Hazırda respublikamızda və xarici ölkələrdəki diplomatik korpuslarda növbədənkənar prezident seçkilərinə ciddi hazırlıq işləri davam etdirilir. Qazaxıstanda yaşayan vətəndaşlarımızın seçki hüququnun təmin edilməsi məqsədilə Azərbaycan Respublikasının bu ölkədəki səfirliyi tərəfindən mütəmadi olaraq müvafiq tədbirlər həyata keçirilir. Səfirlikdən verilən məlumata görə, vətəndaşlarımızın seçkilərdə səs vermələrinin təmin olunması üçün bütün imkanlardan istifadə olunur.
Azərbaycan Respublikasının Qazaxıstandakı səfirliyi tərəfindən bu ölkədə daimi və ya müvəqqəti yaşayan Azərbaycan vətəndaşlarının fevralın 7-nə təyin olunmuş növbədənkənar prezident seçkilərində səs vermələrinin təmin olunması üçün qanunvericilikdə nəzərdə tutulmuş bütün zəruri tədbirlər həyata keçirilməkdədir. Səfirliyin açıqlamasında qeyd olunur ki, ilkin müşahidələr seçici fəallığının yüksək olacağına əminlik yaradır. Qazaxıstanda yaşayan Azərbaycan vətəndaşlarına səsvermədə iştirak etmələri üçün müraciət olunaraq, seçkilərdə iştirak qaydalarına dair ətraflı məlumat verilib və onlar seçkidə fəal iştiraka dəvət olunub.
Həmçinin, səfirliyin və Almatı şəhərində konsulluq qeydiyyatında olan aktiv seçki hüququna malik vətəndaşlarımızın siyahısı tərtib olunaraq Azərbaycan Mərkəzi Seçki Komissiyasına təqdim olunub. Qazaxıstanda yaşayan vətəndaşlarımızın seçki hüquqlarının təmin edilməsi məqsədilə paytaxt Astana şəhərində yerləşən səfirlikdə, səfirliyin Almatı şəhərindəki ofisində, eləcə də Aktau şəhərindəki Baş Konsulluqda qanunvericiliyə uyğun olaraq seçki məntəqələri yaradılıb.
Əliqismət BƏDƏLOV
XQ