Ermənistan Rusiyanın Cənubi Qafqazdan sıxışdırılıb çıxarılması üçün alət deyil. Belə bir bəyanatla Ermənistan parlamentinin sədr müavini Ruben Rubinyan çıxış edib. Məlumatı “İnterfaks.ru” verib.
Rubinyan İctimai Televiziyanın efirində deyib: “Ermənistanın Rusiya əleyhinə alət olması barədə deyilənlərin məntiqi yoxdur. Bunu təsdiq edən heç bir fakt yoxdur və heç bir təhlil bunu sübut edə bilməz”.
O qeyd edib ki, Ermənistan həmişə özünü geosiyasi qarşıdurmalardan kənarda saxlayıb və müttəfiqlik öhdəliklərini yerinə yetirib: “Rusiya ilə münasibətləri bərpa etməyə ehtiyac yoxdur, çünki Rusiya-Ermənistan münasibətləri pozulmayıb”.
Keçən həftə rusiyalı diplomatik mənbə bildirib ki, “Rusiyanı süni surətdə Cənubi Qafqazdan sıxışdırmaq istəyirlər, özü də Yerevandan bu məqsədlərin reallaşması üçün istifadə edilir”.
Paşa ƏMİRCANOV,
“Xalq qəzeti”