Ümummilli lider Heydər Əliyevin anadan olmasının 100 illik yubileyinə həsr olunmuş “Əziz Şuşa” beynəlxalq velosiped yarışı davam edir.
Turnirin dördüncü mərhələsində velosipedçilər Gəncədən mübarizəyə başlayıblar. 12 komandanın 74 idmançısı Gəncədə təyin olunmuş marşrut üzrə dövrə vurduqdan sonra Göygöl Milli Parkına qədər 102,9 km məsafə qət ediblər.
Yekun nəticəyə görə, birinci yeri İtaliyanın “Team Technipes İnemiliaromagna” komandasının velosipedçisi Alessandro Monaco tutub. İkinci yerdə İtaliyanın digər velosipedçisi Emanuele Ansaloni, üçüncü pillədə idə Qazaxıstan komandasının üzvü Rudolf Remkhi qərarlaşıblar.
Yarışda üç mərhələnin lideri sarı və iki yaşıl köynəyin sahibi italiyalı Emanuele Ansaloni olub. Ən yaxşı dağ velosipedçisi Azərbaycan komandasının üzvü Samir Cəbrayılov, ən yaxşı gənc idmançı isə Qazaxıstan komandasının üzvü Rudolf Remkhi seçiliblər.
Yarış bitdikdən sonra qaliblərin mükafatlandırma mərasimi keçirilib.
Qeyd edək ki, idmançılar iyunun 11-də Beyləqan–Şuşa marşrutu üzrə 134,9 kilometr məsafəni qət edəcəklər.
L.QURBANOVA, “Xalq qəzeti”
