44 günlük müharibədən sonra imzalanmış üçtərəfli bəyanatın 4-cü bəndində sülhməramlı kontingentin erməni silahlı qüvvələrinin çıxarılması ilə paralel yerləşdirilməsi öz əksini tapıb. Münaqişədən ötən müddət ərzində Ermənistanın Azərbaycanın Qarabağ bölgəsi daxil olmaqla ərazi bütövlüyünü tanımasına baxmayaraq, silahlı qruplaşmaların hələ də çıxarılmaması və davam edən təxribatlar növbəti hərbi əməliyyatların keçirilməsi mövzusunu gündəmə gətirib.
Sosial Tədqiqatlar Mərkəzi (STM) mövzunun aktuallığını nəzərə alaraq, vətəndaşlar arasında rəy sorğusu keçirib.
İctimai rəyi öyrənmək məqsədilə respondentlərə ünvanlanan “Sizcə, Azərbaycan Qarabağda qanunsuz silahlı qruplaşmalara qarşı yeni hərbi əməliyyatlar keçirməlidirmi?” sualına iştirakçıların mühüm hissəsi - 71.3 faizi “bəli” cavabını verib.
Sorğuda iştirak edənlərin 24.1 faizi əks mövqedən çıxış edərək yeni hərbi əməliyyatların keçirilməsini istəmədiyini bildirib. Respondentlərin 4.6 faizi suala cavab verməkdə çətinlik çəkib.
Nəticələri ötən ilin müxtəlif dövrləri üzrə müqayisə etdikdə, STM-in 2022-ci ilin avqust ayında keçirdiyi rəy sorğusunda Qarabağda erməni silahlı qruplaşmalarına qarşı hərbi əməliyyatların keçirilməsini 80.5 faiz respondent dəstəkləmişdi. 6.8 faizi əks mövqedə qərarlaşmış, 12.7 faizi suala cavab verməkdə çətinlik çəkmişdi.
Sentyabr ayında Qarabağda erməni silahlı qruplaşmalarına qarşı hərbi əməliyyatların keçirilməsini dəstəkləyənlər 85.0 faiz təşkil etmişdi. 9.5 faiz respondent yeni hərbi əməliyyatları dəstəkləməmiş, 5.5 faizi suala cavab verməkdə çətinlik çəkmişdi.
Rəy sorğusunun dekabr ayı üzrə göstəricilərində yeni hərbi əməliyyatların keçirilməsinə respondentlərin 48.0 faizi dəstəyini ifadə etmişdi. Onların 39.6 faizi yeni hərbi əməliyyatların keçirilməsi ilə bağlı əks mövqeyini ifadə etmişdi. 12.4 faizi bu sualla bağlı rəyini ifadə etməkdə çətinlik çəkmişdi.
Qeyd edək ki, sorğular telefonla müsahibə formasında keçirilib və 18 yaşından yuxarı 390 respondent iştirak edib.
Sorğuda Bakı, Abşeron-Xızı, Dağlıq Şirvan, Gəncə-Daşkəsən, Qazax-Tovuz, Lənkəran-Astara, Quba-Xaçmaz, Şəki-Zaqatala, Qarabağ, Mərkəzi Aran, Mil-Muğan, Şirvan-Salyan iqtisadi rayonları əhatə edilib. Respondentlərin gender bərabərliyi qorunmaqla seçmə çərçivəsi əhali sayına proporsional müəyyən edilib. Sorğuda əhatə edilmiş respondent sayına əsasən, nəticələrin xəta əmsalı 95 faiz əminlik intervalında 5 faiz təşkil edir.
Rizvan FİKRƏTOĞLU
XQ