AMEA-nın Naxçıvan Bölməsində Naxçıvan Muxtar Respublikası Dövlət Müdafiə Komitəsinin əks-kəşfiyyat şöbəsinin sabiq rəisi, Heydər Əliyevin səlahiyyətli hərbi nümayəndəsi Urfullah Qurbanovun “Naxçıvan” Universitetinin baş müəllimi Rəna Qurbanova ilə birgə hazırladığı “Xüsusi tapşırıq” kitabının təqdimat mərasimi olub.
AMEA Naxçıvan Bölməsinin sədri, akademik İsmayıl Hacıyev giriş sözündə bildirib ki, “Xüsusi tapşırıq” kitabı Ümummilli lider Heydər Əliyevin 100 illiyinə həsr olunub: “Naxçıvana gəldikdən sonra bölgəni blokadadan çıxarmaq, qoruyub-saxlamaq, əhalinin yaşayışını təmin etmək kimi çətin və məsuliyyətli vəzifələrin icrasına başlayan Ulu öndərin təşəbbüsü ilə Dövlət Milli Müdafiə Komitəsi yaradılıb. Komitənin əks-kəşfiyyat şöbəsinin rəisi Urfullah Qurbanov bu planın icrasında fəallıq göstərib. U.Qurbanov Gəncədən lazım olan silah və avadanlıqları təyyarə ilə Naxçıvana gətirib, bu sıradan başqa mühüm tapşırıqları uğurla həyata keçirib”.
Təqdimat mərasimində kitabın redaktoru, muxtar respublikanın Əməkdar jurnalisti Səbuhi Həsənov yeni nəşr barədə ətraflı məlumat verib, Ulu öndərin xilaskarlıq fəaliyyətinin Naxçıvan dövrünün öyrənilməsində kitabın önəmindən bəhs edib. Türkiyənin Naxçıvandakı baş konsulu Asip Kaya uzun illərdən bəri blokada və erməni quldurlarının davamlı basqılarının dəf edilməsi şəraitində yaşamış muxtar respublika əhalisinin mübarizliyindən, Ulu öndər Heydər Əliyevin fəaliyyətinin Naxçıvan dövrünün mühüm tarixi-siyasi hadisələrindən söz açıb.
Mərasimdə “Yaşıl İğdır” qəzetinin baş redaktoru Cabbar Şıktaş, Naxçıvan Yazıçılar Birliyinin sədri Asim Əliyev, ehtiyatda olan polkovnik Fərail Rəcəbli, AMEA-nın müxbir üzvləri Əbülfəz Quliyev və Tofiq Əliyev qeyd ediblər ki, Naxçıvanın xilası Ümummilli liderin yorulmaz, uzaqgörən fəaliyyəti və onun göstərişlərini sədaqətlə yerinə yetirən qəhrəmanların cəsarəti sayəsində mümkün olub.
XQ
Naxçıvan