Azərbaycan Respublikasının xarici işlər naziri Ceyhun Bayramovun 2025-ci il iyunun 2-də Keniya Respublikasına rəsmi səfəri, Bakı-Nayrobi münasibətlərində yeni mərhələnin başlanğıc nöqtəsi kimi qiymətləndirmək olar. Səfər çərçivəsində həm Azərbaycan Respublikasının Keniyada yeni təsis olunan səfirliyinin rəsmi açılış mərasiminin keçirilməsi, həm də Keniya hökumətinin yüksəkvəzifəli nümayəndələri ilə ikitərəfli görüşlərin təşkili nəzərdə tutulur.
Bu diplomatik hadisə təkcə ikitərəfli münasibətlərin rəsmi çərçivəyə salınması deyil, həm də Azərbaycanın son illər ərzində Qlobal Cənub ölkələrinə yönəltdiyi aktiv xarici siyasət kursunun bir hissəsi kimi dəyərləndirilməlidir.
Afrika vektorunun güclənməsi
Azərbaycanın Afrika istiqamətində diplomatik fəallığı son dövrlər daha da nəzərəçarpacaq şəkildə artıb. 2024-cü ildə keçirilmiş Bakı Təşəbbüsləri çərçivəsində Afrika ölkələri ilə inkişaf edən münasibətlər, xüsusilə enerji, təhsil və kənd təsərrüfatı sahələrində əməkdaşlıq imkanlarını gündəmə gətirmişdi. Bu kontekstdə Keniya ilə münasibətlərin dərinləşdirilməsi, Azərbaycanın Afrika İttifaqı məkanında strateji tərəfdaş axtarışının məntiqi davamıdır.
Keniya — Şərqi Afrika regionunun iqtisadi və siyasi baxımdan əsas oyunçularından biridir. Onun sabit institusional sistemi, beynəlxalq təşkilatlarda fəal rolu və inkişaf potensialı Azərbaycanın regional əməkdaşlıq formatlarına daxil olmaq strategiyası üçün əlverişli zəmin yaradır.
Səfirliyin açılması – siyasi iradənin göstəricisi
Keniyada Azərbaycan səfirliyinin açılması, siyasi münasibətlərin institusional çərçivəyə salınması baxımından əlamətdar hadisədir. Bu, həm də Azərbaycanın Afrika qitəsində daha aktiv və davamlı diplomatik iştirak niyyətini göstərir. Eyni zamanda, bu addım Keniya ilə strateji dialoqun formallaşmasını və möhkəmlənməsini təşviq edəcək.
İkitərəfli gündəlik: iqtisadi və humanitar müstəvidə imkanlar
Səfər zamanı gündəmdə olan məsələlər sırasında energetika, kənd təsərrüfatı texnologiyaları, iqlim dəyişikliklərinə qarşı birgə təşəbbüslər, humanitar layihələr və təhsil sahəsində əməkdaşlıq imkanları da yer alır. Azərbaycanın enerji təhlükəsizliyi və dayanıqlı inkişaf sahəsindəki təcrübəsi, Keniyanın bu istiqamətdəki inkişaf strategiyaları ilə uyğunlaşır.
Eyni zamanda, mədəniyyətlərarası dialoq, tələbə mübadiləsi və turizm kimi humanitar sahələrdə də əməkdaşlığın genişləndirilməsi nəzərdə tutula bilər. Xüsusilə Azərbaycanın mədəni diplomatiya alətlərindən istifadə etməklə regionda nüfuzunu artırmaq məqsədi güddüyü müşahidə olunur.
Beynəlxalq platformalarda əməkdaşlıq ehtimalları
Azərbaycan və Keniya, həm Qoşulmama Hərəkatı, həm də BMT çərçivəsində ortaq maraqları bölüşür. Bu baxımdan, iki ölkənin beynəlxalq təşkilatlarda qarşılıqlı dəstəyə əsaslanan əməkdaşlıq qurması üçün real əsaslar mövcuddur. Ceyhun Bayramovun səfəri bu istiqamətdə siyasi iradənin formalaşdırılmasına yönəlmiş mühüm diplomatik jest kimi dəyərləndirilə bilər.
Beləliklə, Xarici işlər naziri Ceyhun Bayramovun Keniyaya səfəri Azərbaycanın Afrika ilə münasibətlərində yeni səhifənin açılması anlamına gəlir. Bu səfər yalnız ikitərəfli münasibətlərin dərinləşdirilməsi deyil, həm də Azərbaycanın Qlobal Cənub siyasətinin praktik icrası baxımından strateji əhəmiyyətə malikdir.
Azərbaycanın bu istiqamətdəki fəallığı, ədalətə və çoxtərəfliliyə əsaslanan beynəlxalq münasibətlər sisteminə töhfə vermək niyyətinin ifadəsidir. Səfərin nəticələri fonunda Azərbaycan–Keniya əlaqələrinin daha yüksək səviyyəyə qalxacağı və regional həmrəyliyin möhkəmlənəcəyinə dair gözləntilər kifayət qədər realdır.
Səbuhi MƏMMƏDOV
XQ
