Qlobal elita Davosda nəyi müzakirə etdi?
İsveçrənin Davos şəhərində keçirilən növbəti Ümumdünya İqtisadi Forumu başa çatıb. Bu nüfuzlu tədbirin yekunu ilə bağlı Vadim Bondar “regnum.ru” saytında dərc etdirdiyi məqalədə yazır ki, 120-dən çox ölkənin elitasının nümayəndələri toplantının yekunu olaraq bir faktı təsdiq etmək məcburiyyətində qaldılar: nəhəng dövlətlər, hətta ranqına görə aşağı dövlətlər belə yeni dünya qaydalarının müəyyən edilməsinə görə kəskin rəqabətə girişiblər. Bu rəqabət isə təkcə konsensus üçün deyil, ümumiyyətlə, hər hansı kollektiv qərar üçün yer qoymur.
Davos forumunun builki şüarı “Etimadın bərpası” idi. Bu isə aşkarlıq, məmnunluq və məsuliyyət kimi baza prinsipləri ehtiva edirdi. Ancaq yaşadığımız dünya sürətlə dəyişməkdədir və artıq bu şüarın ehtiva etdiyi kimi deyil.
Dünya daha texnokratik və prinsipsiz olub. Nə üçün? Müəllif buna cavab olaraq yazır: “Birincisi, texnologiya sürətlə insanı onun mentallığı ilə ikinci plana keçirərək özü cəmiyyətin gələcək inkişaf hədəfinə və prioritetinə çevirilir. Maşınlar getdikcə daha yaxşı düşünür, həll edir və düzəldir, ancaq heç nə hiss etmir, düşünmür, mübahisə etmir. Bu da müasir dünyada rifah kimi qəbul edilir”.
İnsan təkrarolunmaz şəxsiyyət, hissiyyat, ağlın daşıyıcısı və sahibi kimi, həm də özünün inkişaf və kamillik səviyyəsinə görə, sadəcə texnoloji zəncirin köməkçi elementinə çevrilir. Nəticədə, belə cəmiyyət üçün qətiyyən vacib deyil ki, bu insanı nə həyəcanlandırır, ona ilham verən nədir, onu nə darıxdırır, o, nəyə inanır, nəyə inanmır və s.
Davos forumunda bərabərsizliyi aradan qaldırmaq üçün, hətta tarixin son dönəmində hazırkı kapitalizm modelinə hansısa mümkün potensial ictimai-siyasi və iqtisadi alternativlərlə bağlı mübahisələr belə olmadı.
İkincisi, planetdə de-fakto dördüncü dünya müharibəsi gedir. Məlum iki müharibə “isti”, qanlı müharibə olub, üçüncüsü “soyuq” və dördüncüsü proksi-müharibədir ki, bu da tamamilə yeni bir müharibədir. Onun qayda-qanunları düşünülməyib və normaları razılaşmayıb.
Bu razılaşdırımamış oyunlara cəmiyyətdə güclənən texnokratlıq öz təsirini göstərir ki, bu haqda əvvəldə söz açıldı. Nəticədə, biz getdikcə daha qeyri-insani bir dünya görürük və orada necə yaşayacağını hələ ki, heç kim bilmir. Ancaq Davos forumunun iştirakçıları zəmanəmızın ağır realizminin bu ağır materiyalarından danışmaq belə istəmədilər. Onlar üçün restoranlara yığışıb, həmişə olduğu kimi, xoş işlərdən, transparentlikdən (aşkarlıq-red), məmnunluqdan, məsuliyyətdən danışmaq daha rahatdır. İllyuminatora da baxmırlar ki, üzdükləri “Titanik”in ağır-ağır suya qərq olduğunu görə bilsinlər.
“The Global Risk Report”un forum ərəfəsində təqdim etdiyi hesabatın müəlliflərinin də daha dərin, ağrılı və fundamental problemlərdən yan keçməyə çalışdıqları aydın görünür. Onlar ciddi riskləri iqlim dəyişmələrində və 2024-cü ildə keçiriləcək çoxsaylı seçkilərin fonunda dezinformasiyaların yayılmasında görürlər. Məruzədə qeyd edilir ki, bütün dünyada seçki məntəqələrinə 3 milyarda yaxın insan gedəcək və dezinformasiyaların yayılması “yeni seçilmiş hökumətlərin legitimliyinə dağıdıcı təsir göstərə” bilər.
Ekspertlər hesab edirlər ki, bu dezinformasiyalar, “zorakı etirazlar və nifrətdən irəli gələn cinayətlərdən tutmuş vətəndaş qarşıdurması və terrorizmə qədər” ciddi hadisələrlə nəticələnə biləcək vətəndaş iğtişaşlarına səbəb ola bilər.
Hökumətlər buna demokratiyanı məhdudlaşdırmaq və boğmaqla, eləcə də nəyin doğru və nəyin yanlış olduğunu müəyyən etmək hüququnu mənimsəməklə cavab verəcəklər. Alternativ informasiya, rəy mənbələri, hətta ideyalar müxtəlif yollarla rədd ediləcək və sıxışdırılacaq. Üstəlik, belə ölkələrin dairəsi əhəmiyyətli dərəcədə genişlənəcək.
Məruzə müəlliflərinin rəyinə görə, iqtisadi böhran ehtimalları da qalır və böyükdür. Düşünürlər ki, keçmiş böhranlara gətirib çıxaran şərait fundamental yanaşmada heç də yoxa çıxmayıb. Ona görə də zəifləmiş maliyyə sistemlərinə yüngülvari bir sarsıntı lazım gələcək ki, dayanıqlığın kritik həddini dəf etsin.
Yanvarın 17-də Beynəlxalq Valyuta Fondunun (BVF) idarəedici direktorunun birinci müavini Gita Qopinat Davosda bu məsələ ilə bağlı daha müfəssəl danışdı. Onun şərhinə görə, bank sistemi, bütövlükdə, artan faiz dərəcələri və dünyada davam edən münaqişələr fonunda özünü kifayət qədər yaxşı saxlayır, lakin ABŞ və Çində bəzi banklar üçün risklər var.
Həmin banklar isə bu gün ən böyük bank sistemləridir və orada az-çox əhəmiyyətli bir “köpük” partlasa, dərhal domino effekti başlaya bilər ki, bu da maliyyə, borc və tikinti bazarlarını, ev təsərrüfatlarını və s. öz ardınca çəkib aparacaq.
Forumun iclaslarında “X xəstəliyi” pandemiyasının təhlükəsi də geniş müzakirə olunub. Düzdür, o, hələ ki, mövcud deyil, amma nədənsə onun ortaya çıxması reys avtobusun gəlişi kimi gözlənilir. Əlbəttə, bu mövzu sürpriz olmayıb və artıq bir neçə aydır ki, ciddi intensivliklə müzakirə olunur. İndi Davos vasitəsilə, bundan hələ xəbər tutmayan dünya elitalarının diqqətinə çatdırılır.
Formal olaraq bu məsələnin müzakirəsi, bəşəriyyət üçün ölümcül təhlükə yarandığı təqdirdə, milli səhiyyə sistemlərini operativ və əlaqələndirilmiş tədbirlərə hazırlamaq məqsədi ilə təşkil edilir. Əslində, bəzi analitiklərin iddia etdiklərinə görə, qlobalistlər hökumətləri gələcək epidemiya ilə hədələyib deyirlər ki, biz əvvəlcədən “səylərimizi birləşdirməliyik”, əks halda, hamımız ayrı-ayrılıqda məhv olarıq.
Bu, necə olur? COVID-19 pandemiyası bizə heç bir şey öyrətmədimi? Axı bu, yalnız baş verə biləcək hadisələrin məşqi idi və ayrı-ayrılıqda fərdi sistemlər artıq gələcək dünya şərinin öhdəsindən gəlməyəcəklər. Şimali Koreya buna misaldır: Bütün təcridolunma tədbirlərinə baxmayaraq, “Covid” oraya da yol tapdı. Qaçılmaz yeni pandemiyanın tərəfdarlarının fikrincə, “X xəstəliyi” daha sürətlə yayılacaq və daha dəhşətli olacaq.
Ümumiyyətlə, ehtimal var ki, Qərb qloballaşmanı yenidən gündəmə gətirmək məqsədi ilə sistemli şəkildə dünyanı yeni pandemiyaya hazırlamağa və antivirus araşdırmaları adı altında bu istiqamətdə artıq səylər göstərməyə başlayıb.
Sammit çərçivəsində, həmçinin süni intellektin artan təhlükəsindən də geniş danışıblar. Əslində, bu mövzu da yeni deyil və demək olar ki, bütün ötən il ərzində onun ətrafında müzakirələr olub. Hamı süni intellektin təhlükələri barədə xəbərdarlıq edir, lakin onu təkmilləşdirmək məqsədilə işlər sürətlə davam etsə də, hər şey məxvi saxlanılır. Bu da daha çox keçmişdəki nüvə layihəsini xatırladır.
XIX əsrin sonu və XX əsrin əvvəllərində fantastlar və futuroloqlar dəhşətli dağıdıcı gücə malik silahların meydana çıxması təhlükəsi haqqında çox fəal şəkildə əsərlər yazırdılar. Onun insanlara və ətraf mühitə mümkün təsirinin dəhşətli təsvirlərini verirdilər. Amma bunun heç kimə təsiri olmadı. Bütün aparıcı ölkələr gizli şəkildə öz nüvə layihələrini həyata keçirirdilər və gerçək olan və olmayan ən müxtəlif məlumatları yayaraq rəqiblərini qabaqlamağa çalışırdılar. Nəticədə, bomba ortaya çıxdı və istifadə edildi. Eyni şey, yəqin ki, süni intellektlə də baş verəcək.
Həm hesabatda qeyd olunan, həm də müəlliflərin fərqinə varmadığı və ya qəsdən yayınmağa çalışdıqları bütün bu ciddi risklər və çətinliklərdən çıxış yolu nədədir?
Təəssüf ki, müəlliflər və Davosa toplaşan elita bu məsələlərin həlli üçün heç bir uyğun resept təklif etmədilər. Yüz səhifədən çox hesabatın yekunu cəmi səkkiz səhifəyə sığır. Bu da özlüyündə nəyi göstərir? Bu gün qlobal elitaların başında durduqları sistemin dağılması prosesinın izahını verəcək cavabı yoxdur.
Bütün bunların əsas səbəbi dünyada etimadın olmamasıdır. Qarşılıqlı inam olmadığı üçün hətta maraqlar belə yaxınlaşmır. Yaxınlaşa da bilməz. Çünki Qərb sivilizasiyasının uğurlu kapitalizmi və ya Cosep Borrellin fikrincə, “yüksək hasarın arxasındakı bağ” Afrika, Latın Amerikası və Asiyanın bir hissəsinin qarət edilməsi yolu ilə qurulmuşdur.
Hazırladı:
İlqar RÜSTƏMOV
XQ