Ölkəmizin 14 önəmli təklifi beynəlxalq aləmdə ciddi müzakirələr doğurub

Azərbaycan energetika nazirinin müavini, bu ilin noyabr ayında Bakıda keçiriləcək COP29-un baş katibi Elnur Soltanov Türkiyənin “Anadolu” agentliyinə müsahibəsində bildirib ki, konfransda milli, regional və qlobal səviyyəli məsələlər müzakirə olunacaq və əsas mövzu isə iqlim maliyyəsi olacaq.

E.Soltanov qabaqcıl dövlətlərin inkişaf etməkdə olan ölkələrə daha çox yardım göstərməsinin COP29-un gündəmində olacağını bildirib: “Dünyanın istixana qazı emissiyalarının, təxminən, 4 faizi Afrika qitəsinin payına düşür. Bununla belə, iqlim dəyişikliyindən ən çox ziyanı bu qitə çəkir.

İstixana qazları emissiyalarını və iqlim dəyişikliyinin təsirlərini azaltmaq üçün in­kişaf etməkdə olan ölkələrə maliyyə dəstə­yi göstərilməlidir. Hazırda 100 milyard dollar həddində olan iqlim maliyyələşmə­sini artırmaq üçün ciddi danışıqlar aparılır. COP29-da bununla bağlı qərar qəbul edilə­cəyinə ümid bəslənilir”.

COP29-un baş katibinin sözlərinə əsasən, Azərbaycan bu məsələ ilə bağlı 14 təklif irəli sürüb. Bu təkliflərin reallaşdı­rılması üçün bəzi ölkələr və ya şirkətlərlə müzakirələr aparılacaq. Azərbaycanın tək­lifi ilə müzakirə ediləcək məsələlər arasın­da iqlim maliyyəsi, enerji, kənd təsərrüfa­tı, su ehtiyatları, turizm, rəqəmsallaşma, “yaşıl” şəhərlər və insan resursları da var. Olimpiadada olduğu kimi, bütün dünyada atəşkəsə çağıracağıq”, – o qeyd edib. 

E. Soltanov bildirib ki, COP29 Azər­baycanın indiyədək evsahibliyi etdiyi heç bir beynəlxalq tədbirlə müqayisəyə gəlməyəcək bir konfrans olacaq. Ölkəmiz iqlim danışıqlarına rəhbərlik edəcək və bu məsələ ilə bağlı fəaliyyəti nümayiş etdirə­cək. Biz Azərbaycanın qonaqpərvərliyini göstərəcək, dövlət qurumlarının, şirkətlə­rin və qeyri-hökumət təşkilatlarının koor­dinasiyalı fəaliyyəti ilə keyfiyyətli təşkilat­çılıq həyata keçirəcəyik. 

Xatırladaq ki, BMT-nin İqlim Də­yişikliyi üzrə Çərçivə Konvensiyasının (COP29) Tərəflər Konfransının 29-cu sessiyası bu ilin noyabrında Azərbaycan­da keçiriləcək. İki həftə ərzində dünyanın mərkəzinə çevrilən Bakı 70-80 minə yaxın xarici qonaq qarşılayacaq. 

Birləşmiş Millətlər Təşkilatının İqlim Dəyişikliyi üzrə Çərçivə Konvensiyası 1992-ci ilin iyununda Rio-de-Janeyroda keçirilən Yer Sammitində insanın iqlim sisteminə təhlükəli müdaxiləsinin qarşısı­nı almaq üçün imzalanmış sazişdir. "COP" (Conference of Parties) abbreviaturası İqlim Dəyişikliyi üzrə Çərçivə Konven­siyasının icrasına nəzarət edən ən yüksək qanunverici orqan olan “Tərəflərin Konf­ransı” mənasını verir.

Konvensiyada 198 ölkə iştirak edir. Tərəflər başqa cür razılaşmırsa, COP hər il keçirilir. İlk COP tədbiri 1995-ci ilin mar­tında Berlində reallaşıb və katibliyi Bon­nda yerləşir.