Dünən qanunsuz erməni silahlı birləşmələrinin üzvləri tərəfindən 1991-ci il dekabrın 22-də Xocalı rayonunun Meşəli kəndində soyqırımı törədənlərdən biri – Vaqif Xaçaturyanın cinayət işi üzrə ilk iclas keçirilib.

Yasamal Rayon Məh­kəməsində Bakı Hərbi Məh­kəməsinin hakimi Camal Ramazanovun sədrliyi ilə ke­çirilən iclasda təqsirləndirilən şəxsin anket məlumatları dəqiqləşdirilib. Ona hüquq və vəzifələri izah edilib. Vaqif Xaçaturyanın hüquqlarını Vəkillər Kollegiyasının üzvü Natiq Bəybalayev müdafiə edir. 

Prosesdə dövlət ittiham­çıları Baş prokurorun böyük köməkçisi, 3-cü dərəcəli döv­lət ədliyyə müşaviri Müqəd­dəs Sultanov və ədliyyə mü­şaviri Cövdət Mehrəliyevdir. Zərərçəkmiş şəxs qismində isə Xocalı Rayon İcra Ha­kimiyyətinin nümayəndəsi, eləcə də zərərçəkən Bəhlul Hümbətovun hüquqi varisi Meşəli kənd sakini Hüseyn Hümbətov iştirak ediblər.

Dövlət ittihamçısı M.Sul­tanov prosesin məhkəmə baxışına verilməsini təklif edib. Məhkəmə müşavirəyə gedib. Sonra məhkəmənin baxış iclası oktyabrın 17-nə təyin edilib.

Vaqif Xaçaturyan Azər­baycan Respublikası Ci­nayət Məcəlləsinin 103 (soyqırımı) və 107-ci (əha­lini deportasiya etmə və ya məcburi köçürmə) maddələri ilə təqsirləndirilir. 

Xatırladırıq ki, Vaqif Xa­çaturyanın iştirakı ilə millətçi ermənilərdən ibarət silah­lı banda Meşəli kəndində yerli azərbaycanlılara qarşı soyqırımı, təqib etmə, didər­gin salma və digər hüquq pozma cinayətləri törədib. Ümumilikdə, 27 nəfər öldü­rülüb, 21 nəfər müxtəlif dərə­cəli bədən xəsarətləri alıb, 2 nəfər girov götürülüb. 

2013-cü il noyabrın 21-dən axtarışda olan V.Xaça­turyan 2023-cü il iyulun 29-da “Laçın” sərhəd-buraxılış məntəqəsində saxlanılaraq istintaqa təqdim olunub. 

XQ