Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyinin dəstəyi və Naxçıvan Şəhər İcra Hakimiyyətinin təşkilatçılığı ilə Naxçıvan şəhərinin mərkəzi küçələrində və digər ərazilərində 1000 ədəd “Xan çinar”ı ağacının və 300 ədəd akasiya ağacının əkilməsinə başlanılıb. Bu məqsədlə xüsusi şəraitdə yetişdirilmiş beş yaşı olan “Xan çinar” ağacları Naxçıvan şəhərinə gətirilib. Artıq Naxçıvan şəhərində yerləşən Zəfər parkında, Əcəmi seyrəngahı Mədəniyyət və İstirahət Kompleksində, Heydər Əliyev prospektində, Cəlil Məmmədquluzadə, İstiqlal və Nizami Gəncəvi küçələrində və şəhərin digər ərazilərində 600-dən artıq ağacın əkini həyata keçirilib.

Hazırda ağacların Naxçıvan şəhərinin əsas küçələrindən olan Əziz Əliyev küçəsində əkini davam etdirilir. Naxçıvan şəhərinin mərkəzi küçələrində və digər ərazilərində 1300 ədəd ağacın əkilməsi nəzərdə tutulur.

Qeyd edək ki, “Xan çinar”ı Azərbaycanın “Qırmızı Kitab”ına daxil edilib və dünyanın ən uzunömürlü ağaclarından sayılır. Adətən bu ağaclar 1000-1500 il ömür sürür. Əzəmət və ucalıq rəmzi hesab edilən “Xan çinar”larının hündürlüyü 25-30 metrə, bəzi hallarda isə 50 metrə çatır. Yeni əkilmiş ağaçlar şəhərə gözəllik bəxş etməklə yanaşı, isti havalarda sakinlərin istirahətinə də şərait yaradacaq.

Səbuhi HƏSƏNOV

XQ