“Böyük Qayıdış”ın ilk ünvanı olmuş Zəngilan rayonunun Ağalı kəndində 30 ildən sonra ilk dəfə Novruz marafonunun sonuncu çərşənbəsi yurd sevgisi ilə, el qadasında qeyd olundu.

Ağalı sakinlərinin mərkəzi meydan­da alovlandırdığı nəhəng tonqalın ətra­fında çal-çağır məclisi qurulub. Bayram konsertinə sevilən sənətkarlarla yana­şı, tanınmış hərbi diktor, vətənpərvərlik mahnılarının ünlü ifaçısı Şəmistan Əli­zamanlının və qiraətçi Şəhla Əliqızının çıxışları da təntənə və əlvanlıq gətirib. 

Xatırladaq ki, Ağalı kəndi Həkə­ri çayının sol sahilində, axar-baxarlı dağətəyi düzənlikdə yerləşir. Ötənlərdə Ağalı nəslinin ilk məskən saldığı yerə Böyük Ağalı, yaxud Aşağı Ağalı deyilib. Sonradan sakinlər çoxalıb, İkinci və Üçüncü Ağalı kəndləri salınıb. Erməni vandalları hər 3 kəndi yer üzündən si­lib. Vətən müharibəsindən sonra azad edilən Ağalı kəndinin bərpasına 2021-ci ilin əvvəlində başlanıb və layihə bir ilə başa çatdırılıb. 

Ötən il mayın 27-də Prezident İlham Əliyev və Birinci xanım Mehriban Əli­yeva Zəngilan rayonunda “Ağıllı kənd” layihəsinin birinci mərhələsi üzrə açılış mərasimində iştirak ediblər. İyulun 19-da isə əhalinin ilk qrupunun yeni salın­mış Ağalıya köçürülməsinə başlanılıb. Prosesin 4 mərhələdə həyata keçiril­məsi nəzərdə tutulub. “Ağıllı” yaşayış məntəqəsi layihəsi ilə yaradılmış Ağalı­da sakinlərin normal yaşayışı, məşğul­luğu təmin olunub. Ərazidə təhsil, tibb, xidmət və əyləncə obyektləri yaradılıb. Bayram şənliyində bütün bunlardan ra­zılıqla söz açılıb, xoş əhval yaşanıb.

R.TAHİR, “Xalq qəzeti”