İran Milli Kitabxanasında hicabdan məcburi istifadə etməyən fəal oxucuları buradan uzaqlaşdırmağın “orijinal” üsulunu tapıblar. Milli Kitabxana və Sənədlər Təşkilatı onların bir qrupuna SMS göndərərərək “Üzvlük siyasətinin 10-cu maddəsinin 7-ci bəndini əsas götürərək üzvlüklərinin dayandırıldığını” bildirib.
Müdriyyət bu mesajlarda tədbirin məcburi hicaba və ya oxşar səbəbə görə görüldüyünü göstərmir. Bənddə istinad edilən “Üzvlük məcəlləsinin 7-ci bəndində” müəmmalı “İslam geyiminə tam riayət edilməsi və dini, mədəni işlərin “mühafizəsi” kimi fikirlər yer alıb ki, əslində, söhbətin arxasında hansı məqamların dayandığı bəllidir.
Məhz buna görə də qadınlar öz qanuni haqlarının bərpa olunması uğrunda mübarizəyə qalxıblar. Üzvlükləri dayandırılan qadınlar İran İslam Respublikasının “dəyənək və güllə siyasətindən” sonra onlara qarşı davranışı heç də həzm etmək niyyətində deyillər. Bu münasibətlə hazırlanmış bəyanatın müəllifləri İran Milli Kitabxanasının bir sıra qadın üzvlərinin mesajlar vasitəsilə üzvlüyünün dayandırılmasını İranın idarəçilik strukturunda “gender aparteidini” yaymaq üçün “dövlət qurumlarının praktiki və sistemli addımı” kimi qiymətləndiriblər.
Bəyanatda deyilir: “İndi məntiqlə mədəniyyət qurumu olmalı olan Milli Kitabxana repressiyaya məruz qalan tədqiqatçıların və tələbələrin aradan qaldırılması bayrağını daşımaqdadır”. Bu bəyanatın başqa hissəsində Milli Kitabxananın mühafizə tədbirləri tənqid edilib və bildirilib ki, bu qurum “Məcburi hicaba riayət etməkdən imtina edən bütün qadın üzvlərə mesaj göndərmək əvəzinə etirazların həcmini azaltmaq üçün vaxtaşırı on nəfərlik qruplara üzvlüyün dayandırılması ilə bağlı SMS göndərilməsi qərara alınıb”.
Bəyanatı imzalayanlar sonda yazıblar: “Vətəndaşlara xidmət etməli olan dövlət qurumlarının ərbablar cübbəsini geyməsinə və bizi aradan qaldırmasına icazə verməyəcəyik”.
R.GƏNCƏLİ
