Dünən Avrasiya Yazarlar Birliyinin sədri Yaqub Öməroğlu Azərbaycan Mətbuat Şurasında olub.
Tanınmış ədibi salamlayan MŞ sədri Rəşad Məcid AMEA Nizami Gəncəvi adına Ədəbiyyat İnstitutunun 90 illik yubiyində iştirak etmək üçün ölkəmizə gəlmiş qonağın Türk dünyası ədəbi prosesinin inkişafında səmərəli fəaliyyətini qeyd edib. O bildirib ki, yazıçının qurucusu olduğu Avrasiya Yazarlar Birliyi, habelə “Qardaş qələmlər” dərgisi ədəbi-mədəni əlaqələr baxımından türk coğrafiyasının arealını hər zaman geniş tutması ilə fərqlənib. Bu fəaliyyət dəst-xətti nəsillərə örnək missiyadır və türk xalqlarının bir-birnə yaxınlaşmasına, onlar arasındakı bağların möhkəmləndirilməsinə müstəsna xidmət nümunəsidir.
Milli Məclisin deputatı, “Ədalət” qəzetinin təsisçisi Aqil Abbas bildirib ki, Yaqub Öməroğlunun türk xalqlarının birliyi ideyasına illərdən bəri önəmli töhfələr verib. Artıq Azərbaycan–Türkiyə qardaşlığı türk dünyasının ruhunu müəyyənləşdirir, bütövləşdirici rol oynayır.
Avrasiya Yazarlar Birliyinin sədri Yaqub Öməroğlu başçılıq etdiyi qurumun gördüyü işlərdən söz açaraq bildirib ki, birlik Azərbaycanda və Türkiyədə, eləcə də Türk dünyasının müxtəlif ölkələrində fəaliyyətini uğurla davam etdirir.
XQ
