Türkiyədə yaşayan görkəmli azərbaycanlı alim və siyasi xadim, qardaş dövlətin Prezident Administrasiyasının təhlükəsizlik və xarici siyasət komissiyasının üzvü professor Aygün Attara 2024-cü ilin ilk günlərində ölkə daxilindən və Avropadan ikiqat mükafat xəbəri gəlib.
İstanbulda 6-cı Qadın Sahibkarlara Dəstək Zirvəsinin “Güclü qadınlar, güclü sabahlar” mövzusunda keçiriləcək mərasimində mükafatlar Türk dünyasının ictimai-siyasi həyatında uğur qazanan qadınlara təqdim olunacaq. “Türk dünyası ödülü” kateqoriyasında təltifdə görkəmli azərbaycanlı professor Aygün Attarın da adı yer alır. Münsiflər heyətinin qərarında bildirilir ki, “Bir millət, iki dövlət” siyasəti çərçivəsində uğurlu addımlar atmış Aygün Attar Azərbaycanın inkişaf layihələrinin təbliğinə dəyərli töhfələr verib.
Avropa Beynəlxalq Diplomatlar Birliyi tərəfindən verilmiş digər nüfuzlu mükafat da Türkiyədən namizəd göstərilən professor Aygün Attara verilib. Avropanın mötəbər qurumlarından olan və 24 il əvvəl Avropa Şurasının məsul vitse-prezidenti Günter Verheugenin dəstəyi ilə avropalı diplomatlar tərəfindən yaradılan DWM Diplomatlar Assosiasiyası Avropa Şurası və Birləşmiş Millətlər ECOSOCtərəfindən akkreditə edilib, qərərgahı Almaniyada yerləşir.
Avropa Beynəlxalq Diplomatlar Birliyinin qərarında bu fikirlər yer alıb: “30 ilə yaxın erməni işğalı altında qalan Qarabağda və Şərqi Zəngəzurda doğulmuş, məcburi köçə məruz qalmış bir ailənin övladı olan professor Aygün Attar “Beynəlxalq Sülh və Akademiya” mükafatına layiq görülüb. Çoxsaylı akademik araşdırmaları, iştirakçısı olduğu populyar televiziya proqramlarında çıxışları, ölkə daxilində və xaricdə təqdim etdiyi konfranslar vasitəsilə Türkiyə və Azərbaycanın Avropa coğrafiyasında tarixi, siyasi və mədəni baxımdan layiqincə tanıdılması istiqamətindəki səyləri, rəhbərlik etdiyi təşkilat vasitəsi ilə vətəndaş cəmiyyətinə göstərdiyi müstəsna xidmətlərinə görə, ictimai təşkilatlar vasitəsilə dünyada sülhün dəstəklənməsi və tolerantlığın təşviqi istiqamətində ciddi işlərə öncüllük etmiş, Türkiyə ilə Azərbaycan arasında əlaqələrin inkişafında körpü rolunu oynamış professor Aygün Attar beynəlxalq miqyasda – xaricdə, xüsusən də Avropada yaşayan soydaşları və nüfuzlu qeyri-hökumət təşkilatları ilə uğurlu mədəniyyət şəbəkəsi yaratdığına görə mükafat komissiyasının birgə qərarı ilə təltif edilir.
EBCA Avropa Biznes Klubu Assosiasiyası, DC Diplomatik Şurası, Ərəb-Türk İş Şurası, Enviro Kare, Lucas Nülle kimi beynəlxalq mötəbər qurum və təşkilatlarla əməkdaşlıq edən Avropa Beynəlxalq Diplomatlar Birliyinin mükafatlandırma mərasimi bu ilin mart ayında Almaniyanın Frankfurt şəhərində keçirilən beynəlxalq mərasimdə baş tutacaq.
Sözardı: Xatırladaq ki, professor Aygün Attar Azərbaycan Prezidenti İlham Əliyev tərəfindən 2016-cı ildə “Vətənə xidmət” ordeni, 2022-ci ildə “Dostluq” ordeni ilə təltif edilib. Türkiyə Prezidenti Rəcəb Tayyib Ərdoğanın Azərbaycana səfərləri zamanı rəsmi nümayəndə heyətinin tərkibində olub. Təbrizli iş adamı ilə ailə həyatı quran və hər fürsətdə Təbriz gəlini olduğunu qürurla vurğulayan Aygün Attar üç övlad anasıdır, bir nəvəsi də var.
Əslən Şərqi Zəngəzurdan olan Aygün Attar Bakı Dövlət Universitetini bitirib, Rusiya Elmlər Akademiyasında doktorluq dissertasiyasını uğurla müdafiə edib. Ömrünün 30 ilindən çoxunu Türkiyədə yaşayan soydaşımız 2012–2016-cı illərdə Girəsun Universitetinin rektoru olub. Ermənilərin Azərbaycan və Anadolu türklərinə qarşı törətdiyi soyqırımlara həsr olunmuş çoxsaylı kitabların, silsilə məqalələrin müəllifidir. İki kitabı dərs vəsaiti kimi tədris edilir.
Nüfuzlu ictimai-siyasi xadim olan professor Aygün Attar Türkiyəyə, Azərbaycana qarşı qərəzli fəaliyyət göstərən erməni lobbisi və onun uzantılarıyla illərdir yorulmadan mübarizə aparır. O, Türkiyə Böyük Millət Məclisində türk düşmənliyi fəaliyəti ilə tanınan erməni əsilli Karo Paylanın deputat mandatının huquq çərçivəsində ləğvinə, Qarabağ məsələsində Ermənistanın ədalətsiz mövgeyini müdafiə edərək Azərbaycanı ittiham edən HDP sədri Səlahaddin Dəmirtaşın Vətənə xəyanətdə suclanmasına və haqqında cinayət işinin başladılmasına nail olmub.
ATƏT-in beynəlxalq müşahidəçisi statusunu daşıyan Aygün Attar son parlament seçkilərində ATƏT-in Azərbaycana qarşı yönəlmiş qərəzli və haqsız mövqeyini tənqid etməkdən çəkinməyib, haqlı etirazı ilə bu nüfuzlu beynəlxalq təşkilata ciddi tarixi “dərs verib”.
Professor Aygün Attar elmi yaradıcılıqla bərabər, diaspor fəaliyyəti ilə də davamlı məşğul olur. 2021-ci ildən Türkiyə Prezident Administrasiyasının təhlükəsizlik və xarici siyasət komissiyasının üzvü, 2019-cuildən Türkiyə–Azərbaycan Dostluq, Əməkdaşlıq və Həmrəylik Fondunun sədridir. Bilkənd Universitetinin qurucusu, professor İhsan Doğramacının 1997-ci ildə təsis etdiyi Fondun ölkələrimiz arasında əlaqələrinin inkişafında xüsusi yeri var. Ümummilli lider Heydər Əliyevin professor İhsan Doğramacı ilə səmimi dostluq münasibətləri fondun qısa müddətdə tanınmasına, inkişafına və nüfuz qazanmasına böyük təsir göstərib.
Bu ənənə bu gün də uğurla davam etdirilməkdədir və hazırda professor Aygün Attarın rəhbərlik etdiyi fond ümummilli lider Heydər Əliyevin “Bir millət, iki dövlət” kəlamından qaynaqlanan tarixi missiyanın həyata keçirilməsində çox əhəmiyyətli işlər görməkdədir.
XQ