Çindəki Kaşqar Beynəlxalq Sərgi Mərkəzində “Qarşılıqlı əlaqə, qarşılıqlı yardım və qarşılıqlı fayda - birgə məsləhətləşmə, tikinti və faydaların bölüşdürülməsi” devizi altında keçirilən XV Mərkəzi və Cənubi Asiya Ticarət Yarmarkasının rəsmi açılışı olub.
AZƏRTAC xəbər verir ki, Sincan-Uyğur Muxtar Vilayətinin Kaşqar Prefekturasının Administrasiyası tərəfindən təşkil olunan tədbirdə Çinin müxtəlif regionlarından, eləcə də Mərkəzi və Cənubi Asiya ölkələrindən nümayəndələr iştirak ediblər. Bu il Pakistan və Qırğızıstan tədbirdə qonaq ölkə fəxri statusu alıb.
Yarmarkanın 40 min kvadratmetr olan sərgi sahəsi üç əsas zonaya bölünüb: investisiya əməkdaşlığı, beynəlxalq və daxili ticarət.
Ekspozisiya bir neçə tematik sahələri əhatə edir: rəqəmsal və yüksək texnologiyalar, aerokosmik informasiya sahəsi və yeni enerji mənbələri, kənd təsərrüfatı və heyvandarlıq, toxuculuq və istehlak malları, mədəni turizm və açıq hava avadanlıqları, tikinti materialları və interyer, həmçinin avtomobil sənayesi.
Biznes proqramının formatı “10+1+2” - on sənaye işgüzar görüşü, bir investisiya sazişinin imzalanması mərasimi və qonaq ölkələrlə iki ixtisaslaşdırılmış görüş olaraq təyin edilib. Yarmarkanın mədəni hissəsi “5-də 1” konsepsiyası ilə təqdim olunur. Konsepsiyaya immersiv teatr tamaşası, tematik ekspozisiya, genişmiqyaslı rəqs quruluşu, qeyri-maddi mədəni irs yarmarkası və Mərkəzi Asiya ölkələrinin incəsənət sərgisi daxildir.
2005-ci ildə əsası qoyulan Kaşqar Ticarət Yarmarkası Çinin Mərkəzi və Cənubi Asiya, Yaxın Şərq, Avropa ölkələri ilə iqtisadi-ticari əlaqələrinin gücləndirilməsi üçün əsas platformalardan birinə çevrilib. Bu tədbir mövcud olduğu müddətdə 56 ölkə və regiondan, 38 mindən çox müəssisədən nümayəndələr cəlb edib və bağlanmış sövdələşmələrin ümumi həcmi 480 milyard yuanı ötüb. Bu gün Kaşqar Ticarət Yarmarkası miqyasına görə Sincanda “Avrasiya Ekspo” sərgisindən sonra ikinci yeri tutur və “Bir kəmər və yol” təşəbbüsü çərçivəsində regional əməkdaşlıq üçün ən nüfuzlu platformalardan biri hesab olunur.
Qeyd edək ki, tədbir avqustun 17-dək davam edəcək.
