Dünən Yeni Azərbaycan Partiyasının Mərkəzi Aparatının təşkilatçılığı ilə ümummilli lider Heydər Əliyevin anadan olmasının 100-cü ildönümünə həsr olunmuş “Heydər Əliyev ideyalarının təntənəsi: şanlı Zəfərdən yeni zirvələrə” mövzusunda toplantı keçirilib.
YAP Sədrinin müavini – Mərkəzi Aparatın rəhbəri Tahir Budaqov bildirib ki, Ümummilli liderin anadan olmasının 100-cüildönümünün qeyd olunduğu 2023-cü il Azərbaycan xalqının və dövlətinin tarixinə müstəsna əhəmiyyət daşıyan bir dövr kimi həkk olunub: “Ulu öndərin ideyaları əsasında və Prezident İlham Əliyevin rəhbərliyi ilə həyata keçirilən məqsədyönlü siyasət nəticəsində istər ölkə daxilində, istərsə də beynəlxalq aləmdə mühüm nailiyyətlər qazanılmış, Azərbaycanın iqtisadi və siyasi imkanları genişlənmiş, qlobal arenada mövqeyi daha da möhkəmlənmişdir. 2020-ci ildə əldə edilmiş möhtəşəm Qələbə ilə qaytardığımız bütün torpaqlarımızda suverenliyimiz də tam bərpa olunmuş, Azərbaycan bayrağı digər ərazilərdə olduğu kimi Xankəndidə də ucaldılmışdır”.
Azərbaycan Respublikasının Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov, YAP Veteranlar Şurasının üzvü, tarix elmləri doktoru Dilarə Seyidzadə, “Azərbaycan bayrağı” ordenli şəhid Nurlan Mustafayevin anası Rəhilə Ramazanova və Vətən Müharibəsi Qəhrəmanı, polkovnik-leytenant Anar Mirzəyev dünya şöhrətli siyasətçi, müstəqil Azərbaycan dövlətinin qurucusu Heydər Əliyevin xalqımız qarşısında misilsiz xidmətlərindən söz açıblar, Ulu öndərin xatirəsinə dərin ehtiramlarını ifadə ediblər.
Çıxış edənlər bildiriblər ki, Ümummilli liderin yaratdığı Yeni Azərbaycan Partiyası onun ideya və əməllərinin gerçəkləşməsinin avanqard qüvvəsidir.
XQ