Prezidentin Cəbrayıl, Qubadlı və Zəngilan rayon­larında xüsusi nümayəndəsi Vahid Hacıyev Rusiyanın Tatarıstan Respublikasının Rəisi Rüstəm Minnixanov­la görüşüb. 

Hökumət Evinin ofisində baş tutan görüşdə xüsusi nümayəndə ilə yanaşı, onun müavini Səbuhi Mehdizadə, Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidmətinin İcraçı direktoru Növrəs Cəfərov da iştirak ediblər. 

Rüstəm Minnixanov çıxışında hazırkı işgüzar əlaqələrin davam etdirilməsinin Rusiya–Azərbaycan münasibətlərinin gələcək inkişafı çərçivəsində vacibliyini vurğulayıb. Tatarıstanın Rəisi Azərbaycana işgüzar səfərini xatırlayaraq Cəbrayıl, Qubadlı və Zəngilan rayon­larında bərpa-quruculuq işlərinin sürəti barədə olan müsbət təəssü­ratlarını qeyd edib. Sonra birgə layihələrin müzakirəsi olub, digər aktual mövzulara da toxunulub.

Vahid Hacıyevin Tatarıstana işgüzar səfəri Rüstəm Minnixano­vun dəvəti əsasında baş tutub. Üç gün davam edəcək səfər zamanı Kazan və İnnopolis şəhərlərində bir sıra dövlət və özəl qurumlarda görüşlərin keçirilməsi nəzərdə tutulub.

XQ