Azərbaycan–Ermənistan danışıqlarının, sülh gündəliyinin intensivliyinin iki ölkənin şərti sərhədində hərbi toqquşmalarla əvəzləndiyi hazırkı dövrdə, Rusiyanın bir sıra kütləvi informasiya vasitələri Bakı–İrəvan nizamlanmasının aktiv Qərb formatını gözdən salmağa çalışırlar. Mövcud xüsusda ABŞ-ın üzərinə, belə demək mümkünsə, yüklənmələr var. Daha konkret söyləsək, Rusiyanın bəzi media orqanları bildirirlər ki, Birləşmiş Ştatlar Qarabağ ermənilərinə Bakı ilə dialoq aparmaq üçün təzyiq göstərməkdədir. Əslində, başlıca diqqət yetirilməli məqam məhz dialoq məntiqinin qabardılmasıdır. Əlbəttə, mövcud xüsusda daha bir neçə vacib detalı da nəzərdən qaçırmaq olmaz.
Ancaq əvvəlcə Azərbaycan Prezidenti İlham Əliyevin mayın 28-də Laçında doğma yurd-yuvalarına qayıtmış rayon sakinləri ilə görüşündə səsləndirdiyi fikirləri diqqətə çatdıraq. Dövlətimizin başçısı Qarabağdakı separatçı rejimin təmsilçilərinə amnistiyanın şamil oluna biləcəyindən söz açmışdı. Cənab İlham Əliyev separatçı rejimin nümayəndələrinin bütün saxta vəzifələrini kənara qoyub Azərbaycan vətəndaşlığı üçün müraciət edəcəkləri təqdirdə, onlara amnistiya şamil edilə bilmə ehtimalını qabartmışdı: “Ona da biz hələ baxacağıq. Mənim sözüm qətidir, bunu hər kəs bilir, həm Azərbaycanda, həm dünyada, o cümlədən, Ermənistanda. Nəyi deyiriksə, onu da edirik. Bir dənə də olsun sözümüz, necə deyərlər, havada qalmayıb, bu söz də havada qalmayacaq. Əgər mən deyirəmsə ki, amnistiyaya baxmaq olar, bu fürsəti də qaçırmasınlar. Onlar bir çox fürsətləri qaçırıblar, bir çox fürsətləri və hər dəfə, necə deyərlər, gərək onların başından vuraydıq ki, özlərinə gəlsinlər”.
Qeyd edək ki, ABŞ Dövlət Departamenti Azərbaycan Prezidentinin mövqeyini alqışlayan açıqlama yaymışdı. Bu, Ermənistandakı siyasi dairələrin narazılığına səbəb olmuşdu. Rusiyanın bəzi kütləvi informasiya vasitələri isə manipulyasiyalara baş vurmuşdular. Onlar apardıqları təbliğatla elə təəssürat yaratmışdılar ki, sanki Vaşinqtonun Prezident İlham Əliyevin mövqeyini alqışlaması ABŞ-ın Qarabağda yaşayan ermənilərin taleyinə biganəliyidir.
***
“Amerikanın səsi” radiostansiyasının erməni xidməti məhz bu mövzuda ABŞ Dövlət Departamentinə sorğu ünvanlayıb. Əlbəttə, sorğuda konkretlik var. Sual təxminən belədir: “Rusiya KİV-ləri bildirirlər ki, Vaşinqton Qarabağa ABŞ-ın vasitəçiliyi ilə üçüncü ölkədə görüş keçirməklə bağlı təzyiq göstərir. Bu doğrudurmu?”
Dövlət Departamentinin cavabı diplomatikdir. Cavabda, ilk növbədə, bildirilir ki, Rusiya mediası dezinformasiya yayır. Bu motiv hətta bir qədər də sərt ifadə olunur: “Bildiyiniz kimi, Rusiyanın dezinformasiya tarixi var”. İkincisi: “Biz ardıcıl olaraq israr etmişik ki, regionda sülhə Dağlıq Qarabağ əhalisinin hüquqlarının və təhlükəsizliyinin qorunması daxildir. Biz buna töhfə verən istənilən dialoqu alqışlayırıq”.
Bəli, bu cavaba diqqət yetirəndə demək olmaz ki, ABŞ məsələyə birmənalı obyektiv münasibət bildirməkdədir. Yəni, faktiki olaraq onun da təşəbbüsü ilə aparılan kollektiv Qərb nizamlama xəttində Qarabağ erməniləri ilə bağlı hər hansı məqam yoxdur. Birləşmiş Ştatlar Azərbaycanla Ermənistan arasında vasitəçilik edir. Mövcud xüsusda hansı məsələlər var, o da cəmiyyətə açıqlanıb.
Digər tərəfdən, Azərbaycan Prezidenti İlham Əliyev hələ 2021-ci ildə “CNN Türk” televiziya kanalına müsahibəsində bildirmişdi ki, Xankəndidə və ətraf kəndlərdə yaşayan ermənilər də bizim cəmiyyətimizə mütləq inteqrə edilməlidir, onlar üçün bu, daha böyük fürsətlər yaradacaq. Dövlətimizin başçısı mayın 28-də laçınlılarla görüşündə isə bildirdi: “Mənim nümayəndəm gedib onlarla birinci görüş keçirib və ondan sonra onları dəvət etmişik Bakıya ki, gəlin danışaq. Onlar bundan imtina etdilər. Bundan sonra ikinci dəfə biz onları dəvət etmişik Bakıya. Yəni, Qarabağda yaşayan erməni azlığının nümayəndələrini. Ondan da imtina etdilər. Daha üçüncü dəvət olmayacaq. Ya özləri boyunlarını büküb gələcəklər, ya da ki, indi hadisələr başqa cür inkişaf edəcək”.
Ümumən, Azərbaycan dövlətinin rəsmiləri dəfələrlə bəyan ediblər ki, ölkəmizin Qarabağ ermənilərinə yanaşması, onların yalnız icma statusunun vurğulanması xüsusundadır. O icmalardan isə Azərbaycanda çoxdur. Yəni, ölkəmizdə digər xalqların nümayəndələrinin birlikləri var və buna yanaşma çox normaldır. Mövcud reallığı ABŞ-ın da, digər vasitəçilərin də qəbul etməsi vacibdir və qəbul edirlər də.
***
O ki qaldı, bilavasitə Dövlət Departamentinin “Amerikanın səsi”nin erməni xidmətinin sorğusuna cavabının daxili mahiyyətinə, hesab edirik ki, qurum ölkənin danışıqlar müstəvisindəki mövqeyini cavabına kifayət qədər uyğunlaşdıra bilməyib, sanki “nə şiş yansın, nə kabab” düşüncəsi ilə davranıb.
Birincisi, cavabda “Dağlıq Qarabağ” ifadəsi yer alıb ki, bu, qətiyyən yolverilməzdir. Çünki Azərbaycan ərazisində “Dağlıq Qarabağ” adlı inzibati ərazi vahidi yoxdur. İkincisi, söhbət Qarabağın erməni əhalisindən gedirsə, onların hüquq və təhlükəsizliyi baxımından Azərbaycanın müəyyənləşdirdiyi məsələlər var. Bir az əvvəl bildirdik ki, Qarabağ erməniləri də ölkəmizdə yaşayan digər xalqlar kimi eyni hüquqlara malikdirlər. Onlar indiki durumda öz hüquqlarından məhrum vəziyyətdədirlər. Ona görə ki, bölgədəki separatçı rejim buna maneə törədir. Ermənistan dövləti və hakimiyyəti isə Qarabağ erməniləri üçün hüquq və təhlükəsizlik ritorikası ilə daha çox həmin separatçı rejimin müdafiəsinə köklənib.
Yəni, yaxşı olardı ki, ABŞ Dövlət Departamenti həm haqqında söz açdığımız sorğuya cavaba konkret yanaşaydı. Bu gələcəkdə mümkün olacaq sorğu cavablarına da dürüst və obyektiv mövqenin göstərilməsi baxımından vacibdir. Nəzərə alaq ki, belə olduqda Birləşmiş Ştatlar yekun sülh prosesinə daha çox töhfə vermiş olar. İndiki durumda isə Dövlət Departamentinin qətiyyətsiz təsiri bağışlayan cavabı əslində Qarabağdakı erməni separatizminə, bir növ, qol-qanad verməkdə, heç də hər şeyin itirilmədiyinə dair ümid formalaşdırmaqdadır. Bunu erməni mediası və cəmiyyəti vurğulayır və mövcud vurğulanma istər Ermənistanın ictimaiyyətində, istər avantürist hakimiyyətində, istəsə də Qarabağdakı separatçı rejimdə illüziya yaradır. Unutmaq olmaz ki, illüziyalar sonradan ziyanlı nəticələr doğurmaq təbiətinə malikdir.
R.ƏVƏZ, “Xalq qəzeti”