Bu gün maraqla oxuduğu­muz “Xalq qəzeti” sovet dövrünün partiya orqanı olan “Kommunist” qəze­tinin bazasında yaranıb. Bilirik ki, “Kommunist” qəzeti tamamilə başqa bir yönümdə nəzərdə tutulan, yəni başlıca olaraq siyasi motivli mövzulara üstünlük verən qəzet idi. O qəzet kommunizm ideyasını, ideologiyasını təbliğ edən yüksək tribuna idi. Amma obyektivlik naminə deyək ki, “Kommunist”in sə­hifələrində milli məfkurə, milli mənlik şüurunun qorunması, mənəviyyat məsələləri də vaxtaşırı öz əksini tapırdı. 

“Xalq qəzeti” isə onun bazasında yaradılsa da, tamamilə fərqli epoxa­nın qəzeti oldu. Qısa zamanda müstəqil Azərbaycanın ən səviyyəli qəzet­lərindən birinə çevrildi. Bu gün “Xalq qəzeti” fəaliyyəti ilə adına uyğun mövqe tutub. Qəzetin gündəlik səhifələrindəki yazılarının mövzusu, məz­munu xalqın həyatı, duyğu və düşüncələri ilə ciddi bağlıdır. Qəzet çalışır ki, müstəqil Azərbaycanda “xalqın qəzeti” imicini doğrultsun. Xalqın arzu və istəklərini ifadə etsin, problemlərini öyrənsin və bu problemlərin aradan qaldırılması naminə qələmin gücündən layiqincə istifadə etsin. 

“Xalq qəzeti”nin, xüsusən son 2 ildəki fəaliyyətini ayrıca qeyd etmək istəyirəm. Operativlik, dünyagörüşü genişliyi, siyasi məsələlərdən tutmuş, sadə insanların həyatlarını işıqlandırmağa qədər müxtəlif mövzularla bağlı dərin təhlili yazılar, qəzetin yenilik axtarışları dərhal nəzərə çarpır. Misal üçün, keçən il Ulu öndər Heydər Əliyevin 100 illik yubileyi ilə bağlı yerli və dünya mətbuatında çoxsaylı silsilə materiallar dərc edilirdi. “Xalq qəze­ti” bu sırada özünün orijinal axtarışları ilə seçilirdi. Qəzetin materiallarında yenilik var idi, aktual idi, təkrarçılığa yol verilmirdi, şablonçuluq da yox idi. Belə ki, Heydər Əliyevlə işləmiş, onun yanında olmuş insanları axtarıb taparaq müsahibələr götürüldü, yeni faktlar ortaya qoyuldu. Bir sözlə, nəşr Ümummilli liderin ümumiləşdirilmiş və parlaq obrazını fərqli baxışdan ya­ratmağa nail oldu.

Oxucu kimi mənim üçün “Xalq qəzeti” ciddi ictimai-siyasi mövzular­la bərabər, tariximiz, mədəniyyətimiz, ədəbiyyatımız haqqında da maraqlı yazılarla çıxış edən mətbuat orqanıdır. Deyilən sözün çəkisi olmalıdır və oxucunun mənəvi aləminə təsir edə bilməlidir. “Xalq qəzeti” bunu bacarır. 

Qəzetin bütün əməkdaşlarını 105 illik yubiley münasibətilə ürəkdən təbrik edirəm! Bütün qələm dostlarıma yeni-yeni yaradıcılıq uğurları ar­zulayıram! Arzu edirəm ki, 150 illik yubileyində də 105 illik yubileyində olduğu kimi, xalqla bərabər olsun!

ELÇİN,
Xalq yazıçısı