Bu günlərdə Türkiyənin Əmanətlərin Sığortalanması Fondunun (TƏSF) nümayəndə heyəti ölkəmizdə rəsmi işgüzar səfərdə olub. Fondun rəhbəri Fatin Rüştü Karakaş, fond rəhbərinin müavini və “YAZ Bilgi Sistemleri” İdarə Heyətinin sədri Melek Küreeminoğlu, “YAZ Bilgi Sistemleri”nin baş direktoru Fatih Hastürk və biznesin inkişafı üzrə meneceri Gökberk Yılmazın daxil olduğu olan nümayədə heyətinin səfərində əsas məqsəd Əmanətlərin Sığortalanması Fondunun rəhbərliyi ilə görüşün keçirilməsi, qarşılıqlı təcrübə mübadiləsi və hər iki tərəfi maraqlandıran məsələlərin müzakirəsi olub.

Səfərin ilk günü qonaqlar Fəxri xiyabanda ümummilli lider Heydər Əliyevin abidəsini ehtiramla yad etmiş, məzarı üzərinə gül-çiçək dəstələri düzüblər. Həmin gün nümayəndə heyəti Şəhidlər xiyabanını və Bakıdakı “Türk Şəhidliyi” abidəsinə də ziyarət ediblər.

Səfərin ikinci günü ƏSF və TƏSF arasında geniş tərkibdə görüş keçirilib. Görüşü ƏSF-nin icraçı direktoru Tural Piriyev açaraq qonaqları salamlamış, rəhbərlik etdiyi qurum haqqında qısa məlumat vermişdir. Sonra fondun Risklərin idarə edilməsi, təhlil və investisiya departamentinin direktoru fond barədə ümumi məlumatı əks etdirən, Maliyyə Departamentinin direktoru Vüqar Aslanzadə fondun maliyyə vəziyyəti barədə, Hüquq Departamentinin direktoru Azər Əmirov hüquqi məsələlərlə bağlı, İT və təhlükəsizlik departamentinin direktoru Emil Quliyev isə fondun fəaliyyətində informasiya texnologiyalarının tətbiqi məsələləri ilə bağlı təqdimatlarla, habelə qarşılıqlı müzakirələr və məlumat mübadilələri ilə davam edib.

Görüşdə TƏSF rəhbəri Fatin Rüştü Karakaş Türkiyə Respublikasında əmanətlərin sığortalanması və ləğvetmə prosesinin xüsusiyyətləri haqqında ümumi məlumatları əhatə edən təqdimatla çıxış edib.

Tədbir çərçivəsində ƏSF-nin müvafiq struktur bölmə rəhbərləri və əməkdaşları ilə “YAZ Bilgi Sistemleri” şirkətinin nümayəndələri arasında həmin şirkətin təklif etdiyi xidmətlər, məhsullar və TƏSF-də tətbiq edilən informasiya texnologiyaları həlləri barədə təqdimatları və məlumat mübadiləsini əhatə edən ayrıca görüş də keçirilib.