Hörmətli və doğma “Xalq qəzeti”nin kollektivi, bu gün xalqımız sizin yaratdığınız mənəvi irsin zənginliyinə və misilsiz dəyərinə bir daha yüksək qiymət verir. Fəaliyyət göstərdiyiniz 105 il bütöv bir epoxadır. 

Bu illər ərzində qəzetiniz ölkə tarixində bir çox mühüm hadisələrin şahidi olub, xalqımızın və ölkəmizin tarixini səhifələrində obyektiv əks et­dirib. Bu, qəzetin kollektivi ilə bir­likdə onun oxucularına da tarixi pro­seslərin bilavasitə iştirakçısı olmaq imkanı yaradıb. “Xalq qəzeti” özünün bir əsrdən artıq tarixi boyu təkcə res­publikada baş verənləri izləməyib, həm də hər bir hadisəni xalqımızla birlikdə yaşayıb. 

Nəşrinizdə Azərbaycan vətəndaş­ları hakimiyyətin ən mühüm qərarları ilə bərabər, dövlətin xarici və daxili siyasəti, müstəqillik yolunda həyata keçirilən strateji layihələri ölkə vətəndaşlarına, paytaxt Bakıdan tutmuş ra­yonlarda və ucqar kəndlərdə yaşayan insanlara doğru və düzgün çatdırmaq­da böyük xidmətlər göstərib və bu gün də göstərir. Redaksiyanızda çalışmış müxtəlif nəsillərin nümayəndələri bu 105 il ərzində yüksək peşəkarlıqla­rını sübut ediblər. Qəzetiniz haqlı olaraq ölkə miqyasında ən populyar və oxunan, xalqın etimadını qazanmış nəşrlərdən biri olub.

Jurnalistləriniz uzun illər informasiya məkanının önündə gedərək, ya­radıcılıqlarında Azərbaycanın çoxşaxəli mədəniyyətinin təbliğinə layiqli yer ayırıb, onun görkəmli nümayəndələri haqqında materiallar hazırla­yıb, ölkəmizin mədəni həyatında baş verən hadisələri maraqlı və mənalı məqalələr, publisistik yazılarla işıqlandırıb, oxucuları teatr və kino, ədə­biyyat və musiqi, rəssamlıq və xalq yaradıcılığındakı ən son yeniliklərlə tanış edib.

“Xalq qəzeti”nin səhifələrində bir çox görkəmli şairlərin, yazıçıların və publisistlərin gözəl əsərləri dərc edilib. Bu, qəzetə böyük nüfuz gətirməklə yanaşı, ona oxucuların da inamını və sevgisini qazandırıb. Bu gün sizin böyük kollektiviniz peşəkarlığı və jurnalistikaya yaradıcı münasibəti ilə öz sələflərinin şərəfli ənənələrini uğurla davam etdirir. “Xalq qəzeti” çap mət­buatının bayraqdarı mövqeyində qalmaq üçün peşəkarlığından və Vətən sevgisindən güc alır. Bununla belə, ənənələrə sədaqət müasir tendensiya­larla ayaqlaşmağa mane olmur: siz onlayn nəşr və televiziya yayımı imkan­larını fəal şəkildə inkişaf etdirirsiniz, müxtəlif yaş və maraq dairələrindən olan auditoriyanı cəlb edirsiniz.

Qəzetinizdə çalışan bütün redaksiya heyətinə təşəkkül tapmağa baş­layandan özünəməxsusluğunu təsdiq edənə qədər topladıqları zəngin və müsbət təcrübənin qorunub saxlanmasını, daha böyük yaradıcılıq uğurları qazanmasını və oxucu auditoriyasını durmadan genişləndirməyi arzulayı­ram. “Xalq qəzeti” üçün bu əlamətdar gündə jurnalistlərə və bütün kollek­tivə yeni uğurlar, şəxsi xoşbəxtlik, cansağlığı və firavanlıq diləyirəm. Qələ­miniz həmişə təmiz və iti, publisistik sözünüz etibarlı və inandırıcı olsun.

Hidayət ORUCOV,
Azərbaycanın dövlət xadimi, diplomat və şair-dramaturq