Goranboy rayonunda iqtisadiyyatın əsasını kənd təsərrüfatı təşkil edir və bu sahədə bitkiçilik və heyvandarlıq sektorunun inkişafı diqqət çəkir. Rayonda cari təsərrüfat ilində 23 min 650 hektarda taxıl bitkisi, o cümlədən 15 min 269 hektarda arpa və 8 min 381 hektarda buğda, 1970 hektarda günəbaxan, 417 hektarda dənlik qarğıdalı əkilmişdir.
Bu il rayonun Zeyvə, Şəfəq, Qarqucaq, Qaraçinar və Yenikənd kəndlərində, ümumilikdə, 8 hektarda tütün əkilmişdir. Hazırda rayonda taxıl biçininə başlanılmış və bugünədək 1109 hektarda arpa biçini aparılmışdır. Mütəxəssislər deyirlər ki, cari ildə yüksək nəticə əldə olunacağı gözlənilir. Yaş barama qurdunun qəbul məntəqələrinə təhvil verilməsi prosesi də davam etdirilir və indiyədək 3982 kiloqram məhsul təhvil verilmişdir.
Pambıq emalı müəssisələri arasında müqavilələrin bağlanmasında cari ildə ciddi və əsaslı problemlər yaranmışdır. Bu isə ötən illə müqayisədə pambıq əkini sahələrinin xeyli azalmasına səbəb olmuşdur. Bu məsələ ilə bağlı rayon icra hakimiyyətinin başçısı Məhərrəm Quliyevin rəhbərliyi ilə “Goranboy rayonu üzrə 2023-cü ilin pambıq əkini ilə bağlı istehsalçılar və emal müəssisələri arasında bağlanmış müqavilələr və torpaq sahələrinin şumlanması vəziyyəti” barədə operativ müşavirə keçirilmişdir. Müşavirədə pambıqçılığın inkişafında mövcud vəziyyət əsaslı təhlil və müzakirə edilmiş, məsul şəxslərə müvafiq tapşırıqlar və tövsiyələr verilmişdir.
Qeyd etmək lazımdır ki, bütün bunlarla yanaşı, yüksək məhsuldarlıq əldə etmək üçün torpaq və su resurslarından səmərəli istifadə edilməli, növbəli əkin tətbiq olunmalıdır. Bundan başqa, aqrotexniki tədbirlərin vaxtında və düzgün yerinə yetirilməsi, torpaq sahələrinin aqrokimyəvi analizinin aparılması, mineral gübrələrdən düzgün istifadə olunması, zərərvericilərə qarşı mübarizə tədbirlərinin vaxtında görülməsi də vacib məsələdir.
Yeri gəlmişkən, Goranboyda pambıqçılığın becərilməsi və tədarükü ilə bağlı “MKT İstehsal Kommersiya” MMC, “Azərpambıq” MMC və “Goran-Cotton” MMC məşğuldur. Ötən il 2526 hektar sahədən 6 min 800 ton pambıq yığılıb təhvil verilmişdir. Bu il isə 1540 hektarda səpin aparılmışdır.
Rayonda yaz-yay tarla işlərini yüksək səviyyədə başa vurmaq üçün kifayət qədər texnika var. 2023-cü ilin müvafiq dövrü ərzində 70 ədəd texnika qeydiyyatdan, 681 ədəd texnika texniki baxışdan keçirilmiş, 287 nəfərə yeni sürücülük vəsiqəsi verilmiş, 43 nəfərin sürücülük vəsiqəsinə yeni kateqoriya əlavə edilmiş və 151 nəfərin sürücülük vəsiqəsinin müddəti bitdiyi üçün yenisi ilə əvəzlənmişdir.
Rayonda mövcud əkin sahələrinin suvarılması üçün Suvarma Sistemləri İdarəsinin balansında olan 958 ədəd subartezian quyusundan, mənbəyini Yuxarı Qarabağ kanalından götürən Borsunlu, Səfikürd, Boluslu və Qızılhacılı nasos stansiyalarından, “Şəmkir maşın” və “Sol sahil” Tərtər kanallarından, təbii su mənbələri olan Kürəkçay, Qara-Goran və İncəçay çaylarından isdifadə edilir. Dövlət başçısının müvafiq sərəncamı əsasında rayon ərazisində cari ildə 31subartezian quyusunun qazılması və 16-nın bərpası nəzərdə tutulmuşdur.
Rayonda əkin sahələrinin suvarılması işinin təşkili və mövcud su ehtiyatlarından səmərəli istifadənin təmin edilməsi daim nəzarətdə saxlanılır. Bu məqsədlə RİH yanında yaradılmış mobil qruplar tərəfindən yerlərdə mütəmadi tədbirlər həyata keçirilir.
H.ZEYNALOĞLU,
“Xalq qəzeti”nin bölgə müxbiri
