Azərbaycanın Pakistandakı səfirliyi Müstəqilliyinin Bərpası Günü münasibətilə ölkənin Milli Kitabxanasında tədbir təşkil edib.

     Ölkəmizin Pakistandakı səfiri Xəzər Fərhadov Milli Kitabxanasının əməkdaşlarına, eləcə də pakistanlı tələbələrə 18 oktyabr -  Müstəqilliyin Bərpası Günü ilə bağlı məlumat verib. 

     Səfir müstəqilliyin ilk illərində Azərbaycanın vətəndaş müharibəsi və müstəqilliyini itirmək ərəfəsində olduğunu, ölkədə iqtisadi və siyasi qeyri-sabitliyin hökm sürdüyünü bildirib. 

     Məhz o çətin dövrdə Azərbaycan xalqının tələbi ilə Ümummilli Lider Heydər Əliyevin Azərbaycana qayıtdığını və 1993-cü ildə hakimiyyətə gəldiyini vurğulayan X.Fərhadov, ulu öndərin ölkədə hökm sürən  xaos və anarxiyanı, iqtisadi və siyasi çətinlikləri aradan qaldırdığını bildirib. Diplomat müstəqil Azərbaycanın yeni inkişaf yolu tutduğunu qeyd edib və aparılan uzaqgörən siyasət nəticəsində Azərbaycanın müstəqilliyinin əbədi və sarsılmaz olduğunu diqqətə çatdırıb. 

     X.Fərhadov əsası ulu öndər Heydər Əliyev tərəfindən qoyulan siyasətin hazırda Prezident İlham Əliyev tərəfindən uğurla davam etdirildiyini bildirib və onun rəhbərliyi altında Azərbaycanın bütün sahələrdə sürətlə inkişaf edən ölkələrindən birinə çevrildiyini vurğulayıb. 

     Səfir Azərbaycan Silahlı Qüvvələrinin Ali Baş Komandanı, Prezident İlham Əliyevin rəhbərliyi altında şanlı ordumuzun 2020-ci ildə Ermənistanın 30 ilə yaxın davam edən təcavüz siyasətinə 44 gündə son qoyaraq ərazi bütövlüyümüzü təmin etməsindən, Qarabağda keçirilən lokal xarakterli antiterror tədbirlərindən, işğaldan azad edilmiş ərazilərimizdə aparılan genişmiqyaslı bərpa və quruculuq işlərindən, Böyük Qayıdış proqramından, bölgədə sülhün bərqərar edilməsi və Qarabağda yaşayan ermənilərin ölkəmizə reinteqrasiyası istiqamətində Azərbaycanın atdığı addımlardan, Qərbi Azərbaycan İcmasının yaranma tarixi və fəaliyyətindən, müxtəlif dövrlərdə azərbaycanlılara qarşı aparılmış etnik təmizləməl siyasətindən, eləcə də Azərbaycan-Pakistan münasibətlərindən danışıb. 

Tədbir zamanı iştirakçıların çoxsaylı suallarına cavab verilib.

Sonda tədbir iştirakçıları Milli Kitabxanada fəaliyyət göstərən Azərbaycan Mərkəzi və Heydər Əliyev Guşəsi ilə tanış olublar.

Qulu Kəngərli 

XQ-nin xüsusi müxbiri

İslamabad