Bu fikri TASS agentliyinə müsahibəsində Azərbaycanın Rusiyadakı səfiri Polad Bülbüloğlu bildirib.
Diplomatik nümayəndəliyimizin rəhbəri xüsusi olaraq qeyd edib ki, 2024-cü il fevralın 7-nə nəzərdə tutulan növbədənkənar prezident seçkiləri sözün əsl mənasında müstəqil Azərbaycanın bütün ərazisini əhatə edəcək. Artıq azad olunmuş ərazilərdə məntəqə seçki komissiyaları formalaşdırılıb, səsvermə üçün hər cür şərait yaradılıb.
P.Bülbüloğlu deyib: “Şübhəsiz ki, yuxarıda sadaladıqlarım onu deməyə əsas verir ki, həm Azərbaycandakı, həm də onun hüdudlarından kənardakı vətəndaşlarımız yüksək fəallıq nümayiş etdirəcək, çiçəklənən və qüdrətli Azərbaycan naminə düzgün seçim edəcəklər”.
Səfir deyib ki, Rusiyada yaşayan Azərbaycan vətəndaşları növbədənkənar Azərbaycan Respublikası Prezidenti seçkilərinə böyük maraq göstərirlər: “Moskvadakı səfirliyimiz növbədənkənar prezident seçkilərinin keçirilməsinə hazırdır. Bu, mənim Moskvada uzun illər fəaliyyət göstərdiyim müddətdə səfirliyimizdə keçirilən birinci seçkilər deyil, yəni artıq təcrübə var. Amma bu dəfə Rusiyada yaşayan vətəndaşlarımızın daha böyük ruh yüksəkliyinin şahidi oluram”.
P.Bülbüloğlu bildirib ki, Moskva ilə yanaşı, Azərbaycanın baş konsulluqlarının yerləşdiyi Sankt-Peterburq və Yekaterinburqda da seçki məntəqələri açılacaq.
Əliqismət BƏDƏLOV
XQ