Böyük Qayıdış proqramı üzrə doğma yurd yerlərinə – Laçın şəhərinə köçürülən sakinlərin də aktiv məşğulluq proqramları ilə əhatə olunması üçün işlərə başlanıb. Dövlət Məşğulluq Agentliyi ilk mərhələdə həmin sakinlərlə görüşlər keçirir. Bu barədə Əmək və Əhalinin Sosial Müdafiəsi Nazirliyindən bildiriblər.
Aldığımız məlumata görə, artıq 38 ailə ilə belə görüşlər keçirilərək, qiymətləndirmə aparılıb, onların hansı məşğulluq proqramına cəlb olunacaqları müəyyən edilib. Bu əsasda növbəti mərhələdə Laçın sakinlərinin münasib vakansiyalar üzrə işlə təminatı, özünüməşğulluq proqramına cəlbi, eləcə də sakinlərdən bir qisminin yeni peşələrə yiyələnmələri məqsədilə peşə hazırlığı kurslarının təşkili nəzərdə tutulub.
Laçında fəaliyyət göstərən işəgötürənlərlə birgə müxtəlif dəstək proqramlarının həyata keçirilməsi də planlaşdırılır.
Sahibkarlara biznes fürsəti
Əmək və Əhalinin Sosial Müdafiəsi Nazirliyi Dünya Bankının maliyyə dəstəyi ilə icra olunan “Məşğulluğa Dəstək Layihəsi” iştirakçılarına biznes mükafatlarının təqdim edilməsini nəzərdə tutan yeni layihəyə start verir.
Layihə 2025-ci ilin sonuna qədər davam edəcək. Elektron müraciət formasını doldurmuş və qalib gəlmiş 280 sahibkar biznes mükafatları ilə təmin ediləcək.
Qeyd edək ki, layihə regionlar üzrə mərhələli şəkildə həyata keçiriləcək. İlkin mərhələdə Gəncə–Daşkəsən iqtisadi rayonu üzrə ”Məşğulluğa Dəstək Layihəsi”nə cəlb olunmuş və 1 ildən artıq fəaliyyəti olan benefisiarlar müraciət edə bilərlər. Həmin region üzrə qalib gəlmiş 8 sahibkarın biznes mükafatı ilə təmin edilməsi nəzərdə tutulur.
Layihəyə qeydiyyata alınmış vergi ödəyicisi olan, özünüməşğulluq proqramı çərçivəsində birinci ilin biznes planını uğurla tamamlamış, son 12 ay ərzində bütün hüquqi və vergi tələblərinə tam şəkildə riayət etmiş və cəriməsi olmayan, fəaliyyətdə olan biznesi inkişaf etdirməsi üçün əlavə əmlaka ehtiyac duyan, biznesin inkişafı üçün biznes planı təmin edə biləcək sahibkarlar, həmçinin “Məşğulluğa Dəstək Layihəsi” çərçivəsində 2021-ci il dekabr ayından başlayaraq, istehsal və xidmət sahələri üzrə əmlakla təmin olunmuş benefisiarlar müraciət edə bilərlər.
Gəncə – Daşkəsən iqtisadi rayonu üzrə bu tələblərə cavab verən sahibkarlar 2023-cü ilin 26 iyul tarixinədək https://dma.gov.az/mesgulluga-destek-layihesi-heveslendirme-ve-biznes-mukafatlarina-muraciet-formasi linkinə daxil olaraq layihəyə müraciət edə bilərlər.
70 nəfər kiçik bizneslə məşğuldur
Əmək və Əhalinin Sosial Müdafiəsi Nazirliyi, Mərkəzi Bank və Banklar Assosiasiyasının birgə icra etdiyi “Özünüməşğulluğa dəstək–2023” layihəsi üzrə işsiz şəxslər üçün kiçik bizneslərin yaradılmasına başlanıb.
Layihə çərçivəsində artıq 70 işsiz şəxsin kiçik biznesləri yaradılıb. Onların əksər hissəsi şəhid ailəsi üzvləri, müharibə iştirakçıları və əlilliyi olan şəxslər, digər həssas qruplardan olanlardır.
Özünüməşğulluq proqramının genişləndirilməsində mühüm rol oynayan “Özünüməşğulluğa dəstək– 2023” layihəsinə 23 bank qoşulub.
2020–2021-ci illərdə həssas qruplardan ibarət 1500-dək şəxs üçün kiçik bizneslərin yaradıldığı layihənin bu il daha 300 işsiz şəxsi əhatə etməsi nəzərdə tutulub.
Zərifə HÜSEYNOVA, “Xalq qəzeti”