizə isə səbrli olub, bütün diqqətimizi unudulmaz hakimimiz Tofiq Bəhramovun adını daşıyan Respublika Stadionuna, “Neftçi Arena”ya və Masazır qəsəbəsindəki “Bank Respublika Arena”ya yönəldərək, hər üç komandamızı—“Qarabağ”, “Neftçi” və “Sabah”ı yaxından-uzaqdan yorulmadan, ürəkdən dəstəkləmək qalır.
Çempionlar Liqası turnirinin ikinci təsnifat mərhələsində Polşanın “Rakuv” klubu ilə mübarizədə “büdrəyən” və hazırda Avropa Liqasının üçüncü raund “döyüşləri” ərəfəsində olan Azərbaycan çempionu və avrokubokların qrup mərhələlərinin daimi iştirakçısı Ağdam komandası indi Finlandiyanın HİK (Helsinki) klubu ilə üz-üzə gələcək.
Polyaklarla rəqabətdə qeydə alınmış uğursuzluq “Qarabağ”ın sıralarında çaşqınlıq, ruh düşkünlüyü yarada bilməz. Çempion komandanın hər bir oyunçusu da, məşqçisi də, azarkeşi də yaxşı bilir ki, futbol gözlənilməz nəticələrlə zəngin oyundur, heç kim, hətta nəhəng klublar da uğursuzluqdan sığortalanmayıblar.
Deməli, dəfələrlə Azərbaycan çempionu və avrokubokların qrup mərhələsinin iştirakçısı son 15 ildə onu Avropaya yaxından tanıtmış baş məşqçi Qurban Qurbanovun rəhbərliyi ilə Finlandiya təmsilçisini mübarizədən kənarlaşdırıb, Avroliqada yoluna davam edə bilər. Bu yolda ilk addım bu axşam “Tofiq Bəhramov”da atılacaq. Ümid edək ki, sevinən tərəf biz olacağıq.
“Neftçi Arena”. Konfrans Liqasının üçüncü təsnifat mərhələsinin ilk oyunu. Həm də, qardaş ölkə komandalarının görüşü. “Neftçi” Bakı—“Beşiktaş” İstanbul. Rumıniyalı yeni baş məşqçimiz Adrian Mutunun komandası zəngin təcrübəli mütəxəssis Şenol Günəşin futbolçularına qarşı. Gözəl futbol vəd edən oyun. Saat 21-ə təyin edilmiş görüşdə ədaləti başda Lukas Fendrix olmaqla İsveçrə Futbol Federasiyasının hakimləri qoruyacaqlar. Onlara da, dost-rəqiblərə də məzmunlu oyun arzu edirik.
Elə buradaca zamanı bir qədər qabaqlayıb, avqustun 17-də İstanbulda keçiriləcək “Beşiktaş”–“Neftçi” cavab görüşünün avstriyalı Yulian Vaynbergerin başçılığı ilə qadın hakimlər briqadasına tapşırıldığını da diqqətə çatdıraq.
Masazırdakı “Bank Respublika Arena”da da bayram əhval-ruhiyyəsi yaşanır. “Konfrans”a Latviyanın kurort şəhəri Yurmalada özü haqqında kifayət qədər mübariz kollektiv təəssüratı yaratmış RFŞ komandası üzərində qələbə ilə başlayıb, sonra da bu uğuru Bakıda təkrar edən “Sabah” bu dəfə daha zəhmli rəqib—“Partizan” qarşısında imtahan verəcək. Belqrad klubunun təkcə vətəni Serbiyada yox, bütün Avropada yaxşı nüfuz sahibi olduğu isə heç kimə sirr deyil.
Bu komandaların Masazır qarşılaşmasının hakimliyi Georgi Kruaşvilinin başçılığı ilə gürcüstanlı hakimlər briqadasına həvalə olunmuşdur. Bu soyad mənə keçmiş SSRİ çempionatlarında dəfələrlə Bakıda “Neftçi”nin oyunlarında gördüyümüz və yaddaşımızda yaxşı bir hakim kimi qalmış tbilisili beynəlxalq dərəcəli hakim Karlo Kruaşvilini xatırladır. Bəlkə də, 37 yaşlı Georgi onun oğludur. O da ədalətli hakim kimi tanınır.
Təsəvvür etmək olar, Azərbaycanın bütün futbol pərəstişkarları bu axşamı necə böyük həyəcanla gözləyirlər. “Qarabağ”, “Neftçi” və “Sabah”a da elə möhkəm azarkeş fəallığı lazımdır. Onlar ölkə futbol ictimaiyyətinin böyük dəstəyi ilə öz sözlərini demək, avqustun 17-də Helsinki, İstanbul və Belqradda keçiriləcək cavab oyunları qarşısında ümumi müvəffəqiyyət üçün yaxşı zəmin yaratmaq əzmindədirlər…
Oqtay BAYRAMOV,
Əməkdar jurnalist