Heydər Əliyev Mərkəzində Mədəniyyət Nazirliyinin təşkilatçılığı ilə keçirilən “Mədəniyyət və Yaradıcı Sənayelər Forumu” başa çatıb. Üç gün davam edən forumda müvafiq dövlət qurumlarının rəhbərləri və yaradıcı sektor təmsilçilərinin iştirakı ilə ayrı-ayrı sahələr üzrə yaradıcı sənayelərə dair panel sessiyalar keçirilib.

Forum çərçivəsində “Türk dünyası animasiya şəbəkəsinin qurulması”, “Türk dünyasının yumor sahəsi üzrə əməkdaş­lıq perspektivləri” və digər mövzularda dəyirmi masalar da təşkil olunub. Həm­çinin “Yaradıcı müzakirələr” (“Creative Talks”) layihəsi də təşkil edilib. Tədbirlər ərəfəsində “Mədəniyyət sahəsində inno­vasiyalar: qabaqcıl texnologiyalar, süni zəka, oyun texnologiyaları” adlı panel sessiya təşkil edilib. Panelin moderatoru İtaliyanın "CultTech akselerator" layihəsi­nin nümayəndəsi Marino Pasquale olub. Paneldə startapçıların mədəniyyət sahə­sinə kütləvi girişinin təmin edilməsi, yeni iqtisadi modellərin inkişaf etdirilməsi, in­sanların etmək istədikləri yeniliklər barə­də fikirlərini və ideyalarını bölüşmələri, süni intellekt və texnologiyanın gücü ilə insanların həyatının asanlaşdırılması və yeni texnologiya imkanlarından səmərəli istifadə mövzusunda müzakirələr təşkil olunub. 

“Rəqəmsal dövrdə rəqabətqabiliyyətli audiovizual sahənin formalaşdırılma­sı” mövzusunda animasiya sahəsində görülən işlər, blogerlərin bilik və təcrü­bələrini dünya auditoriyası ilə bölüşmək, qısametrajlı film layihələrinin inkişafına dair maarifləndirici proqramların yaradıl­ması, müxtəlif tədbirlərin təşkili, sosial şəbəkələr vasitəsilə yaradıcı məhsulların və xidmətlərin satışını təşkil etmək və di­gər mövzularda fikir mübadiləsi aparılıb. Panel sessiyada iştirakçıları maraqlandı­ran suallar cavanlabdırılıb. 

Forumun son günündə isə sonuncu panel sessiyası gerçəkləşib. Azərbay­can Respublikası Vəkillər Kollegiyasının üzvü Nazlı Əhmədovanın moderatorluğu ilə keçirilən panel "Mədəniyyət və yara­dıcı sənayelər Milli Prioritet kimi" möv­zusuna həsr olunub.Tədbirdə Prezident İlham Əliyevin 22 iyul 2022-ci il tarixli Sərəncamı ilə təsdiq edilmiş “Azərbay­can Respublikasının 2022-2026-cı illərdə sosial-iqtisadi inkişaf Strategiyası”nda mədəni yaradıcı sənayenin inkişaf etdi­rilməsi, onun ÜDM-də payının artırılması kimi məsələlər də əksini tapıb. Strategi­yada nəzərdə tutulan hədəflərə çatmaq üçün nazirlikdə yaradıcı sənayelər üzrə işçi qrupu formalaşdırılıb. 

Qrupun dəstəklənməsi üçün digər dövlət qurumları tərəfindən nümayən­dələr müəyyən edilib. İl ərzində 5 yer­li təhsil proqramına start verilib və bu məqsədlə edu.creative.az informasiya resursu yaradılıb. Hazırda yaradıcı təhsil üzrə təqaüd proqramı və yerli sənaye su­byektlərinin elektron kataloqu hazırlanır. Həyata keçirilən tədbirlər əsasən yeni yaradıcı məhsulların hazırlanmasına yönəlib. Başlıca məqsəd ölkədə sənaye zəncirinin reallaşmasına şərait yaratmaq, yaradıcı sənaye məhsullarının regional və beynəlxalq müstəviyə çıxmasına nail olmaqdan ibarətdir. Forumda həmçi­nin yaradıcı sənayedə əqli mülkiyyətin rolu, bu sahənin idarə edilməsi barədə fikirlər səsləndirilib. Qeyd olunub ki, ya­radıcı şəxslərin sahibkarlıq fəaliyyətinə başlaması, sektorun ixrac potensialının artırılması, kreativ məhsulların ölkə xa­ricinə çıxarılması üçün lazımi köməklik göstərilir. Bu prosesdə davamlı inkişaf üçün dövlət və özəl əməkdaşlığı əhə­miyyətlidir. Panel sessiyada iştirakçıları maraqlandıran suallar cavablandırılıb, səsləndirilən təkliflər barədə fikir müba­diləsi aparılıb.

“Mədəniyyət və Yaradıcı Sənayelər Forumu” çərçivəsində “Mədəniyyət və Yaradıcı Sənayelər Sərgisi” (MY EXPO 2023) açılıb. Forum müddətində nüma­yiş olunan sərgidə yaradıcı sənaye nü­mayəndələrinin iştirakı ilə kreativ məhsul­lar təqdim olunub. Sərgi kino, animasiya, musiqi, oyun texnologiyaları, dəb, dizayn kimi yaradıcı sahələri, həmçinin yaradıcı məkan və regionları da bir araya gətirib.

“Yaradıcı həftə” çərçivəsində Ümum­milli Lider Heydər Əliyevin 100 illik yubi­leyi münasibətilə 10 yaradıcı sahə üzrə Quba, Bakı, Sumqayıt, Lənkəran, Naxçı­van, Gəncə, Mingəçevir, Şəki, Şamaxı və Şuşada ümumilikdə 100 tədbirin keçiril­məsi də nəzərdə tutulur.

Qeyd edək ki, “Mədəniyyət və Yaradı­cı Sənayelər Forumu” dünən başa çatıb.

Fidan SALMANOVA
XQ