Müşfiq ƏLƏSGƏRLİ,
Mətbuat Şurası İdarə Heyətinin üzvü,
Media eksperti
[email protected]
Fransa xüsusi xidmət orqanlarının formalaşdırdığı casus şəbəkəsinin Azərbaycan Dövlət Təhlükəsizlik Xidməti tərəfindən ifşa olunması qlobal xəbər gündəmində yer tutub. Reuters, Deutsche Welle, The Street Journal, TRT World, Le Monde, TASS, Radio Free Europe/Radio Liberty və digər məşhur trans-milli KİV-lər mövzu üzrə çoxsaylı xəbərlər paylaşıblar. Paralel şəkildə trans-sərhəd KİV-lər də insidenti diqqət mərkəzində saxlayıblar. Belə KİV-lərin sayı kifayət qədər çoxdur.
Qlobal ictimai rəy yaradıcısı olan KİV-lərin mövzuya yanaşmasında 2 istiqamət diqqət çəkir. Birinci istiqamət odur ki, əksər KİV-lər mövzunu şərh etmədən statistik informasiyalar yayırlar. Yəni, Fransa xüsusi xidmət orqanları ilə əməkdaşlıq edən casus şəbəkəsinin ifşa olunması, prosesin davamı olaraq Fransa səfiri Ann Buayonun Azərbaycan Xarici İşlər Nazirliyinə çağırılması və nota verilməsi, həmçinin, prosesdə rol alan iki nəfər səfirlik əməkdaşının “arzuedilməz şəxs” qismində ölkədən çıxarılmasına dair ümumi xəbərlər paylaşırlar.
2-ci istiqamət isə odur ki, trans-milli KİV-lər insidentin motivini açmağa çalışırlar. Son insidenti Fransanın Cənubi Qafqaza yönəlik ekspansiya siyasəti ilə əlaqələndirirlər. Bu kontekstdə Azərbaycanın diplomatik uğurları və Dövlət Təhlükəsizlik Xidmətinin bacarıqları önə çəkilir. Məsələ ondadır ki, DTX-nın zərərsizləşdirdiyi şəbəkənin fəaliyyəti təkcə Azərbaycan ərazisi ilə məhdudlaşmayıb. Ukrayna, Moldova, Gürcüstan, Şərqi Avropa, Yaxın Şərq və Mərkəzi Asiyanın bir sıra ölkələrini də əhatə edib. Belə geniş coğrafiyanı əhatə edə bilmiş bir şəbəkənin məhz Azərbaycan təhlükəsizlik orqanları tərəfindən ifşa olunması diqqət çəkir. Azərbaycan xüsusi xidmət orqanları Fransa rezidenturasının Cənubi Qafqaz, Yaxın Şərq, Ukrayna və Moldovadakı fəaliyyətinə dair dəlil və sənədlər təqdim ediblər. Bu sənədlər əsasında Ukrayna, Gürcüstan və Azərbaycanla əlaqədar kəşfiyyat fəaliyyətini həyata keçirən bir sıra şəxslər həbs olunublar. Digərləri isə istintaq altındadır.
Qeyd edək ki, Azərbaycan DTK-nın bu əməliyyatı Fransa Prezidenti Emmanuel Makronun komandasına ciddi sarsıntısı yaşadıb. Dünya KİV-ləri açıq tekstlə yazırlar ki, Azərbaycan Dövlət Təhlükəsizliyi Xidmətinin keçirdiyi əməliyyat Fransa xüsusi xidmət orqanlarına nüfuz zərbəsi olub. Bu, “son 50 ildə Fransa xüsusi xidmət orqanlarının rastlaşdığı ən böyük rüsvayçılıq” kimi şərh edilir.
Yeri gəlmişkən bildirək ki, Azərbaycan 2023-cü ildə Fransanın təkcə xüsusi xidmət orqanlarını deyil, həm də diplomatik qurumlarını pat vəziyyətinə salıb. Belə ki, Fransa ATƏT-in Minsk qrupunun həmsədri qismində uzun müddət Qarabağ münaqişəsini ədalətsiz formada, Ermənistanın xeyrinə həll etməyə çalışıb. Ermənistan üzərindən iş quraraq, Cənubi Qafqaza daxil olmaq istəyib. 2022-ci ildən etibarən, bu iddialarını daha da intensivləşdirib.
Rəsmi Paris özünün Cənubi Qafqazda iştirakını münaqişələrin alovlandırılmasında görür. İki ölkə arasında münaqişənin yenidən alovlandırılması üçün Ermənistanı silahlandırır. Beynəlxalq təşkilatlardakı təmsilçiliyindən faydalanaraq Azərbaycana qarşı qondarma müzakirələr açır. Hələ 2020-ci ildə-II Qarabağ Müharibəsinin davam etdiyi dövrdə Azərbaycanın məsələsini BMT Təhlükəsizlik Şurasının müzakirəsinə çıxararaq, təzyiq göstərmək, ölkəmizi haqq işindən yayındırmaq istəmişdi. 2022-ci ilin dekabrında isə “Laçın yolu” mövzusunu əsas götürərək, Azərbaycan məsələsini BMT müstəvisinə çıxarmaq üçün növbəti dəfə təşəbbüs göstərmişdi. Eyni hərəkətlərini 2023-cü ilin avqust ayında da təkrarlamışdı.
Azərbaycan Fransa prezidenti Makronun bütün təşəbbüslərini iflasa uğrada bildi. Qarabağ münaqişəsini Ermənistanın xeyrinə həll etmək üçün onun göstərdiyi bütün səylər nəticəsiz qaldı. Azərbaycan öz dostlarının dəstəyindən istifadə edərək, Fransanın BMT müstəvisində irəli sürdüyü təşəbbüsləri də zərərsizləşdirdi. Hətta, BMT Təhlükəsizlik Şurasının sədri olduğu dönəmdə də Fransa “Laçın yolu” mövzusunu BMT müstəvisində müzakirəyə çıxarıb uğurlu nəticələr qazana bilmədi. Avropa İttifaqındakı imkanları da onun qalibiyyətini şərtləndirmədi.
Azərbaycan özünün sistemli hərəkətləri ilə Fransanın “sülhsevər, demokratik ölkə” imicini dağıtdı.
Görünən budur ki, Makron komandası “məğlubiyyət sindromu” yaşayır. Fransa Xarici Təhlükəsizlik Baş İdarəsinin (DGSE) rəisi Bernar Emyenin qəfildən istefaya göndərilməsi də bu sindromun əlaməti kimi şərh edilə bilər.