Fevralın 7-də keçiriləcək növbədənkənar prezident seçkilərinə ölkə hüdudlarından kənarda yaşayan həmvətənlərimiz də böyük maraq göstərirlər. Onlar seçkinin keçiriləcəyi günü səbrsizliklə gözləyir və Zəfər seçkisində iştirak etməkdən qürur duyurlar. Ən əsası ona görə ki, ilk dəfə olaraq seçkilər Azərbaycanın bütün ərazilərində keçiriləcək.
Məlumdur ki, 44 günlük Vətən müharibəsindən və ötən ilin sentyabrında Qarabağda keçirilmiş bir günlük antiterror əməliyyatından sonra Azərbaycanın ərazi bütövlüyü tam bərpa olundu. Hazırda işğaldan azad edilmiş bütün ərazilərimizdə Azərbaycan Bayrağı dalğalanır. Bu baxımdam növbədənkənar prezident seçkilərinin bütün ərazilərimizdə keçirilməsi qürurverici haldır. Bu, hər bir soydaşımızın, eləcə də dünya azərbaycanlılarının ən böyük arzusu idi.
Xaricdə yaşayan həmvətənlərimiz də Qarabağda keçiriləcək növbədənkənar Azərbaycan Respublikası Prezidenti seçkilərini səbrsizliklə gözləyirlər. Bunu qardaş Türkiyənin Əskişəhər Azərbaycanlıları Dərnəyinin sədri Cavid Məmmədov deyib. O, prezident seçkilərinin hər kəsin ürəyindən gələn bir hadisə olduğunu bildirib. Azərbaycanın ərazi bütövlüyü tam bərpa olunduqdan sonra seçkilərin ilk dəfə ölkənin bütün ərazisində keçirilməsi bayram ab-havası yaradıb.
Torpaqlarımızın işğal altında qaldığı dövrdə hər kəsin ürəyinin yaralı olduğunu bildirən dərnək sədri deyib ki, əvvəlki seçkilər zamanı hamının arzusu növbəti seçkilərin Qarabağı da əhatə etməsi idi. Hər kəs bu şüarları səsləndirirdi. İndi Azərbaycan bütün torpaqlarını işğaldan azad edib və xalqımızın arzusu yerinə yetib. Azərbaycan artıq yeni dövrə qədəm qoyub və bu dövrdə güclü addımlar atması üçün prezident seçkiləri mütləq idi. O, əminliklə bildirib ki, Azərbaycan xalqı doğru qərar verəcək. Bu seçkilər xaricdə yaşayan soydaşlarımızı da sevindirir.
Seçicilərdə böyük ruh yüksəkliyinin, xoş əhval-ruhiyyənin olduğunu söyləyən C.Məmmədov bildirib ki, Əskişəhər Azərbaycanlıları Dərnəyinin üzvü olan soydaşlarımız da seçkilərdə yüksək fəallıqla iştirak edəcəklər. Dərnək rəhbəri deyib ki, son illər Azərbaycanda keçirilən bütün seçkilər demokratikliyinə, şəffaflığına görə hər birmizdə qürur doğurur. Bu seçkilərin də azad və ədalətli keçirilməsi ilə Azərbaycan demokratik prinsiplərin inkişafına xüsusi önəm verdiyini nümayiş etdirəcək.
XQ