Fransız və alman veteran hərbçi-polislərin durbinləri heç də hər şeyi doğru-dürüst göstərmir

Tərkibi əsasən ehtiyatda olan alman və fransız hərbçi-polislərindən ibarət Avropa İttifaqının (Aİ) Ermənistandakı missiyası ilə bağlı rəsmi İrəvanın daha bir təxribatı baş tutmadı. 

Söhbət avqustun 15-də Ermənistan Müdafiə Nazirliyinin missiyanın patrul aparan avtomobillərinin, guya, Azərbay­can hərbçiləri tərəfindən atəşə tutulması barədə hazırlanmış təxribatdan gedir. Ha­disələrin xronoloji ardıcıllığına baxdıqda, bunun planlı təxribat olduğunu aydın gör­mək mümkündür.

Əvvəlcə, Ermənistanın Müdafiə Na­zirliyi məlumat yayıb. Məlumatda bildiri­lib ki, həmin gün saat 12:20 radələrində Azərbaycan Silahlı Qüvvələrinin bölmələri Basarkeçər rayonunun Yuxarı Şorca kəndi istiqamətində patrul aparan Aİ müşahidə­çilərini və onların avtomobilini, guya, odlu silahlardan atəşə tutub. Qeyd olunub ki, ölən və yaralanan yoxdur.

Bundan sonra Aİ-nin missiyası tərəfin­dən hayların müdafiə qurumunun bu yalanı təkzib edilib. Missiyanın “X” sosial şəbəkə­sində yaydığı məlumatda bildirilib: “Aİ-nin missiyasının heç bir patrulu atışmanın hə­dəfi olmayıb. Biz Ermənistan-Azərbaycan sərhəd rayonlarında patrul xidməti həya­ta keçiririk və Brüsselə hərbi inkişaflar, o cümlədən məsuliyyət daşıdığımız ərazidə atışma insidentləri barədə məlumat veri­rik”.

Ancaq üstündən bir neçə saat keçdik­dən sonra missiya yeni açıqlama ilə çıxış edib. Həmin açıqlamada qurumun mövqe­yi əvvəlkindən köklü şəkildə fərqlənib. Budəfəki açıqlamada deyilib: “Biz təsdiq edirik ki, Avropa İttifaqının Ermənistanda­kı missiyasının patrulu bizim məsuliyyət zonamızda baş verən atışma hadisəsi za­manı orada olub. Missiyanın heç bir üzvü zərər çəkməyib”.

Bundan sonra Azərbaycanın Mü­dafiə Nazirliyi məlumat yayaraq, Er­mənistanın yaratdığı hay-küy kampa­niyasını arqumentlə, necə deyərlər, darmadağın edib. Bildirilib ki, avqustun 15-də saat 12:20 radələrində Basar­keçər rayonunun Yuxarı Şorca yaşayış məntəqəsi ərazisində, guya, Avropa İttifaqının müşahidəçiləri və onların avtomobili istiqamətində Azərbaycan Ordusunun bölmələri tərəfindən atəş açılması barədə erməni informasi­ya resurslarında yayılan məlumat həqiqətəuyğun deyil və qarşı tərəfin növbəti dezinformasiyasıdır: “Bildiririk ki, Avropa İttifaqının müşahidəçilərinin Ermənistanda şərti sərhəd istiqamə­tində səfərlərinin vaxtı, onların hərəkət marşrutu, ərazidəki koordinatları, elə­cə də avtomobillərin markası və nömrə nişanları Azərbaycan tərəfinə əvvəlcə­dən təqdim edilir. Azərbaycan Ordu­sunun bölmələri missiyanın səfərləri barədə məlumatlıdır. Bu səbəbdən də Ermənistan müdafiə nazirliyinin iddia etdiyi belə bir halın baş verməsi nəzəri və praktiki baxımdan qeyri-mümkün­dür”.

***

Həmin günün sonuna doğru Ermə­nistanın xarici işlər naziri Ararat Mirzo­yanın fransalı həmkarı Ketrin Kolonna ilə telefon danışığında da bu məsələyə toxunulub. Telefon danışığı ilə bağlı hər iki ölkənin xarici işlər nazirlikləri açıqla­ma yayıblar. Maraqlıdır ki, Ermənistan tərəfinin açıqlamasında Aİ missiyası­nın “atəşə məruz qalması” ilə bağlı heç bir məqam yoxdur. Fransa Xarici İşlər Nazirliyinin açıqlamasının sonunda isə bununla bağlı bir cümlə var: “Nəhayət, hər iki nazir Aİ missiyasının patrul xid­məti zamanı bu gün (avqustun 15-də-S.H.) Ermənistan sərhədində baş verən atışmalara da toxunub. Nazir Kolonna bu hadisələrdən narahat ol­duğunu bildirib və Avropa missiyasına hərtərəfli dəstək verib”.

Ancaq Prezident İlham Əliyevin hələ 2004-cü ildə irəli sürdüyü infor­masiya müharibəsində müdafiədən “hücum diplomatiyası”na keçilməsinin şərtlərinə uyğun olaraq, fransız-erməni yalanına Azərbaycan tərəfinin reaksi­yası özünü çox gözlətməyib. Xarici İş­lər Nazirliyinin avqustun 16-da yaydığı açıqlamada deyilib ki, fransız nazirin rəsmi İrəvanın saxta təbliğatına inana­raq, Avropa İttifaqının Ermənistandakı missiyası tərəfindən də yanlış olaraq dəyərləndirilən, guya, missiyaya atəş açılması barədə dezinformasiyaya öz açıqlamasında istinad etməsi Fransa­nın bölgədə sülh və sabitliyin bərqə­rar olmasında maraqlı olmadığını bir daha sübut edir: “Azərbaycan Mü­dafiə Nazirliyinin rəsmi məlumatında qeyd olunduğu kimi, Avropa İttifaqının nümayəndələrinin hərəkət marşrutu Azərbaycan tərəfinə əvvəlcədən təq­dim olunur. Təqdim edilmiş həmin mar­şruta əsasən, beynəlxalq müşahidə­çilərin qeyd edilən günə təyin olunmuş istiqamətə səfərinin heç bir insident baş vermədən həyata keçirilməsinə Azərbaycan tərəfi xüsusi nəzarət edib. Missiyanın səfərinin baş tutduğu əra­zi heç də Ermənistanın insident baş verdiyi iddia edilən rayonda deyil, şərti sərhədin fərqli istiqamətində olub. Son günlər şərti sərhəddə və Qarabağ iqti­sadi rayonunda yeni təxribatlara zəmin yaradan Ermənistan tərəfi ənənəsinə sadiq qalaraq, böhtan xarakterli mə­lumat yaymaqla dünya ictimaiyyətinin diqqətini yayındırmağa və bu məqsəd­lə Avropa İttifaqını alətə çevirməyə ça­lışır. Fransa tərəfinin də bu kampaniya­nın alətinə çevrilməsi təəssüf doğurur”.

Beləliklə, Azərbaycanın həm mü­dafiə, həm də xarici işlər nazirlikləri Aİ missiyası ilə Ermənistan Müdafiə Nazirliyinin birlikdə düzüb-qoşduqları daha bir təxribatın baş tutmasına imkan vermədilər. Xüsusilə, Müdafiə Nazirliyi­nin bununla bağlı arqumentlə, faktların dili ilə danışması hayların və onların havadarlarının əl-qolunun, necə deyər­lər, bağlanmasına səbəb oldu. Əslində isə bu hadisə ermənilərin mahiyyət­cə dəyişməməsinin, yaxud, dəyişə bilməməsinin göstəricisidir. Bununla bağlı bir məqamdan da bəhs etmək, zənnimizcə, yerinə düşər. Hələ 2015-ci il fevralın 7-də Münhen Təhlükəsizlik Konfransı çərçivəsində “Ukraynadan əlavə: Avropada həll olunmamış mü­naqişələr” mövzusunda panel müza­kirəsi keçirilmişdi. Paneldə Prezident İlham Əliyev çıxış etmiş və sualları cavablandırmışdı. Dövlətimizin başçı­sı Ermənistan nümayəndəsinin qərəzli sualına cavab olaraq demişdi: “Ermə­nistan nümayəndəsinin atəş açılması ilə bağlı sualına cavab olaraq bildirim ki, əslində, həmişə günahı bizim üstü­müzə atmaq Ermənistan tərəfinin takti­kasıdır. Onlar bizim torpaqlarımızı işğal ediblər, beynəlxalq hüquq normalarını pozublar, Xocalıda soyqırımı törədib­lər, tarixi və dini abidələrimizi məhv ediblər və bizi günahlandırırlar. Sual isə ondan ibarətdir ki, işğal olunmuş ərazilərdə Ermənistan əsgərlərinin nə işi var? Erməni əsgərinin Ağdamda nə işi var? Əgər o ölmək istəmirsə, onda qoy Ağdama getməsin, olduğu yerdə qalsın, İrəvanda, Gümrüdə, öz ölkəsin­də qalsın. Sizin özünüz üçün ölkənizdə kifayət qədər yeriniz var. Ermənistanda o qədər də çox insan qalmayıb. Sizin Ağdamda, Füzulidə nə işiniz var?”

Bəli, Prezident İlham Əliyevin hələ 2015-ci ildə dediyi “əslində, həmişə gü­nahı bizim üstümüzə atmaq Ermənis­tan tərəfinin taktikasıdır” fikri bu gün də öz aktuallğını itirməyib. Bu gün də Er­mənistan Azərbaycanı ona dəxli olma­yan məsələlərdə ittiham etməkdədir. Fərq ondadır ki, İrəvan öz yalanlarına Avropa İttifaqı kimi mötəbər, dünyada sayılıb-seçilən qurumu cəlb edir. Avro­pa İttifaqı, o cümlədən onun Ermənis­tandakı missiyası öz nüfuzunu qoru­malı, adına xələl gəlməsinin qarşısını almalıdır. ATƏT və onun Minsk qrupu ilə bağlı acı təcrübə göstərir ki, gözdən, nüfuzdan düşənin, etimadı itirənin ye­nidən nüfuz, etimad qazanmaq səyləri heç bir nəticə vermir.

Rizvan HÜSEYNOV,
siyasi şərhçi

– Təəssüf ki, Avropanın bir sıra dairələri tam ermənipərəst mövqe­dən çıxış edirlər. Biz buna dəfələrlə şahidlik etmişik. Hətta Ermənistana elə dəstək verirlər ki, bu dəstək ol­masaydı, rəsmi İrəvan çoxdan daha effektiv danışıqlar aparar və Azər­baycanla sülhə gələrdi. Aİ missiyası­nın bu oyuna alət olmasına ehtiyac yox idi. Dəfələrlə Azərbaycan Müda­fiə Nazirliyi foto və videogörüntülər yayaraq, Ermənistan ordusunun sərhəd boyunca hərəkət etdiyini bil­dirmişdi. Bu dəfə isə Qarabağdakı qanunsuz hərbi birləşmələrə Rusi­ya sülhməramlılarının dəstəyi ilə si­lah-sursat daşınması faktları qeydə alınıb. Hətta yeni hərbi hissə inşa olunur. Aİ missiyası bu haqda niyə danışmır? Bura Azərbaycanın su­veren ərazisidir. Üçtərəfli bəyanatın şərtlərinə görə onlar Qarabağı çox­dan tərk etməli idilər.

Avqustun 16-da BMT Təhlükə­sizlik Şurasında iclas keçirilib. İclas ərəfəsində Azərbaycana edilən hü­cumlar bir mərkəzdən idarə olunub. Bura Aİ missiyasını da əlavə etmək olar. Missiya yaydığı açıqlama ilə BMT Təhlükəsizlik Şurasının iclası ərəfə­sində ölkəmizə hücumlar üçün əlavə əsaslar yaratmaq, İrəvanın mövqelə­rini gücləndirmək istəyib. Buradan bir nəticə çıxır ki, BMT-dəki müzakirə heç də Ermənistanın səyi və gücü deyil. Bəzi Avropa ölkələri, elə Aİ missiyası­na himayədarlıq edən Fransa bu işdə çox canfəşanlıq edir. Onlar Rusiya ilə əlbir olaraq bu və digər metodlarla ölkəmizə təzyiq etməyə çalışırlar. Hə­min maraqlı tərəflər əllərindən gələni etmək istəyirlər ki, Ermənistanla Azər­baycan arasında sülh müqaviləsi im­zalanmasın.

Burada rəsmi İrəvan siyasi sub­yekt deyil. Sadəcə olaraq, obyektdir. Yəni, kim istəyirsə, o da istifadə edir. Bu məsələdə Nikol Paşinyan haki­miyyəti özünü çox zəif göstərir, sülh prosesini xarici qüvvələrin maraqları­na qurban verir.

Ermənistan Müdafiə Nazirliyinin yaydığı dezinformasiya isə informa­siya müharibəsinin tərkib hissələrin­dən biridir. Şübhə etmirəm ki, Azər­baycanın müvafiq dövlət qurumları Qərbdə və Rusiyada bu oyunların arxasında hansı qüvvələrin dayan­dığını çox yaxşı bilirlər. Əminəm ki, Azərbaycanın tərəfdaşları və müttə­fiqləri Ermənistanın yalanlarının ifşa edilməsi və əsl həqiqətlərin çatdırıl­ması üçün bundan sonra da əllərin­dən gələni edəcəklər.

Səxavət HƏMİD, “Xalq qəzeti”