Ermənistanın baş naziri Nikol Paşinyan Qarabağın Ermənistan ərazisi olmadığını və ermənilərin bu ərazi uğrunda hərəkatının “ölümcül bir səhv” olduğunu, hazırda İrəvan Azərbaycanla sülhü möhkəmləndirdiyini və Aİ-yə doğru qətiyyətli bir kurs yürütdüyünü bildirib.

Məlumatı "Euronews" verib.

Baş nazir bu bəyanatı ilə ölkə daxilində və xaricdə erməni cəmiyyətini heyrətləndirib. Bazar günü Ermənistan mediasında geniş yayılmış maraqlı bir videoda Paşinyan Ermənistanın Qarabağı “itirdiyi” iddialarına cavab olaraq dəfələrlə “Bu torpaq necə bizim oldu? Necə oldu ki, bizim oldu? Zəhmət olmasa, izah edin ki, necə oldu ki, bizim oldu?” - sualını verib.

Baş nazir Qarabağla bağlı onilliklər boyu davam edən erməni milli rəvayətinə qarşı çıxaraq deyib: “Mən həlak olanların xatirəsini təhqir etmək istəmirəm, amma gəlin bunu belə deyək: bu torpaqlar bir neçə generalın nəzarəti altında idi. Bəs orada harada buğda əkiblər? Biz orada mətbəə, uşaq bağçası, fabrik tikmişikmi? Biz orada yaşamışıqmı? Biz orada yaşayış məntəqəsi yaratmışıqmı? Onlar bizim deyildi”.

Ermənistanın Baş naziri Qarabağla bağlı onilliklər boyu davam edən faciələrdən sonra Azərbaycanla tarixi sülh prosesini davam etdirmək qərarını vurğulayıb.

P.ƏMİRCANOV
XQ

Bizi Telegram-da da izləyə bilərsiniz: @xqazeti