Azərbaycan və Pakistan arasında davamlılıq, ticarət və investisiya sahələrində əməkdaşlıq üçün böyük potensial mövcuddur. Xüsusilə yaşıl iqtisadiyyat və digər davamlılıq layihələrində tərəfdaşlıq imkanları genişdir.
Bu sözləri Pakistanın “COPAIR” İqlim Diplomatiyası Mərkəzinin prezidenti Amna Munavvar Avan AZƏRTAC-a açıqlamasında bildirib.
COP29-da iştirak edən A.M. Avan Bakı səfəri və Azərbaycan-Pakistan əlaqələri barədə də danışıb:
"Bakıya gəlməkdən çox məmnunam, bu, mənim ikinci səfərimdir. İlk dəfə Bakıya Pakistan Prezidentinin biznes və sosial nümayəndə heyəti ilə gəlmişdim”, - deyə o, qeyd edib.
Amna Munavvar Avan Pakistanın iqlim ədaləti və maliyyələşməsi üçün çalışdığını bildirib.
Azərbaycanın Pakistan üçün regional bir tərəfdaş olaraq əhəmiyyətini vurğulayan A.Avan Bakının turizm, iqtisadi inkişaf və mədəni zənginliyini də yüksək qiymətləndirib: “Azərbaycan turizm və iqtisadi inkişaf baxımından heyranedicidir. Bakıya çoxlu xarici ziyarətçi gəlir, şəhərin gözəlliyinə heyran qalır. Burada insanlar çox qonaqpərvərdir”, - deyə o, qeyd edib.
