"Efiopiya Baş naziri Abiy Əhməd Əlinin Bakıya səfəri Azərbaycanın Afrika qitəsindəki diplomatik və iqtisadi açılımının əyani göstəricisidir".

Bunu XQ-yə Türkiyənin Yunus Əmrə İnstitutunun sabiq Bakı nümayəndəsi Səlçuk Karakılıç deyib: "Bu səfər Azərbaycanın Afrika ilə qurmağı hədəflədiyi strateji tərəfdaşlıqların enerji, ticarət, logistika və təhsil sahələrində necə dərinləşdiyini ortaya qoyur. Ölkə, qitədəki əməkdaşlıqları yalnız iqtisadi gəlir fokuslu deyil, həm də diplomatik və mədəni əməkdaşlıqları əhatə edəcək şəkildə planlayır. Azərbaycan Prezidenti İlham Əliyevin əvvəlki Afrika səfərləri və yüksək səviyyəli görüşləri bu strategiyanın təməlini qoyub. Efiopiya ilə əlaqələrdə, enerji və iqtisadi əməkdaşlıq sahələrində əldə olunan nəticələr, beynəlxalq platformalarda qarşılıqlı dəstək və tərəfdaşlıq mexanizmləri artıq praktiki nəticələr verməyə başlayıb. Efiopiya xüsusunda Azərbaycan enerji və infrastruktur əməkdaşlığını prioritet strategiya olaraq müəyyən edib. Ölkənin zəngin neft və təbii qaz ehtiyatları, Afrika ölkələrinin sürətlə artan enerji tələbatını qarşılamaqda əsas rol oynayır. Bu enerji siyasəti yalnız iqtisadi gəlir deyil, həm də Afrikada etibarlı tərəfdaş kimi mövqe qazanmaq və diplomatik təsiri artırmaq məqsədi daşıyır. Azərbaycanın enerji ixracı Afrika ölkələrinin inkişaf strategiyaları ilə uyğunlaşdırılır və uzunmüddətli əməkdaşlığın institusional əsaslarını formalaşdırır. Afrika ilə münasibətlərdə Azərbaycan enerji ilə kifayətlənmir. Ticarət və logistika sahəsində atılan addımlar ölkənin regional və qlobal nəqliyyat mərkəzi kimi rolunu gücləndirir. Bakı-Tbilisi-Ceyhan boru kəməri və digər beynəlxalq nəqliyyat xətləri Azərbaycanın infrastruktur və tranzit imkanlarını ortaya qoyur. Bu modelin Afrika ilə əməkdaşlıq çərçivəsində tətbiqi, xüsusilə Efiopiya ilə liman, nəqliyyat və logistika layihələrinin inkişaf etdirilməsi yeni perspektivlər açır və ticarətin şaxələndirilməsi, investisiya imkanlarının artırılması strategiyasının tərkib hissəsidir". 

S. Karakılıç bildirib ki, Prezident İlham Əliyevin Afrika ölkələri ilə inkişaf etdirdiyi dərin münasibətlər Azərbaycanın regionda və qlobal səviyyədə mövqeyini gücləndirməyə hesablanıb: "Bu siyasət Bakını yalnız enerji ixracatçısı kimi deyil, həm də inkişaf tərəfdaşı, investisiya təşəbbüskarı və diplomatik əlaqələr şəbəkəsinin qurucusu kimi təqdim edir. Azərbaycan, Afrika açılımını həyata keçirərkən, Çin, Rusiya və Qərb aktorları ilə geosiyasi balansı qoruyaraq, həm iqtisadi, həm də strateji maraqlarını maksimum dərəcədə müdafiə edir. Afrika açılımının əsas hədəfləri iqtisadi diversifikasiya, yeni bazarlara çıxış, beynəlxalq təşkilatlarda siyasi dəstək şəbəkəsinin genişləndirilməsi və Azərbaycanın qlobal Cənub ölkələri ilə strateji həmrəyliyinin möhkəmləndirilməsidir. Bu kontekst, Azərbaycanın həm qitədə, həm də regionda artan nüfuzunu qorumaq və strateji çevikliyini artırmaq üçün kritik əhəmiyyət daşıyır. Diplomatik sahədə qarşılıqlı etimad və siyasi sabitlik prinsipləri əsas xətti təşkil edir. Efiopiya ilə qurulan yaxın dialoq beynəlxalq platformalarda qarşılıqlı dəstəyi gücləndirir və Azərbaycanın Afrikada hörmətli və etibarlı aktor kimi mövqeyini möhkəmləndirir. Təhsil, mədəniyyət və texnologiya transferi istiqamətində əməkdaşlıq isə münasibətlərin uzunmüddətli və davamlı xarakter almasına xidmət edir. Enerji, ticarət, infrastruktur, təhsil və mədəniyyəti əhatə edən bu çoxşaxəli strategiya Azərbaycanın xarici siyasətində yeni mərhələni ifadə edir. Prezident İlham Əliyevin uzaqgörən və balanslaşdırılmış diplomatik xətti ölkənin strateji təsir dairəsini genişləndirir və onu Afrika qitəsində yüksələn tərəfdaşlardan birinə çevirir. Xarici İşlər Nazirliyi və diplomatik korpus bu istiqamətdə koordinasiyalı fəaliyyət göstərərək Azərbaycanın maraqlarını sistemli şəkildə irəli aparır. Nəticə etibarilə, Azərbaycanın Afrika açılımı təkcə iqtisadi maraqlarla məhdudlaşmır, bu, qlobal geosiyasi müstəvidə mövqelərin möhkəmləndirilməsinə yönəlmiş uzunmüddətli strateji xəttdir. Prezident İlham Əliyevin rəhbərliyi ilə Azərbaycan Afrika qitəsində etibarlı tərəfdaş və perspektivli strateji aktor kimi mövqeyini gücləndirir, həmçinin region və qlobal oyunçularla tarazlığı qoruyaraq uzunmüddətli təsir və diplomatik prestij qazanır".