Kollektiv Təhlükəsizlik Müqaviləsi Təşkilatına (KTMT) üzv ölkələrin müdafiə nazirlərinin Minsk toplantısında əsas mövzu koalisiya əməkdaşlığı məsələləri olub. Bu barədə məlumat verən KTMT-nın mətbuat katibi Vladimir Zaynetdinov onu da bildirib ki, toplantı iştirakçıları KTMT-yə üzv ölkələrin kollektiv təhlükəsizlik regionlarında hərbi təhlükəsizliyə çağırışları və təhdidləri, eləcə də böhrana cavab sisteminin daha da təkmilləşdirilməsi inkanları ilə bağlı məsələləri müzakirə ediblər.

V.Zaynetdinovun sözlərinə görə, KTMT-nin Minsk toplantısında kollektiv təhlükəsizlik sisteminin silahlı qüvvələr və vasitələrinin komandanlıq-nəzarət orqanlarının, birləşmələrinin birgə ha­zırlığı, hərbi-texniki əməkdaşlıq, digər məsələlərlə bağlı sənədlər nəzərdən keçirilib.

Məlumatda o da qeyd olunur ki, Be­larusun müdafiə naziri Viktor Xreninin sədrliyi ilə keçən iclasda KTMT-nin baş katibi İmanqali Tasmaqambetov və ko­alisiyanın Birləşmiş Qərargah rəisi Ana­toli Sidorov iştirak ediblər. Koalisiyaya üzv ölkələrin müdafiə nazirləri Şurası­nın Minsk toplantısında Ermənistanı təşkilatın Birləşmiş Qərargahındakı nü­mayəndəsi Artak Tonoyan təmsil edib.

Minskdə KTMT-yə üzv ölkələrin mü­dafiə nazirləri Şurasının iclasında çıxış edən Rusiyanın müdafiə naziri Sergey Şoyqu Ermənistan tərəfinin KTMT çər­çivəsində keçirilən operativ və hərbi ha­zırlıq üzrə birgə tədbirlərdə iştirakının vacibliyini bildirib. 

“Ermənistan təşkilatımızın üzvüdür, bizim müttəfiqimizdir. Biz öz tərəfimiz­dən Cənubi Qafqazda sülhün və sa­bitliyin bərqərar olmasında maraqlıyıq və bundan ötrü mümkün olan hər şeyi edirik. Bu zaman Ermənistanın KTMT çərçivəsində birgə operativ və hərbi hazırlıq üzrə tədbirlərində iştirakının vacibliyini xüsusi qeyd etmək istərdim”, – deyə Şoyqu vurğulayıb. Çıxışında Сənubi Qafqazdakı mövcud vəziyyətə, Ermənistan–Azərbaycan münasibətlə­rinin nizamlanması prosesinə toxunan S.Şoyqu hazırda bölgədə təhlükəsizli­yin Rusiya sülhməramlıları tərəfindən təmin edildiyini, həmçinin Qərbin duru­ma müdaxilə və regionda iştirakını ar­tırmaq cəhdlərinə də toxunub: “Qərbin məqsədi bölgədə sülhə və uzunmüd­dətli sabitliyə nail olmaq deyil, Rusiya­nı Cənubi Qafqazdan sıxışdırıb çıxart­maqdır”.

Yeri gəlmişkən, məlumata bir zəruri əlavəni etməyi lazım bilirik. Bir müddət bundan əvvəl rəsmi İrəvan KTMT-nin hərbi təlimlərində iştirakdan imtina edə­cəyi, hətta bu qurumdam çıxacağı barə­də açıqlama yaymışdı. Bununla bağlı Rusiya Dövlət Dumasının beynəlxalq məsələlər komitəsi sədrinin müavini Dmitri Novikov Ermənistan rəhbərliyinin diqqətinə “bəzi incə məqamları”, konk­ret fakt və sübutları çatdırmışdı. O, hər­bi koalisiyadan çıxmağın Ermənistanın maraqlarına heç də cavab vermədiyini bildirmiş, Paşinyan hökumətinə belə bir qərarı qəbul etməzdən öncə ölkəsinin mənafeyi barədə ciddi düşünməyi töv­siyə etmişdi.

Düzdür, açıqlamasında Moskvanın Ermənistana edə biləcəyi təzyiqləri barədə bir söz deməsə də, D.Noviko­vun yuxarıdakı sözlərini Kremlin Nikol Paşinyana ciddi ismarıc-xəbərdarlığı kimi dəyərləndirmək lazımdır. Aydın məsələdir ki, Dumanın komitə sədrinni müavini KTMT üzvlüyündən çıxmağın Ermənistan dövlətinin maraqlarına ca­vab vermədiyini söyləməklə, həm də bunun müqabilində Rusiyanın İrəva­na qarşı atacağı adekvat addımlarını nəzərdə tuturdu. Yəqin KTMT-nın Minsk toplantısında iştirak etməklə Ermənitan iqtidarı buraxdığı yanlışlığın üstünü ört­məyi düşünüb.

İ.HƏSƏNQALA, “Xalq qəzeti”