Paytaxt Bakıda, eləcə də Gəncə, Sumqayıt, Mingəçevir və digər şəhərlərdə əlaqədar qurumlar geniş abadlıq işləri aparırlar. Sakinlər də bu işlərə öz töhfələrini verməli, ən azı, səliqə-sahmanı qorumalı, şəhərlərin estetik görkəminə xələl yetirməməlidirlər.
Təəssüf ki, bəzən bunun əksi ilə rastlaşırıq. Məsələn, avtobus dayanacaqlarında “Kirayə ev”, “İşçi axtarılır”, “Dayə lazımdır”, “Torpaq satılır” və digər belə elanlara tez-tez rast gəlinir. Məsələ burasındadır ki, dayanacaqlarda reklam və elanları yapışdırmaq üçün müəyyən hissələr ayrılıb və bunun üçün ödəniş etmək tələb olunur. Amma bundan yayınan şəxslər necə gəldi, elan çap edərək, bəsit şəkildə dayanacaq şüşələrinə vururlar. Ala-bula elanlar solur, cırılır, üst-üstə yapışdırılır, görüntüyə maneə törədir. Onsuz da xırda ticarət köşklərinin bərbad hala saldığı dayanacaqlar bir az da pinti məkana çevrilir. Hələ biz belə mənzərələrin qonaqlarda necə xoşagəlməz təəssürat yaratdığını demirik.
Xatırladaq ki, “Reklam haqqında Azərbaycan Respublikası Qanunu”nda açıq məkanda reklamla bağlı tələblərin pozulmasına görə fiziki şəxslər üçün 300–500 manat, vəzifəli şəxslər üçün 1500–2min 500 manat, hüquqi şəxslər üçünsə 5min–10 min manat cərimə nəzərdə tutulub.
Hər kəs bilməyə borcludur ki, reklam istehlakçısının diqqətini bu cür eybəcər üsullarla cəlb etmək tamamilə yolverilməzdir. Qanunun icrasına nəzarət etməli olan qurumlar da vəzifə borclarına daha məsuliyyətli yanaşmalı, dayanacaqların havayı reklam lövhələrinə cevrilməsinə göz yummamalıdırlar.
Ə.DOSTƏLİ
XQ