Parisin “soyuq müharibə” dövründə təxirə saldığı zəruri dəyişikliklər, nəhayət, üç onillikdən sonra öz boğazına çökməkdədir. Keçmiş Qərbi Fransa Afrikası “Köhnə qitə”dən kənarda yeni müttəfiqlər axtarır. Bu axtarışlar həm də Fransanın əsrlərlə davam edən əsarətindən qurtulmaq üçün baş verən hərbi çevrilişlərlə müşahidə edilir. Mali, Çad, Burkino-Faso, Niger, Qabon – müvafiq olaraq 2021, 2021, 2022, 2023 və 2023-cü illərdə baş verən çevrilişlər. Bu hadisələr aydın şəkildə göstərdi ki, Fransanın, bəzi Qərb dövlətləri kimi Afrikada öz mövqeyini qoruyub saxlamaq üçün nəinki hazır resepti, əslində heç zərrə qədər haqqı belə qalmayıb.
Aparıcı Qərb ölkələrinin kolonial surətdə istismar etdikləri Afrikada düşdükləri qeyri-müəyyən vəziyyət onların inkişaf etməkdə olan ölkələrlə bağlı siyasətinin ənənəvi təsir alətlərinin tam tükəndiyini nümayiş etdirir. Fransanın bu regionda postkolonial təsir sisteminin dərin böhran içində olduğu ortadadır. Çünki Paris başqa Qərb müstəmləkəçiləri ilə müqayisədə Afrikada çox uzun müddətə qaldı və bunun da səbəbləri aydındır.
Avropa müstəmləkə imperiyaları içərisində yeganə ölkə Fransadır ki, Afrika və Asiya xalqlarını qarət etməklə böyük sərvətlərə sahib olsa da, o məkandan ayrıldıqdan sonra belə, regionda təkcə iqtisadi məsələlərə deyil, həm də yeni suveren dövlətlərin inkişafının əsas məsələlərinə təsir imkanlarına malik siyasi infrastrukturunu yarada bilib. Regionun aparıcı beynəlxalq təşkilatları olan Qərbi Afrika Ölkələrinin İqtisadi (ECOWAS) və ya Qərbi Afrika İqtisadi və Valyuta birliklərinin müxtəlif vaxtlarda məhz Fransanın dəstəyi ilə yaradılması faktdır və bu təşkilatlar bu gün də Parisin himayəsi altında çalışırlar.
Bununla yanaşı regionun bir sıra ölkələrində, o cümlədən Seneqal, Qabon, Çad, Kot-d'İvuar və Nigerdə Fransanın mövcudluğu hərbi bazaların və heyətlərin yerləşdirilməsi ilə təsdiqlənir. Ümumiyyətlə, bölgənin son 40-50 illik tarixindən keçmiş metropolun birbaşa hərbi müdaxiləsinə dair çoxlu nümunələr gətirmək olar.
Bu işdə Paris həmişə müstəmləkəçilik “tort”unun ən ləzzətli tikəsini avropalıların əlindən almağa çalışsa belə, bəzi hallarda özünün Avropa “əlaltılarına” birbaşa zorakılığın həyata keçirilməsini həvalə edən ABŞ-ın dəstəyindən istifadə edib. Paris 1960-cı illərin ortalarından başlayaraq, bu rolu kifayət qədər uğurla oynayır və müasir iqtisadiyyat üçün çox zəruri olan təbii ehtiyatlara inhisarçılıqdan əhəmiyyətli iqtisadi faydalar əldə edir. Məsələn, ikinci Avropa nəhəngi Almaniyanın xeyli pula almalı olduğu xammalı Fransa Afrikadan, demək olar ki, qəpik-quruşa çəkib aparır.
Fransa müstəmləkəçiliyinin monitar silahı
Çox maraqlı məqamlardan biri də budur ki, əvvəldə qeyd etdiyimiz dövlət çevrilişləri, valyuta sistemləri məhz Parisin nəzarətində olan Afrika ölkələrində – Mali, Çad, Burkina-Faso, Niger, Qabonda baş verib. Coğrafi yaxınlıqdan əlavə, bu ölkələri zəngin fransız dili, vahid müstəmləkə imperiyasının bir hissəsi kimi keçmiş və hazırkı mövcudluğunun “yadigarı” olan CFA frank pul sistemi birləşdirir. Afrika və Asiyanın başqa yerlərində belə bir şey yoxdur: müstəqil ölkələr altı onillikdir ki, öz pullarını çap etmək, lazım gələrsə, onu devalvasiya etmək imkanından məhrum olublar və öz monitar siyasətlərini həyata keçirmək üçün bilavasitə Avropa Mərkəzi Bankından asılıdır. Parisin əlində müstəmləkəçiliyin əsas silahlarından biri də məhz budur.
Necə ola bilər ki, müstəqil ölkə olduğunu elan edəsən, amma öz valyutan olmasın? Belə olan halda müstəqilliyini necə qoruyub saxlayacaqsan? Nəzəri cəhətdən bu mümkündür. Bəli, vahid pul sistemindən istifadə edən avrozona ölkələri bir-biri ilə güzəştə getməyə məcburdur. Ancaq Avropada güzəştlər varlı ölkələrin daha kasıblara yardımı ilə kompensasiya edilir, CFA frank zonalarında isə belə bir mexanizm tətbiq edilmir. 14 ölkənin valyutası avroya ciddi şəkildə bağlıdır, inflyasiya dərəcələri xaricdən göstərişlərlə müəyyən edilir və milli pul ehtiyatlarının bir hissəsi yerləşdirilmək üçün Parisdə verilib. Bunun müqabilində isə ortalıqda heç nə yoxdur.
İqtisadi nöqteyi-nəzərdən, CFA frankı ilə avro arasında sabit məzənnənin öz güclü tərəfləri var: Afrika valyutası “Köhnə qitə”nin pullarına asanlıqla dəyişdirilə bilər və onu böyük miqdarda xaricə aparmaq olar. Amma investisiya sabitliyi baxımından belə bir üstünlük dövlət üçün ciddi təhlükəyə çevrilir. Böhranın ilk əlamətləri üzə çıxan məqamda kapitalı, istifadə olunan yerli bazardan təcili çıxarmaq daha asandır.
Valyutaların bərabərsizliyi Avropa ilə müqayisədə inkişaf səviyyəsindəki uyğunsuzluğu daha da artırır. Bu gün avroya bağlanan Afrika valyutasına şişirdilmiş məzənnə miras qalıb. Nəzəri baxımdan bu, o deməkdir ki, xammalları çıxmaq şərti ilə, yerli mallar çox bahadır. Qalan hər şey xaricdən gətirilir və yerli bazarda uğurla satılaraq yerli istehsala heç bir şans vermir. Ümumi iqtisadi göstəricilərin dili ilə desək, bu disbalans kütləvi işsizliyin yaranmasına gətirib çıxarır. İllər keçdikcə özlərinə layiqli yer tapa bilməyən afrikalılar Fransaya, onun diktə etdiyi siyasətə və onunla bağlı olan elitalara qarşı getdikcə daha sərt düşmənçilik etməyə başlayırlar.
1987-ci ildə Burkina-Fasonun prezidenti Tomas Sankaranın qiyamçılar tərəfindən öldürülməsi CFA frankı ilə bağlı bəlkə də son məsum hekayə də ola bilərdi. Solçu ideyaların tərəfdarı olan Sankara hesab edirdi ki, müstəmləkəçilikdən miras qalmış pul vahidi iqtisadi tərəqqiyə mane olur və milli hissləri aşağılayır. 1980-ci illərin əvvəllərində o, ölkəsinin milli valyutasının buraxılmasını təklif etdi, lakin mövqeyi lazımınca qiymətləndirilmədi. Qəsdin sağ qalan yeganə şahidi Sankaranın son anlarını belə dilə gətirir: qiyamçılar prezident iqamətgahına soxularaq cəsarətli Sankara ilə qarşılaşdılar. O, ayağa qalxaraq atəşləri öz üzərinə götürdü: “Onlar mənim üçün gəliblər”, – deyə qışqırdı və yıxıldı. Təşkilatçılar təkcə Burkinabe inqilabının lideri ilə deyil, həm də onun ideyalarını bölüşən 12 silahdaşı ilə hesablaşdılar. CFA frankı yenə “sağ” qaldı.
XXI əsrin Fransa kolonializmi
CFA frankının arxasınca uzanan dumanlı cığır bizim dövrümüzdə onun vəziyyətini çətinləşdirməyə bilməzdi. 2015-ci ildə Çad prezidenti, sonradan üsyançılar tərəfindən öldürülən İdris Debi Fransa müstəmləkəçiliyinin XX əsrdə əsas silahına çevrilmiş CFA frankını "Afrikanı geri aparan" valyuta adlandırdı. 2019-cu ildə Benin prezidenti Patris Talon onun bu fikri ilə tam razılaşdığını ifadə etdi: "Bu modelin mövcudluğunun davam etdirməsində yaxşı heç nə yoxdur ". İndi “Qara qitə”də nəsillərin dəyişməsi ilə öz maliyyə siyasətinə nəzarət etmək istəyi daha sürətlə üstünlük təşkil etməyə başlayıb.
Müstəmləkəçiliyin etibarlı silahının əlindən çıxacağını görən Fransa buna cavab olaraq, 2019-cu ildə CFA frank zonasının – qərb cinahında öz çevik islahatını təklif etdi. Onun prinsipləri Fransanın rolunun tədricən zəiflədilməsini, maliyyə ehtiyatlarının Afrikaya qaytarılması hüququnu və hətta müstəmləkəçiliyə istinad edən pul vahidinin nüfuzunu itirmiş adının dəyişdirilib eko adlandırılmasını ehtiva edirdi. 2020-ci ildə islahatların əsas prinsipləri Fransa Milli Assambleyası tərəfindən təsdiqləndi: Fransa nümayəndələri Afrikanın mərkəzi banklarından çıxarılsın və maliyyə ehtiyatları yerlərə köçürülsün. Lakin pandemiyanın alovlanması islahatın gedişini ləngitdi: 3 ildən artıq vaxtın keçməsinə baxmayaraq, o, hələ də qüvvəyə minmədiyi üçün nəticələrini qiymətləndirmək, təbii ki, mümkün deyil.
Ancaq burada da Fransanın kifayət qədər düşünülmüş şəkildə seçdiyi formulaların ikili xarakterini nəzərdən qaçırmaq doğru olmazdı. Parisin müstəmləkəçilik siyasətindən zənginləşən siyasi elitası özünəməxsus hiyləgərliklə hər şeyin olduğu kimi qalmasını daha məqbul hesab edir və buna ciddi cəhdlə çalışırlar: məsələn, Afrikaya öz milli sərvətini qaytarmaq hüququ heç də bunu həyata keçirmək öhdəliyi demək deyil, çünki bu hüquq razılaşmalardan asılı vəziyyətdədir. Mərkəzi banklardakı fransız nümayəndələrini isə Fransanın razılığı ilə təyin edilmiş ekspertlər əvəz edəcəklər ki, bu da CFA frankını tənqid edənlərin nəzərində fərqli bir şey deyil.
CFA frankının gələcəyi ilə bağlı fərqli qiymətləndirmələrdən asılı olmayaraq, Paris əsas məsələdə qətiyyən güzəştə getməyə razı deyil. Bu isə o deməkdir ki, Afrika ölkələrində Fransanın monitar müstəmləkəçilik alətlərinə qarşı müqavimət bu və ya digər şəkildə davam edəcək. Üstəlik, Mərkəzi Afrikanın CFA frankı sistemi üçün islahatların, hətta cüzi yaxınlaşmasını belə, söyləmək olmaz. Belə ki, 2023-cü ildə belə dəyişikliklərə həsr olunmuş yerli liderlərin sammiti belə nəticəsiz başa çatıb.
Hər hekayətin bir sonu var...
Bir sözlə, əgər Qərblə dünyanın əksər ölkələri arasındakı münasibətdən neokolonial hökmranlıq kimi danışırıqsa, o zaman Fransanın Afrikadakı təsiri sadə müstəmləkəçilikdən zərrə qədər də fərqlənmir. Hətta XX əsrdə ABŞ-ın dünyanın hər yerində tətbiq etdiyi formal suverenliyə əsaslanan beynəlxalq qurumlar sistemi belə bu strategiyaya maneə ola bilmədi.
Ancaq hər bir hekayətin bir sonu var. İndi Afrika cəmiyyətlərinin inkişafı, eləcə də “Qara qitə”nin sakinlərini qula çevirən fransızların ümumən zəifləməsi, onlar arasındakı münasibətləri bir növ finala doğru aparmaqdadır. Bundan sonra keçmiş fransız müstəmləkəçi ağaları bu ərazini ya tamamilə tərk etməli, ya da Afrikada öz müstəmləkə siyasətlərinin davam etdirilməsi üçün yeni yollar axtarmalı olacaqlar. O zaman Fransanın müstəmləkəçi monitar silahına çevrilən CFA frankının da sonu çatacaq.
Bunun bir əsas səbəbi odur ki, Parisin güc və resursları artıq formal suveren ölkələrin hökumətlərinə nəzarət etmək üçün kifayət etmir. Qərbin aparıcı dövlətləri arasında isə onun adekvat əvəzedicisi yoxdur. Üstəlik, Afrikaya getdikcə daha çox yeni xarici oyunçular gəlir. Rusiya orada təhlükəsizliyin qorunması sahəsində mövcudluğunu gücləndirir və dini terror qruplaşmalarına qarşı mübarizə aparır. Çin isə çox vaxt Afrika ölkələrinə Qərbdən gözlədiklərindən daha sərfəli əməkdaşlıq modelləri təklif edir və bu yolla təsirini artırır. Bu da, Avropa güclərinin heç vaxt rəqabətlə üzləşmədiyi və sosial infrastruktur məsələləri ilə özlərini əsla yükləməməyə vərdiş etdikləri yerlərdə çox həssas məsələlərdir.
Fransanın, XXI əsrdə Afrikada həyata keçirdiyi kolonial siyasət nəticəsində baş verən proseslərin məzmununu və mahiyyətini anlamadığını düşünmək yolverilməz səhv olardı. Buna baxmayaraq, Paris birbaşa nəzarətin qeyri-mümkün olduğu yerlərdə də, məsələn, Cənubi Qafqazda Ermənistandan istifadə etməklə maksimum fayda əldə etməyin yeni yollarını axtarır. Bu, kənar müşahidəçilərə belə bir fikir irəli sürməyə imkan verir ki, son vaxtlara qədər fransızların özlərini tamamilə rahat hiss etdikləri regionda Fransanın gücü son dərəcə zəifləyib. Axı onların öz mövcudluğunu qorumaq üçün hansı imkanları var və ümumiyyətlə, bu güc mövcuddurmu?
Əlbəttə, Fransa hərbi cəhətdən hələ də ayrı-ayrılıqda Afrika rejimlərinin hər birindən qat-qat güclüdür, lakin Paris artıq bu üstünlüyünü güclü siyasi təsirə çevirə bilmir. Buradan aydın görünür ki, hər bir hekayənin bir sonu olduğu kimi, Fransa müstəmləkəçiliyinin də sonu çatmaqdadır. Əlbəttə əgər Afrikadan sonra Cənubi Qafqazda müstəqilliyindən doğru-düzgün faydalanmayan Ermənistanı öz müstəmləkəsinə çevirə bilməsə...
İlqar RÜSTƏMOV
XQ