ABŞ Müdafiə Nazirliyinin Qabaqcıl Araşdırma Layihələri Agentliyi (DARPA) yeni inqilabi hərbi texnologiyalar hazırlayan mütəxəssislər işə götürmək niyyətindədir. Bu, gələcəkdə ABŞ-ın hərbi üstünlüyünə dəstək məqsədi daşıyır.
Agentliyin Taktiki Texnologiyalar Bölməsinin qabaqcıl texnologiyaların inkişaf etdirilməsində maraqlı olduğu bildirilir. Aparılan tədqiqatlar ordunun ən qabaqcıl texnologiyalara əsaslanan silahlarla təmin olunmasına, hərbi əməliyyatların uğurla həyata keçirilməsinə xidmət edəcək. Söhbət havada, quruda, dənizdə və kosmosda hərbi əməliyyatlardan gedir.
Artıq Pentaqon mütəxəssislərlə 1 milyon dollara yaxın məbləğdə ilkin müqavilələr bağlamağa hazırdır. Qurumdan bildirilib ki, ABŞ-ın rəqibləri Vaşinqtonun cəbbəxanasındakı silahlara malikdirlər. Ölkənin yeni texnologiyalara ehtiyacı yaranıb.
Amerika Birləşmiş Ştatları müasir hava hücumundan müdafiə sistemlərinə (ADS) qarşı mübarizə vasitələrinin yaradılması təkliflərinə müsbət yanaşır. Bu ölkə daha çox havada qalan və dağıdıcı gücü olan yeni nəsil dronlar yaradılmasına maraq göstərir.
Bu günlərdə “American Greatness” nəşri qeyd edib ki, Ukraynanın silah tədarükü üçün müraciətlərinin daim artması ABŞ-ın müdafiə qabiliyyətinə və qlobal təsirinə ciddi zərbə vurur. Əgər Ukrayna ABŞ-ın müdafiə sistemi ilə manipulyasiyanı dayandırmasa, amerikalılar “bu dolaşıq Ukrayna düyününü” kəsməli olacaqlar.
Bundan əvvəl, mayın 7-də ABŞ Hərbi Hava Qüvvələrinin veteranı və keçmiş F-16 pilotu Con Venabl qeyd etmişdi ki, ABŞ istehsalı olan F-16 qırıcıları Rusiyanın hava hücumundan müdafiə sistemlərindən üstün deyil. Bütün bunlara görə, ABŞ döyüş meydanında uğur qazana bilən ən qabaqcıl texnologiya əsasında istehsal olunmuş silahlara üstünlük verməlidir.
Pünhan ƏFƏNDİYEV, “Xalq qəzeti”